36
एसाव आ तौ चच युइ
१इतिहास १:३५-५४
1 एको एसाव आ चच युइ बाक्नीम। एसाव कली एदोम यो देंनीम। उत्पत्ती २५:३०; ब्यवस्था २३:८ 2 एसावमी कनान रागी ङा मीश निक्शी चाक्गा बाक्त। का हित्ती ङा एलोन आ तमी आदाह, अर्को होर ङा हिव्वी सिबोन आ तौ अनाह आ तमी ओहोली-बामा बाक्माक्त। उत्पत्ती २६:३४ 3 मिनु इश्माएल आ तमी बासेमाथ, नेबायोथ आ समी यो चाक्गा बाक्त। उत्पत्ती २८:९
4 मिनु आदाहमी एसाव के एलीफाज थिमाक्त। बासेमाथमी रूएल थिमाक्त। 5 ओहोली-बामामी येऊश, यालाम नु कोराह थिमाक्त। मेकोपुकी कनान रागीम जरमेशो एसाव आ तौ बाक्मा बाक्त।
6 मिनु एसावमी आ मीशपुकी, आ तौपुकी, आ तमीपुकी, आ खिं ङा मुर नेल्ल, आ बी ब्यफ नु बस्तु भाव नेल्ल कनान रागीम चेम्शो शोंप नेल्ल लाइश्शा, याकूब रे ङोन अर्को रागी लमाक्त। 7 मारदे हना शुश शोंप दुम्तीके, बस्तु भाव शुश दुम्तीके, काथा बाक्ने मचाप्से बाक्त। मिनु आस बाक्शो रागीम शुश बस्तु भाव दुम्तीके थुल्ने मचाप्मे बाक्त। उत्पत्ती १३:६ 8 मिनु मेको एदोम माइश्शो एसाव सेइर ङा पहाड लशा बाक्माक्त।
9 एसाव आ चच युइ सेइर पहाड ङा एदोमी माइश्शो सु सु बाक्मा बाक्त देंशा हना, 10 एसाव आ मीश आदाह आ तौ एलीफाज, आ मीश बासेमाथ आ तौ रूएल बाक्माक्त।
11 मिनु एलीफाज आ तौपुकी तेमान, ओमार, सेफो, गाताम नु केनाज बाक्मा बाक्त। 12 एसाव आ तौ एलीफाज आ कान्छी मीश तिम्ना बाक्माक्त। मेकोमी अमालेक थिमाक्त। मेकोपुकी एसाव आ मीश आदाह आ तौपुकी बाक्मा बाक्त।
13 मिनु रूएल आ तौपुकी नाहाथ, जेराह, शम्माह नु मिज्जा बाक्मा बाक्त। मेको एसाव आ मीश बासेमाथ आ तौपुकी बाक्मा बाक्त।
14 मिनु सिबोन आ तौ अनाह आ तमी, एसाव आ मीश ओहोली-बामा आ तौपुकी येऊश, यालाम नु कोराह बाक्मा बाक्त।
हुकुम पाइब एसाव आ तौपुकी
15 मिनु एसाव आ तौ आन दाते ङा ठेयब मुर सु सु बाक्मा बाक्त देंशा हना, आ ङोंइती जरमेशो तौ एलीफाज आ तौ तेमान, ओमार, सेफो नु केनाज, 16 कोराह, गाताम नु अमालेक, एलीफाजमी एदोम रागीमी थिशो आदाह आ तौ बाक्मा बाक्त।
17 मिनु एसाव आ तौ रूएल आ तौ आन दाते ङा ठेयब मुर नाहाथ, जेराह, शम्माह नु मिज्जा बाक्मा बाक्त। मेकोपुकी रूएलमी एदोम रागीमी थिशो, एसाव आ मीश बासेमाथ आ तौ बाक्मा बाक्त। 18 मिनु एसाव आ मीश ओहोली-बामा आ तौ आन दाते ङा ठेयब मुर येऊश, यालाम नु कोराह बाक्मा बाक्त। मेकोपुकी अनाह आ तमी, एसाव आ मीश ओहोली-बामाम, जरमेशो बाक्मा बाक्त। 19 मेकोपुकी एदोम माइश्शो एसाव आ तौ आन दाते ङा ठेयब मुर बाक्मा बाक्त।
सेइर आ चच युइ
20 मिनु ङोंइती मेको रागीम बाक्ब सेइर आ तौ होरीपुकी सु सु बाक्मा बाक्त देंशा हना, लोतान, शोबाल, सिबोन, अनाह उत्पत्ती १४:६; ब्यवस्था २:१२,२२ 21 दीशोन, एजेर नु दीशान बाक्मा बाक्त। मेकोपुकी एदोम रागी ङा सेइर आ तौ होरी आन दाते ङा ठेयब मुर बाक्मा बाक्त। 22 लोतान आ तौ होरी नु हेमान बाक्सा बाक्त। लोतान आ समी तिम्ना बाक्माक्त। 23 शोबाल आ तौपुकी अल्वान, मानाहाथ, एबाल, शेफो नु ओनाम बाक्मा बाक्त। 24 सिबोन आ तौ आइयाह नु अनाह बाक्सा बाक्त। मिनु अनाहमी आ आफ सिबोन आ गधा योव़दीमेनु, गोरशो रागीमी होश ब्वाक्कु बुक्तीके थिदा बाक्त। 25 अनह आ आल दीशोन नु आ तमी ओहोली-बामा बाक्सा बाक्त। 26 मिनु दीशोन आ तौपुकी हेम्दान, एश्बान, इथ्रान नु केरान बाक्मा बाक्त। 27 एजेर आ तौपुकी बिल्हान, जावान नु अकान बाक्मा बाक्त। 28 दीशान आ तौ ऊज नु अरान बाक्सा बाक्त। 29 होरी आन दाते ङा ठेयब मुरपुकी लोतान, शोबाल, सिबोन, अनाह, 30 दीशोन, एजेर नु दीशान बाक्मा बाक्त। मेको सेइर रागी ङा होरी आन ठेयब मुर बाक्मा बाक्त।
एदोम रागी ङा पिपपुकी
31 ङोंइती इस्राएल ङा मुर आन पिप मबाक्शो बाक्माक्त। एदोम रागीमी चहिं सासन पाइब पिपपुकी बाक्मा बाक्त। 32 मिनु बेओर आ तौ बेलामी एदोम रागीमी सासन पवा बाक्त। मिनु मेको आ सहर आ नें दिनहाबा बाक्माक्त। 33 मिनु बेला बेक्शा नोले बोज्रा ङा जेराह आ तौ योबाब मेकेर ङा पिप दुम्माक्त। 34 मिनु योबाब बेक्शा नोले तेमान आ मुर आन रागी ङा हुशाम पिप दुम्माक्त। 35 मिनु हुशाम बेक्म नोले बेदाद आ तौ हादाद पिप दुम्माक्त। मेकोमी मोआब रागीमी मिदयानी नु लडाइ पशा ग्रामाक्त। आ सहर आ नें अवीथ बाक्माक्त। 36 मिनु हादाद बेक्म नोले मास्रेकाह ङा सम्ला पिप दुम्माक्त। 37 मिनु सम्ला बेक्म नोले युफ्रेटीस खोला आ नेक्था बाक्शो रेहोबोथ ङा शावल पिप दुम्माक्त। 38 मिनु शावल बेक्म नोले आकबोर आ तौ बाल-हनान पिप दुम्माक्त। 39 मिनु आकबोर आ तौ बाल-हनान बेक्म नोले हादार पिप दुम्माक्त। आ सहर आ नें पाहु बाक्माक्त। आ मीश मेहेताबेल बाक्माक्त। मेको मात्रेद आ तमी बाक्माक्त। मात्रेद चहिं मे-जाहाब आ तमी बाक्माक्त।
एसाव रे पिशो थर
40 एसाव रे पिशो थर आन खिं नु आन बाक्तीके तेको बाक्मा बाक्त देंशा हना, तिम्ना, अल्वाह, येथेथ, 41 ओहोली-बामा, एलाह, पिनोन, 42 केनाज, तेमान, मिब्सार, 43 मग्दीएल नु यिराम बाक्मा बाक्त। मेको एदोम आ थर आन बाक्तीक बाक्मा बाक्त। एसाव एदोमी आन किकी पिपी बाक्माक्त।