1 Täŋpäkaŋ Yawetä Elaija mänit pähap unitä äyäŋuttäŋ äbayäŋ täyak uterak kunum gänaŋ pudät yäpmäŋ ärokta kadäni keräp taŋirän Elaija kenta Elisa Gilgal yotpärare peŋpeŋ kuŋkumän. 2 Kuŋtäŋgän Elaijatä Elisa iwetkuk; Yawetä Betel yotpärare kukta näwerako unita gäk ŋo isi yäk. Ude iweränä Elisatä yäŋkuk; Ude nämo! Näk gäk nadäŋ gamikinik täyat unita Yawe irit mähemi wäpi terak bureni-inik ŋode gäwetat; Näk bok kudayäŋ. Ude yäwänä Betel yotpärareken bok kuŋkumän.

3 Täŋpäkaŋ profet äbot Betel itkuŋo unitä yabäŋ ahäŋpäŋ Elisa iwetkuŋ; Yawetä gäkŋo intäjukun ämaka apiŋo gomägarayäŋ täyak u nadätan? Ude yäwäwä Elisatä yäwetkuk; Ei, näk nadätat upäŋkaŋ unita wari yäneŋo yäk. 4 Eruk, päŋku Betel itpäŋä Elaijatä Elisa iwetkuk; Yawetä Jeriko yotpärare kukta näwerako unita gäk ŋo isi yäk. Ude iweränkaŋ Elisatä yäŋkuk; Ude nämo! Näk gäk nadäŋ gamikinik täyat unita Yawe irit mähemi wäpi terak bureni-inik ŋode gäwetat; Näk bok kudayäŋ. Ude iweränä Jeriko yotpärare bok kuŋkumän.

5 Kuŋirän profet äbot Jeriko itkuŋo unitä yabäŋ ahäŋpäŋ Elisa iwetkuŋ; Yawetä gäkŋo intäjukun ämaka apiŋo gomägarayäŋ täyak u nadätan? Ude yäwäwä Elisatä yäwetkuk; Ei, näk nadätat upäŋkaŋ unita wari yäneŋo yäk. 6 Eruk, päŋku Jeriko itpäŋä Elaijatä Elisa iwetgän täŋkuk; Yawetä Jodan kome kukta näwerako unita gäk ŋo isi yäk. Ude iweränkaŋ Elisatä yäŋkuk; Ude nämo! Näk gäk nadäŋ gamikinik täyat unita Yawe irit mähemi wäpi terak bureni-inik gäwetat; Näk bok kudayäŋ. Ude iweränä bok kuŋkumän.

7 Eruk profet äbot uken nanik profet 50 unitä yäwat yäpmäŋ kuŋkuŋ. Täŋpäkaŋ Elaija kenta Elisa kumaŋ päŋku Jodan ume gägäniken ahäŋpäŋ irirän profet 50 uwä banban itkaŋ yabäŋ yäwat itkuŋ. 8 Täŋirä Elaija tek käroŋi punin nanik yäŋopmäŋpäŋ gwäjiŋkuk. Gwäjiŋkaŋ ume urirän umetä däkŋeŋpäŋ kukŋi kukŋi kuŋirän yarä uwä kome jopi parirän kuŋkumän.

9  * Lo 21:17 Kumaŋ ume kukŋi udude kuŋpäŋä Elaijatä Elisa iwetkuk; Yawetä näk nämo yäpmäŋirän näkä jide kubä täŋ gamikta nadäŋpäŋä näwet yäk. Ude iweränä Elisatä iwetkuk; Anututä epän täkta kehäromi gamiŋkuko u taŋigän buŋät namiŋiri komeka kaŋ yäpayäŋ nadätat yäk. 10 Ude yäwänä Elaijatä iwetkuk; Gäkä man yäyan unita nadäŋira bäräpi täyak yäk. Upäŋkaŋ Yawetä nämagurirän nabäŋpäŋä imaka yäyan u api yäpen yäk. Täŋ nämo nabäŋiri nämaguränä, nämo api yäpen.

11 Yäŋpäŋ-nadäk ude täŋtäŋ kuŋtäŋgän pit kubägän karis kubä ba hos kädäp mebet ikektä ahäŋpäŋ äma yarä u bämopiken kuŋkaŋ Elaija mänit pähap äyäŋuttäŋ äbuko u terak imagut yäpmäŋ kunum gänaŋ äroŋkuŋ. 12  * 2Kin 13:14 Elisatä imaka u kaŋpäŋ gera yäŋkuk; Nana, nana! Isrel täŋo hos ba karis terak kwani äma! yäk. Ude yäŋpäŋ Elisatä Elaija wari nämo kaŋkuk. Täŋpäŋ butewaki nadäŋpäŋ iniken tek weŋ-gajähutkuk.