12
1 Ami au vilaraga, taukauemi eḡa nuanuami ina vuru,
muriai da nuabola ona nelaḡai;
maranai magura i tuḡereḡerei,
ma ona riwa, “Lawana marina eḡa ita ai!”
2 Lamna maranai madeḡa, nawaravi ma ubona ina ḡuvai,
ma apau ina nememei da mara ina ḡuva-nonoei.
3 Anina ma nimami, taugagaloemi ina sisi
aemi marina vivirewapanana ina vokokokara.
Ivomi ina viruaḡa da ami lam eḡa ona uta gwadagwadai,
matami ina vinawanawa da eḡa ona inana kaua.
4 Taniḡami ina pota da gugura au etanai eḡa ona nonori,
kiu ina logologoi ina ravidagudaguimi wate ai wela anatapui ina amoa.
5 Taukauemi ona vinuanotenotei:
Maranai aidamo ona gagatei ma babara ona rovoei,
maranai kora ina tonaimi me rei talana,
ma tam ma gwaḡa-nae me kapau e gwaḡagwaḡa-nae iraḡe aubaina.
Erawa ma morelana anatapui ina kwa. Tauta kokoaḡa ta tuḡereḡerei ma tou ina vikarei au doa.
6 Taukauemi ona vinuanotei,
muriai da lavutu ḡuravana ina wanautuini,
bo nau goldei ina wanawamai
ma reduḡoru ina wanakabakabari.
7 Ma tupuami ina naeme au doa
ma aruami ina naeme God, tauverena awarina.
8 Tauviararamana i riwa, “Anona eḡa! Anona eḡa!
Anatapuna anona eḡa.”
Damona, God ma vivirei ma riwana ma voteletelei
9 Tauviararamana nuanuana i ulaula kaua, ma aiwai i aramanei rava i viararamani. Riwa nuaulaulaui maḡamaḡaui i ʼavi ma i girumei ma i rereḡa-kauei. 10 Tauna riwa vinuaubana i baiei ma aiwai i girumi lamna jijimanina ma ririwa-kauana.
11 Tauviararamana riwai lamna me kwapu ma riwa nuaulaulai i gam me tutu, nuanuam ita tonatonai. Wei anatapuna Bada i vereta. 12 Anina natu, ma aramanei da kaua ḡelaui ma inana-kauei. Buka girumai eḡa ina kwa ma giruma ḡiriḡiri i vinigarigari.
13 Wei anatapui au murina.
Riwa tagogiava ma aramanei:
God ma vivirei ma ponana ma voteletelei.
Wei lamna aubaina rava i vitupui.
14 God ata kaua anatapui govagovaḡai,
aiaii bo apoapoe, ina kovoḡi.