૧ યહોવાહની સ્તુતિ કરો.

હે મારા આત્મા, યહોવાહની સ્તુતિ કર.

૨ મારા જીવન પર્યંત હું યહોવાહની સ્તુતિ કરીશ;

મારા જીવનના છેલ્લાં શ્વાસ સુધી હું મારા ઈશ્વરનાં સ્તુતિગીતો ગાઈશ.

૩ તમે રાજાઓ કે માણસો પર ભરોસો ન રાખો,

કારણ કે તેઓની પાસે ઉદ્ધાર નથી.

૪ જ્યારે તેનો પ્રાણ તેને છોડી જાય છે, ત્યારે તેનું શરીર ધૂળમાં પાછું મળી જાય છે;

તે જ દિવસે તેની બધી યોજનાઓનો અંત આવે છે.

૫ જે માણસને સહાય કરનાર યાકૂબના ઈશ્વર છે,

જેની આશા તેના ઈશ્વર યહોવાહમાં છે, તે આશીર્વાદિત છે.

૬ યહોવાહે પૃથ્વી તથા આકાશ,

સમુદ્ર તથા તેમાંના સર્વસ્વનું સર્જન કર્યું છે;

તે સદા સત્ય પાળનાર છે.

૭ તે પીડિતોનો ન્યાય જાળવી રાખે છે

અને તે ભૂખ્યાઓને અન્ન પૂરું પાડે છે.

યહોવાહ કેદીઓને છોડાવે છે.

૮ યહોવાહ દૃષ્ટિહીનોની આંખો ખોલે છે;

યહોવાહ ભારે બોજથી દબાયેલાઓનો બોજો હલકો કરે છે;

યહોવાહ ન્યાયી લોકોને પ્રેમ કરે છે.

૯ યહોવાહ દેશમાંના વિદેશીઓનું રક્ષણ કરે છે;

તે અનાથો તથા વિધવાઓને ઊંચાં કરે છે,

પણ તે દુષ્ટોનો વિરોધ કરે છે.

૧૦ યહોવાહ સદાકાળ રાજ કરશે,

હે સિયોન, તમારા ઈશ્વર પેઢી દરપેઢી રાજ કરશે.

યહોવાહની સ્તુતિ કરો.