66
ዓይኑሞ ሱኡጋሢ ዓይሣ ጎይፆና ዓይናዺንታ ፆኦሲ ሄርሺሢ ዓይኑሞ
ዎላ ቡኪ ጋላቶ ጋላታ
1 ዒንሢ ሳዖይዳ ዓኣ ዓሳ ቢያ
ፆኦሲም ዒላሺ ጋላቱዋቴ።
2 ሱንፆ ዒዛኮ ቦንቺ ዓይናዹዋቴ፤
ጋላታና ዒዛ ቦንቹዋቴ።
3 ፆኦሲም ሂዚ ጎዑዋቴ፦
«ማዻ ኔኤኮ ዎዚ ዲቃሢ ሄርሺሳያዳይ!
ዎልቃ ኔኤኮ ዼኤፒታሢሮ
ኔ ሞርካ ኔ ቤርቶይዳ ዒጊቹሞና ጎጋይቃኔ።
4 ሳዖይዳ ዓኣ ዓሳ ቢያ ኔኤም ዚጋኔ፤
ኔኤም ዔያታ ጋላታ ዓይኑሞዋ ሺኢሻኔ፤
ሱንፆዋ ኔኤኮ ቦንቺሢና ዓይናዻኔ።»
5 ሃኒ ሙኪ ፆኦሲ ማዼ ባኮ ዛጉዋቴ፤
ዓሶ ባኣካ ዒዛኮ ማዻ ዒጊቻያኬ።
6 ባዞ ዒዚ ሳዓ ማሄኔ፤
ኑኡኮ ቤርታኣ ዓዶንሢ ዎሮ ቶኪና ፒንቄኔ፤
ዒዚ ማዼ ባኮና ኑኡኒያ ዎዛዼኔ። 66፡6 ኬሲ. ማፃ 14፡21፤ ዒያ. 3፡14-17።
7 ፔኤኮ ዎልቆና ዒዚ ናንጊና ዎይሣኔ፤
ዓኣፖና ዴሮ ጊዥ ጌዒ ዛጋኔ፤
ዬያሮ ዋይዞ ዒፃ ዓሳ ዒዛ ዑፃ ዔቂባኣቴ ቃራኬ።
8 ዒንሢ ዴራ ቢያ ኑ ፆኦዛሢ ቦንቹዋቴ፤
ዑኡዞ ዒንሢሲ ዼጊዲ ዒዛም ጋላታ ሺኢሹዋቴ።
9 ኑና ሼምፔና ጌሣሢ
ቶኮዋ ኑኡኮ ሃሊፁዋጉዲ ካፓሢ ዒዛኬ።
10 ፆኦሲዮ! ኑ ዎይታቴያ ኔ ኑና ዛጌኔ፤
ዓዳ ቢራ ዓንጊጉዲ ኔ ኑና ሼኤሼኔ።
11 ፒሮይዳ ኔ ኑና ዓይሤኔ፤
ዴኤሢ ባሲ ኑና ኔ ባሲሴኔ።
12 ኑኡኮ ሞርካ ኑና ጎይሢ ባይዚ ሄርቃንዳጉዲ ኔ ኑና ማሄኔ፤
ታሚና ዲጲናኮ ባኣኪና ኑ ዓኣዼኔ፤
ሃሢ ጋዓንቴ ዖርጎቹሞ ኩሜ ዳልጎ ቤዞ ዔኪ ኔ ኑና ሙኬኔ።
13 ኔ ማኣሪ ሚቺ ዒንጎ ዒንጊፆ ዔኪ ታ ጌላንዳኔ፤
ታኣኮ ናኣቦዋ ታ ኔኤም ሺኢሻንዳኔ።
14 ፑርታ ሜታ ታና ሄሌ ዎዶና
«ኔኤም ታ ዒንጋንዳኔ» ጌዔ ናኣቦ ታ ሺኢሻንዳኔ።
15 ሶቦሮ ጌማቶ ሚቺ ዒንጎ ዒንጊሢ ማሂ
ዓዶ ማራቶዋ ሳውቃ ዒንጊሢ ማሂ
ታ ኔኤም ሺኢሻንዳኔ፤
ዚዮ ጌማቶንታ ኮላቶንታ ታ ኔኤም ሹካንዳኔ።
16 ዒንሢ ፆኦሲ ዒጊጫ ዓሳ ሃኒ ሙኪ ዋይዙዋቴ፤
ታ ሼምፔሎም ዒዚ ማዼ ባኮ ታ ዒንሢም ኬኤዞም።
17 ታኣኒ ዒዛ ባንሢ ዒላቴኔ፤
ታ ዻንጎናኣ ታ ዒዛ ጋላቴኔ።
18 ጎሞ ታኣኮ ታ ቡኡፁዋዖ ዎንዴ ዒና ዓኣቼያታቴ
ናንጊና ናንጋ ጎዳ ሺኢጲፆ ታኣኮ ዋይዚንዱዋንቴኬ።
19 ሃሢ ጋዓንቴ ፆኦሲ ጎኔና ዋይዜኔ፤
ታኣኒ ሺኢቃ ዑኡዞ ዒናፓ ዒ ዋይዜኔ።
20 ሺኢጲፆ ታኣኮ ቦሂባኣሢ
ሚጪንቲፆዋ ታና ሃሺባኣሢ
ዬይ ፆኦዛሢ ጋላቲንቶንጎ።