18
Bada wei kauai i geduaina-kauei
9 Maranai Bada dobu i vereveremiana o ruirui, eḡa dobuna taumaeni ai kaua apoapoe ma vinimalamai ona ḡovaivaitei. 10 ✡ Exo 22:18Eḡa melanai:
aiai tam natum orotona bo wavinena ma verenei da pulo aubaina ina apui;
bo ma vimata gamgam, mataira aiwai ma inainanai ma muriai aiwai ina tupua, rava ma ririwei;
bo ma parauma;
bo ma ḡaḡala;
bo ma vigwerigweri;
11 ma eḡa konaḡa bo arua maiteni ma babani bo arua ma ḡorei da ina rui awarim.
12 Bada taui da wei kauai apoapoe e kaukauei, i geduaina-kauei. Ma lamna aubaina aburuna ava Tauna rava wei dobuna maemaei ina viaḡaḡana-opunei au naomi. 13 Marana patapatana Bada ami God ona voteletelei. 14 Wei ravai barabaravui ma paraparaumai. Wate aburuna ava da ai doa anatapuna ona kwalei. Ma Bada ami God e viviḡaemi da wei ravai eḡa ai kaua ona ḡovaivaitei.
God Peroveta me Moses ina paritawaneiai
15 ✡ Act 3:22; 7:37Bada ami God, Peroveta me tau ami damei ina paritawaneiai. Taumi nai ravana ona rautaniḡanei. 16 Aubaina taumi wei lamna o vivibaḡei maranai o vitagogiemi ola Horeb au karena ma o riwa, “Eḡa Bada ponana tana nonori bo ai ḡaeḡaena menamenana tana inana-melei da tana viʼraḡeraḡelana.”
17 Bada i riweu, “Ai vibaḡa i ai. 18 Tau ai damei peroveta ana terepai me tam nanare, Ma riwau au gamona ana terei, da aubaiu ina vitau-vibabani. 19 ✡ Act 3:23Tauna wavauei ina jima, ma pariviravirai ana kovoḡi. 20 Wate maranai peroveta i mae-ḡaeḡae ma e ririwa da wavauei e jimajima wate tau eḡa babani ata verei, bo god ḡelauai aubai e nolanola, Nai perovetana ona viraḡeni. 21 Mepa da o vinuanaina, ‘Menanare tana aramanei da lamna eḡa Bada ita babani?’ 22 Wenanare ona aramanei. Maranai peroveta i babani Bada au wavanei ma anona eḡa ita tupua lamna nai babanina tauna ana babani ma eḡa bada. Lamna tauna ana vinuanotanota, nai ravana eḡa ona rovoei.”