63
1 Dirava e, oi na lauegu Dirava, lau oi na tahumumu,
lau laumagu e ranu masemu oiemu ai;
lau hidiogu na e manorimu oiemu ai,
tano kaukauna ai, tano gaḡaena ai,
asi ranuna tanona ai, na heto.
2 Taunabunai, lau ese vada na raraimu, gabu helaḡana ai,
oi siahumu bona hairaimu vada na itadia;
3 badina be emu hebogahisi ese mauri e hereaiamu,
una dainai lau bibinagu ese bae imodaimu.
4 Taunabunai, egu mauri dinadia iboudiai baina hanamomu,
imagu baina dudui isi, oi ladamu baina hahanea.
5-6 Egu geda ai oi na lalomu negadia ai,
hanuaboi lalonai oi na haeromu negadia ai,
laumagu be bogagu na turia harana bona digara amo bema kunu na heto;
lau udugu ese e hanamomumu, mai bibina moaledia ida;
7 badina be oi ese vada o kahagu,
oi hanimu ikerukerudia ai moale anedia na abimu.
8 Lau laumagu na oiemu ai e taomu;
oi imamu idibana na egu imuda.
9 A egu mauri iabi-ohona e tahuamu taudia na
tanobada ena dobu gabudia ai bae diho.
10 Dare ese bae aladia;
uda sisiadia ese bae daredia.
11 A hanua pavapavana ese Dirava baine moalelaia;
ia ladana ai e gwau hamatamu taudia na hairaina bae abia,
badina be koikoi taudia ududia na bae dai ahu.