31
1 Iehova e, lau oi na abidadama henimumu;
hemarai na nega idoinai basine abigu,
emu kara maoromaoro ai ba hamaurigu!
2 Ame igo diho, a hakala henigu,
ba hamaurigu haraḡa-haraḡa!
Egu komu nadina ai baola,
egu kohoro ai baola, ihamaurigu totona.
3 Oibe, oi na egu nadi-gini bona egu kohoro;
oi ladamu dainai ba gunalaigu bona ba hakaugu;
4 iabigu totona e otoa huona amo ba hamaurigu,
badina be egu maḡu na oi.
5 Laumagu na oi imamu ai na atoamu;
Iehova e, heabi-dae Diravana e, oi ese vada o hamaurigu.
6 Dirava koikoidia laulaudia e badinadiamu taudia na inai henidiamu;
a Iehova na abidadama heniamu.
7 Lau baina moale, emu hebogahisi baina moalelaia;
badina be egu hisihisi vada o itaia,
egu hekwarahi vada o haeroa;
8 lau inaigu imadia ai so negegu,
a lau aegu na taora bada gabuna ai vada o atodia.
9 Iehova e, ame bogagu hisi,
badina be hisihisi ese a gugubagumu,
taitai ese matagu e hadikamu,
laumagu bona tau-anigu danu e dikamu.
10 Badina be egu mauri na lalo-hisihisi ai e oremu,
egu mauri laḡanidia na ḡanaḡana ai e oremu;
egu goada na e oremu, egu kara dika daidiai,
bona turiagu na e mamano.
11 Inaigu iboudiai ese e dadaraigumu,
dekegu taudia ese e dadaraigu hereamu,
turagu ese e gari henigumu,
ariara ai e itagumu taudia ese e heautanigumu.
12 Taunimanima ese vada e lalogu boio, mase tauna na heto;
lau na uro makohina na heto.
13 Oibe, hutuma edia hemaunu na kamonaimu,
kudou hetaha na kaha iboudiai e miamu.
Idia ese e henega heboumu, lau ihadikagu totona,
egu mauri iabi-ohona dalana e tahuamu.
14 Iehova e, lau oi na abidadama henimumu,
na tomu “Oi na egu Dirava”.
15 Egu nega na oi imamu ai;
lau inaigu bona e daḡedaḡe henigumu taudia imadia amo ba hamaurigu.
16 Oi vairamu ese emu hesiai tauna baine hadiaria;
emu hebogahisi ai ba hamaurigu.
17 Iehova e, hemarai ese basine abigu,
badina be oi na hahanemumu;
kara dika taudia na bae hemarai,
asi reḡereḡedia na mase taudia edia gabu baela.
18 Koikoi taudia bibinadia na bae mu;
edia heaḡi ai bona edia hedadarai ai
kara maoromaoro taudia bae ihi-ihiraidia taudia na
ududia bae hahekapu.
19 Emu hahenamo na bada herea,
o abia heḡaeḡaemu, oi e gari henimumu taudia edia,
bona o karaiamu, oi metaimu e heau heniamu taudia edia,
taunimanima natudia vairadiai o karaiamu.
20 Oi metaimu ai o hunidiamu,
taunimanima edia hedibaḡani karadia amo o hunidiamu;
emu kalaga ai o naridiamu,
badu taudia maladia amo o gimadiamu.
21 Iehova aina hanamoa;
badina be ena hebogahisi na egu ai vada e hahedinaraia,
hoa ḡauna na heto,
e heḡeḡe dae hanuana lalonai e kougu ahu negana ai.
22 Egu gari ai nato
“Oi vairamu amo na henege daure”.
A oi ese egu noinoi o kamonai,
na tai henimu negana ai.
23 Iehova ena helaḡa taumui e, ia ba lalokau henia.
Iehova ese kamonai taudia e hamauridiamu,
a heaḡi karadia e karamu taudia na davadia e henidiamu.
24 Ba goada, ba boga auka,
Iehova o nariamu taumui iboumui ai.