11
इस्राएलला लुवु मीतिवा
1 तुक क्यानी ङ ख्यिराङला टेयिन, “काङ कोन्छ्योककी खोरो पेतुप मीतिवाला क्युर्नी ज्याक्सुङ रो?” मिन, वुतुङ के खोकी तिवाला नाम्साङ क्युर्नी माज्याक। ङ साङ अब्राहामकी गिपा यिन, तमा बेन्यामीन मिछाङकी मी यिन। 2 कोन्छ्योककी तोङ नेज्युनी खोकी पेतुप मीतिवाला नाम्साङ क्युर्नी माज्याक। खोकी सुङगी नाङ्ला खोकी लुङ्तेम्बा एलियाकी कोर्ला काङ सिक्या वे ख्यिराङला छ्या मे? खोकी इस्राएलकी मीतिवी तेन्दोकला लानी कोन्छ्योकला दुक सिनी रेन्सुङ, 3 “ओ चोवो कोन्छ्योक, इस्राएलकी मीतिवी चोवोकी तङ्गुप लुङ्तेम्बातिवाला सेसुङ। तमा चोवोकी छोठीतिवा साङ र्हम क्युर्सुङ। तिवी पर्ला लुवु ति ङ तिराङ यिन। ङला साङ तिवी सेतुपला छोलिन वे।”* ११:३ १ राजा १९:१०, १४ 4 यिने कोन्छ्योककी एलियाला काङ लेन ग्यप्सुङ? “ङ ङरा थोक्ला बाल कुला शावा मिकिवु मी तोङ्डा दिन र्होक्नी ज्याङ वे।”* ११:४ १ राजा १९:१८ 5 तुक क्यानी तसाम साङ कोन्छ्योककी कटिन नेसुर पेतुपतिवा लुनी वे। 6 दोजो ती मीतिवा लुवु ति खोकी कटिन नेसुर यिन्सिन ती ति तिवी लाका नेसुर मिन, लाका नेसुर यिन्सिन कटिन ति कटिन राङ मिन।
7 त काङ सिरुप? इस्राएलकी मीतिवी कोन्छ्योककी थोङ्दाङला टेङ्बु च्युङ्गुप छाल्सिनाङ टेङ्बु च्युङ माथुप। यिने खोकी पेतुपतिवा तिराङ टेङ्बु वोतुप च्युङ्सुङ। तमा यम्बा लुवुतिवा ति तेरी सेम क्योङ्बु गाल्सुङ। 8 ती तप्की कोन्छ्योककी सुङला दुक सिनी टि वे,
“कोन्छ्योककी तिवाला काङ साङ हाक्मोकोवु सेम नङ्सिमा तसाम सेक तिवा मिककी मोथोङ्गुप ताङ नम्ज्योककी साङ मोथोवु गल वे।”* ११:८ व्यवस्था २९:४; यशैया २९:१०
9 तमा दाऊदकी दुक सिक्या वे,
“तिवी डेन साप च्योक्ची ति तोर्वाला ख्येलुप दोके च्युङ्शी,
तमा नर्तुक ग्यप्नी तला ग्यपुप दोके ताङ ङ्येन लङ्शी।
10 तिवी मिक ति डिप्नी थोङ मुथुपु डोशी,
तमा तिवी क्येल्दाङ ति नरी कोकोरोक डोशी।”* ११:१० भजन ६९:२२-२३
यहूदी मिन्दुप मिरिक यम्बातिवा थरुप
11 तुक क्यानी ङ येलुङ ख्यिराङला टेयिन, काङ इस्राएलकी मीतिवा दोला नर्तुक ग्यप्नी तला ग्यप्सिमा लङ मुथुपी रो? वुतुङ के तुकै मिन। इस्राएलकी मीतिवी येशूला तेपा माक्यानी लाका दुक्टा क्यासिमा यहूदी मिन्दुप मिरिक यम्बाकी मीतिवी तेपा क्यावु तप्की तिवा दिक्पा ने थर्नी वे। ती थोङ्नी इस्राएलकी मीतिवा ठतोक लानी खोला तेपा किशी सिरुप ति कोन्छ्योककी नोवा यिन। 12 इस्राएलकी मीतिवी लाका दुक्टा क्यासिमा मोलाम ति जम्बुलिङकी मीतिवाला थोप्सुङ। तमा तिवा लम्सुला मागलुप मोलाम ति यहूदी मिन्दुप मिरिक यम्बाकी मीतिवाला थोप्सुङ सिसिन तेरी इस्राएलकी मीतिवी तेपा क्यासियाङ तिवाला मङ छासे मोलाम थोप्किवी।
13 दी ताम्ङे ति ङ ख्यिराङ यहूदी मिन्दुप मिरिक यम्बाकी मीतिवाला सिरिन, कोन्छ्योककी ङला मिरिक यम्बाकी मीतिवी थोक्ला लोमा छ्ये च्युङ्गुपला पेन नङ्गुप तप्की कोन्छ्योककी ङला नङ्गुप लाकाला ङ छासे तेके कितिन। 14 मिरिक यम्बाकी मीतिवी थोक्ला यहूदीतिवी पर्ने मी ललाइ ठतोक लानी कोन्छ्योककी थाकाला लोक्नी थर्वा ङ्येशी सिरुप ति ङे रेवा यिन। 15 च्यिलासिसिन कोन्छ्योककी यहूदीतिवाला क्युर्नी ज्याक्सिमा जम्बुलिङकी मीतिवा कोन्छ्योककी मुला तम्जी ल्यामु च्युङ्गिवी सिसिन, कोन्छ्योककी तिवाला सेमला लासियाङ मङ तिवाला शेप ने थरुप मिजी मोथोपी रो? 16 ङ ख्यिराङला यहूदीतिवी थोक्ला पे यी शेतिन। दोजो टम्दोक ङ्येतुप पेला कोन्छ्योकला बुलुप फी ति चाङ्मा वोसिन तेरी टम्दोक साङ चाङ्मा डिवी। तुक राङ क्यानी दोङ्बी मर ल्यामु* ११:१६ चाङ्मा क्याङ्सिन तेरी येल्कातिवा साङ ल्यामु डिवी।
17 दोजो नाठुङ वुङगी जैतुन दोङ्बी येल्का च्येनी वुतुङ्की जैतुन दोङ्बी येल्का च्येतुप दासाला थिसुङ सिसिन ती नाठुङ वुङगी जैतुन दोङ्बी येल्काला ख्वो वानी डेलु गोर्किवी। 18 तुक क्यानी ख्यिराङ नाठुङ वुङगी जैतुन दोङ्बु दोके वोतुप यहूदी मिन्दुप मिरिक यम्बाकी मीतिवा वुतुङ्की जैतुन दोङ्बु दोके यिन्दुप यहूदीतिवाला ङ्यिङ्मर माकी, च्यिलासिसिन दोङ्बुला टेकाम तेरुप ति येल्का मिन, मर यिन। 19 तमा ख्यिराङ यहूदी मिन्दुप मिरिक यम्बाकी मीतिवी दुक सिवी, “वुतुङ्की जैतुन दोङ्बी येल्का च्येतुप ति ङ्यिराङ नाठुङ वुङगी जैतुन दोङ्बी येल्काला थितुपला यिन।” 20 ती ताम्ङे ति टेङ्बु राङ यिन। यहूदीतिवी तेपा माक्यावु तप्की वुतुङ्की जैतुन दोङ्बी येल्कातिवा च्येतुप दोके गलुप यिन। यिने ख्यिराङ ति तेपा क्यावु तप्की वुतुङ्की जैतुन दोङ्बुला थितुप दोके यिन। तुक क्यानी ख्यिराङ ङराङ यिन सिनी अम्बारङ्शिङ माकी, यिने ज्यिवा क्यानी दे। 21 च्यिलासिसिन कोन्छ्योककी वुतुङ्की जैतुन दोङ्बी येल्कातिवा साङ माज्याक्सुङ सिसिन ख्यिराङ नाठुङ वुङगी जैतुनकी येल्का यिन्दुपतिवाला याङ काङगी ज्योकुप्जा।
22 तुक क्यानी कोन्छ्योक ति च्यङ्च्यु सेम्बा वोतुप ताङ पर्च्या तोङ्गुप कोन्छ्योक यिन सिनी नासाम तोङ। ल्होसा, कोन्छ्योककी कला मुयुकुपतिवाला खोकी पर्च्या तोङ्गिवी। खोला नरी मोवा कितुपतिवाला खोकी च्यम्बा क्या नङ्गिवी। मिसियाङ ख्यिराङ साङ दोङ्बी येल्का दोके च्येनी क्युर्कितो। 23 यहूदीतिवा कोन्छ्योकला तेपा माक्यावु तप्की दोङ्बी येल्का दोके च्येनी क्युर्सुङ, यिने दोजो यहूदीतिवा खोला तेपा किवी सिसिन येलुङ खोकी तिवाला वुतुङ्की दोङ्बुला थि थुप्किवी। ती तेरी येलुङ क्या नङ्गुप ओङ ति कोन्छ्योकला वे। 24 ख्युरुङ नाठुङ वुङगी जैतुनकी दोङ्बु ल्यामु मेसिनाङ च्येनी वुतुङ्की जैतुन दोङ्बी येल्काला थिसिन गोमाला वुतुङ्की जैतुन दोङ्बी येल्का ति वुतुङ्की जैतुनकी दोङ्बुला थितुप मङ जोल्हमु गिवी।
इस्राएलकी मीतिवा तेरी थरुप
25 अच्युनुपतिवा, ख्यिराङ अम्बारङ्शिङ क्यानी खुरुङ राङ रिक्पा वोतुप यिन सिनी नो मिकिशी सिनी इस्राएलकी मीतिवी कोर्ला छ्याकला वोतुप कोन्छ्योककी नोवा ति ङ ख्यिराङला सिरिन। ती ति काङ यिन सिसिन, कोन्छ्योककी पेतुप यहूदी मिन्दुप मिरिक यम्बाकी मीतिवा अङ्टङ तेरी माछेवा सेक्ला इस्राएलकी मीतिवी नाङ्ला चेयीकी सेम ति क्योङ्बु डिवी। 26 तुक राङ क्यानी तेरी इस्राएलकी मीतिवा दिक्पा ने थर्किवी। तीकी कोर्ला कोन्छ्योककी सुङला दुक सिनी टि वे,
“दिक्पा ने थर ज्यितुप मिरा च्यिक सियोन नेमा गिवी,
तमा खोकी याकूबकी गिपाला वोतुप दुक्टातिवाला थेन्नी क्युर्किवी।”* ११:२६ यशैया ५९:२०-२१
27 येलुङ खोकी सुङ्गिवी,
“ङे तिवी मुला थाक्छ्येवु ताम्ङे ति दी यिन।
ङ तिवी दिक्पातिवा तेरी ता ज्यितिन।”* ११:२७ यशैया २७:९
28 लेन ल्यामुला तेपा माक्यावु तप्की यहूदीतिवा कोन्छ्योक ताङ मुला डला गलुप यिन। तुक क्यासिमा ख्यिराङ यहूदी मिन्दुप मिरिक यम्बातिवाला ति खोकी लेन ल्यामु ङ्येन्दुप ङ्येसुङ। यिन्सिनाङ यहूदीतिवा ति तिवी हङ्गावी छ्योक नेसुर कोन्छ्योककी पेनी ङ्यिङ्ज्ये क्या नङ्गुप गिपा यिन। 29 च्यिलासिसिन कोन्छ्योककी मीतिवाला ङ्येम्बा नङ्गुप ति नाम्साङ लोक्नी मेफेपी। तमा खोरे पेतुपतिवाला नाम्साङ क्युर्नी साङ मोज्योकिवी। 30 गोमाला याङ ख्यिराङ यहूदी मिन्दुप मिरिक यम्बाकी मीतिवा कोन्छ्योककी खला माङ्येन्दुप यिन, यिने त याङ यहूदीतिवी कोन्छ्योककी खला माङ्येन्दुप तप्की ख्यिराङला च्यम्बा ङ्येनी वे। 31 तुक राङ क्यानी तन्दा खोकी कला माङ्येन्दुप यहूदीतिवी ख्यिराङला खोकी च्यम्बा नङ्गुप थोङ्सिमा ती च्यम्बा ति खोप्राङला साङ थोप्शी सिनी ज्युक्ला खोकी कला ङ्येन्दुप डिवी। 32 च्यिलासिसिन कोन्छ्योककी च्यम्बा ति तेरी मीतिवाला थोप्शी सिनी खोकी तिवाला खोरे खला मेङ्येन्दुप जो नङ वे।
कोन्छ्योकला सोवा देकुप
33 ए कोन्छ्योककी रिक्पा ताङ येन्देन ति छासे ग्यक्चे वे! खोकी तेन्तेन क्यानी छ्या तेन नङ्गुप लाम ति सी साङ हाक्को मुथुपी। तुक क्यानी कोन्छ्योककी सुङला दुक सिनी टि वे,
34 “कोन्छ्योककी नोवा ति सी हाक्को थुप्किवी रो?
याङ्ना खोला टोङ्गु तेरुप ति सु यिन रो?”* ११:३४ यशैया ४०:१३
35 “सी कोन्छ्योकला छ्यक्तक बिन्दुप तप्की खोकी तीकी तेन्दोकला लोक्नी तेर गोवु वे रो?”* ११:३५ अय्यूब ४१:११
36 जम्बुलिङला वोतुप तेरी च्यालकतिवा खोकी राङ ज्ये नङ्गुप यिन। ती तेरी खो नेसुर राङ खोकी थोक्ला यिन। तुक क्यानी खोला राङ नरीकी नरी मोवा वुङ्शी। आमिन।