17
येशूला स्य्हाल पोबा
मर्कूस ९:२-१३; लूका ९:२८-३६
1 ढुरे लिच्छा येशूसे पत्रुस, याकूबदेन याकूबला आले यूहन्नादा जे ह्राङदेन छ्याम नोबा गङरी भोर्सी फेप्जी। 2 चेलागदेसे च्याना च्यानान येशूला स्य्हाल पोसी धिनी ह्रङ् य्हाल य्हाल तजी। ओच्छे थेला क्वानएनोन धिनीला स्हेर ह्रङ्बान तजी।† “क्वानएनोन धिनीला स्हेर ह्रङ्बान तजी” कोइ कोइ बाइबलरी चा तार तार तजी भिसी भ्रिबा मुला। तर ग्रीक बाइबल अन्छार चु पदला मुल अर्थ चा धिनीला स्हेर ह्रङ्बान य्हाल य्हाल तजी भिसी पाङ्बा हिन्ना (मर्कूस ९:३; लूका ९:२९)। 3 थेनोन धुइरी थेनीगदेसे थेरी मोशादेन एलिया, येशूदेन छ्याम ताम लबान लबा म्राङ्जी। 4 चु म्राङ्सी पत्रुससे येशूदा “प्रभु, य्हाङ चुरी मुबा ज्यबा तजीम। ह्राङदा ज्यबा छोर्सम चुरी ङाइ छाप्रो सोम स्होला, गिक ह्राङला लागिरी, गिक मोशाला लागिरी ओच्छे गिक एलियाला लागिरी” भिसी भिजी। 5 थेसे थेह्रङ् पाङ्ना पाङ्नान तार तार्बा खसु खसी थेनीगदेदा घप्जी। थे खसु न्हङग्याम “चु ङाइ सेमहेन्से माया लबा ङाला झा हिन्ना, थेदा म्राङ्सी ङा ल्हानान ताङ्बा मुला। थेतबासेलमा एनीगदेसे चुसे भिबा ताम ङ्यान्गो” भिबा काइ थेःजी।* व्यव १८:१५; भजन २:७; यशै ४२:१; मत्ती ३:१७; मर्कू १:११; लूका ३:२२; २ पत्रु १:१७-१८
6 थे ताम थेःमाहेन्से चेलागदे लोङ्सी सरी ख्लुप तजी। 7 तर येशू थेनीगदे मुबा ग्लारी खसी थेनीगदेदा थुर्सी “रेःगो, एनीगदे थालोङ्गो” भिसी सुङ्जी। 8 जमाहेन्से थेनीगदे रेःसी च्यामा थेरी येशू बाहेक स्य्हान्दो खालैदा आम्राङ्नी।
9 जमाहेन्से येशू ह्राङला चेलागदेदेन छ्याम गङग्याम फाप्बान लबा धुइरी येशूसे चेलागदेदा “च्यागो, परमेश्वरसे पुइखबा म्हि सिबाग्याम आसोतेधोना एनीगदेसे तिनी म्राङ्बा चु ताम खालैदा थापाङ्गो” भिसी सुङ्जी।
10 जमाहेन्से चेलागदेसे येशूदा “यहूदी धर्मगुरुगदेसे तिग्दा एलिया अगमवक्ता ङाच्छा खतोःला भिबा?” भिसी ङ्योइमा,* मला ४:५ 11 येशूसे चेलागदेदा चुह्रङ् भिसी सुङ्जी, “हिन्ना, ङाच्छा एलिया खला ओच्छे थेसे जम्मान ताम ढिक्ना लला। 12 तर एनीगदेसे ङाला ताम ङ्यान्गो, तिग्दा भिसम एलिया खसी जिन्बा मुला। तसैनोन थेदा ङोआसेना म्हिगदेसे जे लइ म्हन्बा थेनोन लजी। थेह्रङ् लसीन परमेश्वरसे पुइखबा म्हिसेनोन थेनीगदेला याग्याम ल्हानान दुख नातोःबा मुला।”* मत्ती ११:१४ 13 जमाहेन्से येशूसे बप्तिस्मा पिन्बा यूहन्नाला बारेरी सुङ्जीम भिबा ताम चेलागदेसे घोजी।
येशूसे म्हङसे स्याप्बा कोलादा खम्ना लबा
मर्कूस ९:१४-२९; लूका ९:३७-४३
14 थेनीगदे म्हिला हुल मुबा ग्लारी धोखमाहेन्से म्हि गिक येशूला ङाच्छापट्टि पुइ जूसी, 15 “प्रभु, ङाला झादा दया लउ, तिग्दा भिसम थेदा स्ह म्हङसे ल्हानान दुख पिन्बा मुला। थेदा खाइमाम मेरी, खाइमाम क्युइरी भ्याङ्मुला। 16 थेदा खम्ना लसी पिन्गो भिसी ङाइ ह्राङला चेलागदे मुबा ग्लारी भमुबा। तर थेनीगदेसे खम्ना लबारी आखम्नी” भिसी भिजी।
17 जमाहेन्से येशूसे थेनीगदेदा “विश्वास आलबादेन नइबा सेम थोबा म्हिगदे, खाइमाधोना ङा एनीगदेदेन छ्याम तला? खाइमाधोना ङाइ एनीगदेदा नासे? थेदा चुरी भउ” भिसी सुङ्जी। 18 ओच्छे येशूसे थे म्हङदा बङ्जी। बङ्माहेन्से थे कोलाला ल्हुइग्याम म्हङ थोन्सी यार्जी। जमाहेन्से थे कोला तुरुन्तन खम्जी।
19 ओच्छे चेलागदे सुटुक्क येशू मुबा ग्लारी खसी “तिग्दा ङन्से थे म्हङदा ताप्बारी आखम्नी” भिसी ङ्योइमा, 20 येशूसे थेनीगदेदा “एनीगदेला विश्वास आयोबासे लमा हिन्ना। थेतबासेलमा एनीगदेसे ङाला ताम ङ्यान्गो, चुदे एनीगदेदेन छ्याम पच्छैला ब्लु गिक तेःबा जे विश्वास मुसैनोन चु गङदा ‘चुग्याम लेःउ’ भिसम थे लेःला। एनीगदेला लागिरी आतबा गे तिगै आरे।† म्हिसे गाते विश्वास लबा मुला भिबा चा घ्रेन ताम आहिन, तर थेला जजाबा विश्वासरी परमेश्वरला शक्ति गाते घ्रेन मुला भिबा ताम चा घ्रेन ताम हिन्ना।* मत्ती २१:२१; मर्कू ११:२३; १ कोर १३:२ 21 तसैनोन चुह्रङ्बा म्हङ चा फोइथान चिसी प्रार्थना आलतेधोना थोन्सी आयार्मुला” भिसी सुङ्जी।† चु पदला ताम ल्हाना ह्रङ्बा ग्रीक बाइबलरी भ्रिबा आरे। मर्कूस ९:२९ स्हीगो।
येशूसे ह्राङ खाह्रङ् लसी सिला भिबा ताम दोःसी सुङ्बा
मर्कूस ९:३०-३२; लूका ९:४३-४५
22 थेनीगदे गालील अञ्चलरी ह्रुप तबा धुइरी येशूसे चेलागदेदा “परमेश्वरसे पुइखबा म्हिदा म्हिगदेला यारी जिम्मा पिन्ना। 23 थेनीगदेसे थेदा साइला। तसैनोन सिसी सोमरेमाकुनु थेदा सिबाग्याम सोना लला” भिसी सुङ्जी। चु ताम थेःसी चेलागदेदा ल्हानान दुख ङ्हम्जी।
परमेश्वरला मन्दिरला तिरो
24 येशू ह्राङला चेलागदेदेन छ्याम कफर्नहुम नाम्सारी फेप्खबा धुइरी परमेश्वरला मन्दिरला तिरो दुइबा म्हिगदे पत्रुस मुबा ग्लारी खसी, “एनीगदेला गुरुसे परमेश्वरला मन्दिरला तिरो फामुला कि आफामुला?” भिसी ङ्योइमा,* प्रस्था ३०:१३; ३८:२६ 25 पत्रुससे “फामुला” भिसी भिजी। जमाहेन्से पत्रुस दिम न्हङरी वाङ्सी येशूदा पाङ्बारी छ्याइमा येशूसेन, “सिमोन, एला तिग सेम मुला? जम्बुलिङला ग्लेगदेसे ह्राङलान म्हिगदेग्याम तिरो दुइमुला कि स्य्हान्दो म्हिगदेग्याम दुइमुला?” भिसी ङ्योइजी।
26 पत्रुससे “स्य्हान्दो म्हिगदेग्याम दुइमुला” भिसी जोहाब पिन्जी।
जमाहेन्से येशूसे चुह्रङ् भिसी सुङ्जी, “थेह्रङ् भिसम ह्राङला म्हिगदेसे चा आफासै तबा चीम। 27 तसैनोन ए समुन्द्ररी निसी बल्छीसे तार्ङा साइसी भउ। एसे जम्मान भन्दा ङाच्छा साइबा तार्ङाला सुङरी च्यागो, एसे थेला सुङरी म्हुइला डबल गिक स्याप्ला। थे डबल भोर्सी य्हाङ न्हीला तिरो फागो। थेनीगदे य्हाङदेन छ्याम बोमो थाखगै।”
†17:2 “क्वानएनोन धिनीला स्हेर ह्रङ्बान तजी” कोइ कोइ बाइबलरी चा तार तार तजी भिसी भ्रिबा मुला। तर ग्रीक बाइबल अन्छार चु पदला मुल अर्थ चा धिनीला स्हेर ह्रङ्बान य्हाल य्हाल तजी भिसी पाङ्बा हिन्ना (मर्कूस ९:३; लूका ९:२९)।
*17:5 व्यव १८:१५; भजन २:७; यशै ४२:१; मत्ती ३:१७; मर्कू १:११; लूका ३:२२; २ पत्रु १:१७-१८
*17:10 मला ४:५
*17:12 मत्ती ११:१४
†17:20 म्हिसे गाते विश्वास लबा मुला भिबा चा घ्रेन ताम आहिन, तर थेला जजाबा विश्वासरी परमेश्वरला शक्ति गाते घ्रेन मुला भिबा ताम चा घ्रेन ताम हिन्ना।
*17:20 मत्ती २१:२१; मर्कू ११:२३; १ कोर १३:२
†17:21 चु पदला ताम ल्हाना ह्रङ्बा ग्रीक बाइबलरी भ्रिबा आरे। मर्कूस ९:२९ स्हीगो।
*17:24 प्रस्था ३०:१३; ३८:२६