LUCAS-GAYABURBA-NUED
LUCAS
GEBE-SOGLENAID
Garda-nug
Lucas, ina-duled gued. We-dulede, Judío-dulesulid, degine, Jesúsʼba nanadii gusadsurbalid. Lucas, we-garda Teófiloʼga narmaksad. Lucas, nuekwaa Jesús-nanasad-narmakega dulemar-Jesús-daksamaladse nue igar-amiar gusad, degine, e-uayagwar-ibmar-itosmaladse igar-amiar gusad.
Lucas, Pabloʼba arbas gusbalid. Degine, Lucas Gusmalad-Garda (Hechos) narmasgusbalid (Gusmalad 1:1; 16:11). Binsamardo, we-gardamar birga 63-68ʼgi narmakles-insaye.
Lucas-Gayayburba-Nuedgi weyob sunmaklenaid
We-gardagi, Bab-Dummad-Burba-Isligwaledba Lucas sogsado, we-Jesúsʼde, sanale dulega-gunoniye. Deginbali, Jesús gwen isgussurye, degi, bela dulemar-wiledakdii gusad. Lucas sogsabalid, Jesús, dulemar-isgued-anar nakrusgi-burgwega, we-napnegse noniki, adi, dulemar bela nabir abonolemalagar. Jesús, nakrusgi-burgwisgu, ibapaagi gannar durgusad.
We-gardagine, weyob ilemakar sunmaklenaid:
1. Lucas, Dummad-Teófiloʼga narmaksiid (1:1-4).
2. Juan-Bautista, degi, Jesús, bipigwaun-gudigusad (1:5–2:52).
2a. Baliwitur Juan-Bautista-gwalulegoedgi, degi, Jesús-gwalulegoedgi, sunmaksad (1:5-38).
2b. Juan-Bautista-gwalulesad (1:39-80).
2c. Jesús-gwalulesad (2:1-20).
2d. Jesús dungusad (2:21-52).
3. Jesús e-arbaed-imakesokalid (3:1–4:13).
3a. Jesús-diigi-oglesad (3:1-22).
3b. Jesucristo-e-dad-dummagan (3:23-38).
3c. Jesús nega-dulesulidganba gudigusad (4:1-13).
4. Jesús, Galilea-yargi arbasad (4:14–9:50).
4a. Jesús ibmar-imaksad (4:14–7:17).
4b. Jesús, degi, Juan-Bautista (7:18-35).
4c. Jesús-ibmar-imaksad, degi, ibmar-odurdaksad (7:36–9:21).
4d. Jesús, Dule-Wargwen-Barmiledagoye (Cristo) soglesadid (9:22-50).
5. Jesús, Jerusalénʼse nadapigusad (9:51–19:27).
6. Jesús, Jerusalénʼgi gudigusad (19:28–21:38).
7. Jesús-wilegoed-ibagan (22:1–24:12).
7a. Jesús nakrusgi-bioklesokalid-iba (22:1-62).
7b. Jesús-wilesad, degi, e-burgwisad (22:63–23:56).
7c. Jesús gannar-durgusad (24:1-12).
7d. Jesús durgusad-sorba ibmar-imaksad (24:13-53).
Be itogua.
1. LUCAS, DUMMAD-TEÓFILOʼGA NARMAKSIID
1
(1:1-4)
1 Aisaar bukidar dulemar igar-napiragwad anmar-abargi-gusadi ilemakar-nasikoeyobi na binsasmalad. 2 Igi gebesaila Jesús-sapingan na e-sunnad Jesús-daksamala, deyobi a-igargi anmar-odurdaksamarmogad. Ar Bab-Jesús we-dulemar e-igargi-sunmakega barmisgusad. 3 Dummad-Teófilo, nue an we-igargi ise-nergusmogad. Degisoggu, an dakdo, bur an bega Jesús-igar gebesaila-onoded-akar, nue ilemakar narmakergebe. 4 Adi, be nue-wisgumogagar Jesús-igargi-be-odurdaklesadi we napiragwadi, gakansuli.
2. JUAN-BAUTISTA, DEGI, JESÚS, BIPIGWAUN-GUDIGUSAD
(1:5–2:52)
2a. Baliwitur Juan-Bautista-gwalulegoedgi, degi, Jesús-gwalulegoedgi, sunmaksad
(1:5-38)
Baliwitur sogsa gusad, Diigi-dule-oged-Juan gwalulegoye
5 Deunni, Rey-Herodes, Judea-yargi negdakmaigu, dule-irwa-Bab-Dummadse-goled-wargwen, Abíasʼsikid mai-gusad. A-dulede, Zacaríasʼye nugad, e-omedi Aarón-wagansikidid, Elisabetʼye-nugad. 6 Emide, ebobela, Bab-Dummad-asabin igar-innikigwadba damaladid. Bab-igar-uksadba, degine, Bab-Dummad-sogsadbali nanamalad-dulemalad. Agala, Bab-Dummad egi ibmar akarsoged sated. 7 Ar amarde, mimmi-satemalad, ar ade, Elisabet geg mimmi-baked, degine, bato amarde, seredgusmarbalid.
8 Ibagwengine, Abías-e-gwenadgansikmaladga Bab-Dummadse-goled-neggi-arbaega ibagan nonikid. Deunni, Zacarías Bab-Dummadse-goled-neggi dule-irwa-Bab-Dummadse-golega arbanonimogad. 9 Na gusgu igi dule-irwa-Bab-Dummadse-gormalad nugsalege, deyob Zacarías nugsalealid, adi, Bab-Dummadse-Goled-Neg-Islidikidgi dogegar, ina-wawadikid obupurmakegar. 10 Degine, ina-wawadikid-ogumaked-wachigi, deun bela-dulemar magaba Bab-Dummadse gorbukwa gusmalad.
11 Zacarías, Bab-Dummad-Neg-Islidikidgi ina-wawadikid ogumaknaidgi, Bab-Dummad-baliwitur-wargwen, Zacaríasʼse ukiar magar-gunonikid. Ina-wawadikid-ogumakleged-aila-naba, argan-nuedsik gwichi dakalid. 12 Zacarías, deyob Bab-Dummad-baliwitur-dakargu, gwakided, bela nue-dobee ito naded. 13 Ar baliwiturdi ega sogded: “Zacarías, melle be dobgu, ar Bab-Dummadse-be-goledi Bab-Dummad be-itosad, be-ome-Elisabet bega mimmi-wargwen-bakoedi, Juanʼye be onugsao. 14 Be mimmi-nikuoedba, be yeer itogoed, be weligwar itogoed, degine, be-mimmi gwalulenonikir, bukidar dulemar egi weligwar itomarmogoed.
15 ”Ar be-mimmide, Bab-Dummad-asabin dule-dummadga guoed. Vino gobosulid, degi, inna-gagbid gobosurbalid. Degine, amba muu-neggi mai, bato Bab-Dummad-Burba-Isligwaled bela-bela nika guoed. 16 Deginbali, we-mimmi gannar Israel-dulemar Bab-Dummad-Jehováʼba-nanamalaga imakoed. 17 Ar be-mimmi-Juan, Elíasʼyobi Dule-Dummad-idu-nadapi guoed. Deyob Bab-Dummad-Burba, degi, Bab-Dummad-gangued-nika guoed. Adi, babgan gannar na e-mimmiganbina itogerba guega, degi, dule-galagwensuli-gudimaladi dule-nueganga imakega, binsaed-nikaa damalaga, degi, guagwar dulemar-urbega, adi, Bab-Dummad-abingamalagar.”
18 Degi, Zacarías baliwiturga sogded:
—Degite we-deyob-guoedi, ¿igi-an wisguosunna? Ar ande seredgusad, an-omede bato seredgusmogad.
19 Baliwitur abin-imakdegu, ega sogded:
—Ani an Gabriel-gued, Bab-Dummad-asabin, Bab-Dummad-sogedba an ibmar imakega an gwichid. Ani an bega sunmakega, we-gayaburba-nued-sogega an barmilealid. 20 We-ibmar-an-bega-sogsad e-ibagan mosale, we deyob gunonikoed. Emide, be an-bengussoggu, geg bar sunmake be guoed. Be-mimmi-gwalulesad-sorba, geb be gannar sunna sunmake gunonibaloed.
21 Ar dulemardi, magaba Zacarías edarbebukmalad. Degi, ibiga Zacarías dikasurgus Bab-dummadse-goled-neg-islidikidyaba yoggumaiye binsaarmalad.
22 Zacarías agi noargu, geg emarga sunmake gusad. Agi magar daksamalad, we, Bab-Dummadse-Goled-Neg-Islidikidgi wis ibya-apurus danikirgebye. Zacarías dulemarga sunmaksasulid, unnila argangi-oyogar emarga sunmaksad.
23 Geb Zacarías, dule-irwa-Bab-Dummadse-goled-ibmar-imaked bergusgu, na e-negse nadsunnad. 24 Geb a-ibagan-sorbali, e-ome-Elisabet gurgin-nika gunonikid. Agine, Elisabet nii-walatar bar nossulid. Agi sokalid: 25 “Bab-Dummad angi nabir binsanonikid. An mimmi-niksulidba dulemar-mer-bar-isdar-an-dakmalaga, aga anga mimmi-uknonikid.”
Baliwitur Maríaʼga sognonikid, Jesús gwalulegoye
26 Elisabet nii-walanergwagus (6) bonigwar gudiidgi, Bab-Dummadi, Galilea-yarse, Nazaret-neggweburse, yagwa-gwensak Maríaʼye-nugadse baliwitur-Gabriel-barmialid. 27 A-yagwade, na Joséʼye-nugad-ebo-nikuega bato igar-nabogar gudiid. Joséʼde Rey-David-wagwad. 28 Baliwitur María-maidse dognonigu, ega sognonikid:
—¡Naa, degite! ¡Bab-Dummad begi nued binsasad! Bab-Dummad beba gudiguad. Baigan-omeganba Bab-Dummad bur nued begi binsasad.
29 Maríaʼdi baliwitur-dakargu, ibmar-ega-sogedba dobe-itoded, binsaded, wede, baliwitur weyob anse gornonikid ibi obarsunye. 30 Degi, baliwitur ega sogdesunnad:
—María, mer be dobgu, ar Bab-Dummad nabir begi binsasad. 31 Emigindi, be gurgin-nika gunonikoed, mimmi-gwensak be nikuoed, Jesúsʼye a-mimmi be onugsaoed. 32 We-mimmide dule-dummadga guoed, Bab-Dummad-Bur-Birigined-e-Machiye soglegoed, degine, Bab-Dummad, igi epenne Rey-David, reyga-mesisgusa, deyobi Bab-Dummadi Rey-David-e-wagwa-imakmogoed. 33 Degine, we-Jesús, Jacob-dulemar-negsemai degisadegu guoed. E-negsemai-guoedi gwen berguosulid.
34 Geb degi, María, baliwiturga sogded:
—¿Ar wede igi guosunna? Ar amba an yagwad.
35 Baliwitur, Maríaʼga sogded:
—Bab-Dummad-Burba-Isligwaled begi aidenonikoed. Bab-Dummad-Bur-Birigined-e-gangued be-edunonikoed. Degisoggu, Dule-gwage-islidikid-gwalulegoedi, Bab-Dummad-Machiye soglenonikoed. 36 Degine, be-gwenad-Elisabet, bato seredgusadgi, geg mimmi-bakye-enik sogmaladi a-bela gurgin-nika gunonikid. Emide, nii-walanergwagus (6) gurgin-nika gudiid. 37 Ar ade, Bab-Dummadgardi ibmar-geg-gudeeye soglesulid, bela ega ibmar guedbiid.
38 Geb degi, María sogdesunnad:
—Andi, Bab-Dummad-e-mai gued. Be-sogedba be anga imakdo.
Degi, baliwitur, Maríaʼgi banguded.
2b. Juan-Bautista-gwalulesad
(1:39-80)
María, Elisabetʼse atakapid
39 A-ibagangi, María, Judea-yalaganba neggwebur-gwagwense gwae nade gusad. 40 Zacarías-negse dogdapgu, Elisabetʼse gordapid. 41 Elisabet, María-ese-gole-itosgu, dule-e-sapi-dukugi-maid ber dulagwar itoded. Degi, Elisabet bela-bela Bab-Dummad-Burba-Isligwaled-nika gunonikid. 42 Elisabet binnasur goted, sogded:
—Baigan-omeganba bur nued Bab-Dummad begi binsasad, be-dula-sapi-dukugi-maidgi bur-nued binsasbalid. 43 Ar wede, ¿ibiga weyob angi nued binsalesa, emide, an-Dummad-e-nan anse ataknonigu?
44 ”Be anse gornonikid-itodeyalaba, an-sapi-dukugi-maid weligwar-itogedba ber dulagwar itoded. 45 Be we-ibmar bengussulidba begi nued-binsalesad. Ar Bab-Dummad-bega-ibmar-sogsadba we-ibmar bela bega guoed.”
María-namaksad
46 Geb degi, María, sogdemogad:
“An-ulub-akar Bab-Dummad-nug an odummosun.
47 An-burba, Bab-Dummad-an-abonogedgi weligwar itosun.
48 An e-mai-bundor-binsaled-inigwele, Bab-Dummad an-sunonikid,
nued angi binsanonikid,
emigindi, bela dulemar angi sogmaloed,
nued-egi-binsalesad-duleye.
49 Bab-Dummad-Bela-Gangued-Nikadi, anga ibmar-dummagan imaksad,
e-nug, Isligwaledye nugad.
50 Bab-Dummad dulemar-e-dobee-nanadimalad wile daked,
degine, a-e-waganse-bakar, wiledakdii sadeguoed.
51 Bab-Dummadi, e-gangued na e-arbaedgi oyosad,
dulemar-na-san-dummarba-imakdimalad-osulosad.
52 Bab-Dummadi, dule-dummagan-negsemamaid-obelosad.
Dulemar-na-san-bipi-imakdimalad-odummosad.
53 Degine, dulemar-ukumesdimaladga ibmar-bukidar uksad.
Degine, dulemar-mani-ibgan, ibmar-sate barmisad.
54 Bab-Dummadi, e-mai-Israel-dulamar-bendaksad,
amar-wile-daked gwen iessulid.
55 Bab-Dummadi deyob anmar-dad-Abrahamʼga sogsad,
degi, e-waganga sogsagusad,
e-wiledaked degisadeguoye.”
56 María, Elisabet-walik nii-walapaa megialid, geb a-sorba María, na e-negse gannar aligusad.
Diigi-dule-oged-Juan-gwalulesad
57 Elisabet e-ibagan warmaknonigu, mimmi-nikunonikid, susugwa ega uklenonikid. 58 E-neg-dikarba-mamaid, degine, e-gwenadgan itoarmargu, Bab-Dummad Elisabetʼgi nabir binsasye, degi, nue wile daksaye, Elisabetʼba wergusmarmogad.
59 Geb ibabaabakgine (8), susugwa-gwalulesad-sorba, e-abgan-uka-duku-sikega, Moisés-Igar-Maidba-imakega, senonimalad. Degine, e-bab-Zacaríasʼba mimmi-nug-imakbiguarmalad. 60 Ar e-nandi, weyob sokalid:
—Suli. Deyob-nugguosuli. Juanʼye nugguoe.
61 Elisabetʼga sogdemalad:
—¿Ibiga deyob be onugsabie? Ar be-gwenadgande deyob nugsurmalad.
62 Geb e-babse argangi-sunmakar egichiarmalad, goe igi-onugsaoye.
63 Zacarías urgo-bipigwa egichisad, agi susugwa-nug narmaksad. Juanʼye nugguoye sogsad. Bukmaladi bela geger itoarmalad, wede ibiga deyob onugsabie. 64 Geb a-gines, Zacarías gannar nabir sunmakded. E-gwabin-bipinmakdegu, Bab-Dummad-nug ogannoded.
65 Bela-e-neg-dikarba-mamaid dobe itonadmalad. Bela Judea-yalaganba we-ibmar-deyob-gusadi gaya mimileded. 66 Ar dulemar deyob bela-we-gayagan-itoarmalale, na e-gwagegi binsadmalad, sogdemalad: “Ar we-mimmide, ¿doa-dulega guosunna?” Ar dulemar bela wismalad, we-mimmibali Bab-Dummad-gangued gudii.
Zacarías, ibmar-guoed sogsad
67 Juan-e-bab-Zacarías, Bab-Dummad-Burba-Isligwaled bela-bela nika gunonikid. Bab-Dummad-nuggi sunmakdesunnad, sogded:
68 “Israel-dulemar-e-Bab-Dummad-nug odummomarsun,
ar ade, e-dulamarse na ataknonikid,
degine, isguedgine, e-dulamar-onononikid.
69 Bab-Dummadi, e-mai-David-wagwa anmarga barmialid.
Bab-Dummadi, anmar-Abonoged-gandikid anmarga ogwisnonikid.
70 Ar igi gebesaila anmarga e-gayaburba-barsogmalad-islidikmaladba-sunmaksa,
deyob gusad.
71 Isdar-anmar-dakdimaladgi, degi, sae-anmar-dakdimaladgi
anmar-bendakoye sogsad.
72 Adi, Bab-Dummad anmar-babgan wile dakegar.
Degine, amar-ebo-igar-islidik-mesisad ebinsaegar.
73 Bab-Dummad na e-nuggi anmar-dad-Abraham-ebo
napiragwadgi igar-mesisadi,
ede, imakedseye sogsad.
74 Bab-Dummadi isdar-anmar-dakdimaladgi anmar-onogoye sogsad,
adi, dobsuli anmar ega arbaegar.
75 Bab-Dummadga nue-gwage-islidikidgi, degi, nue-napiragwadgi
burgwedse anmar ega arbadii guegar.
76 ”Mimmi, bedina,
Bab-Dummad-Bur-Dummad-e-gayaburba-barsogedye be bilegoed.
Ar bede, Dule-Dummad-barmiledagoye-sogsad-idu, igar-mayega nadapi guoed.
77 Be abonoged-igargi e-neggwebur-odurdakega be guoed.
Adi, Bab-Dummad dulemarga isgumalad-eliegar.
78 Ar anmar-Bab-Dummadi ise-wile-anmar-dakedba, neg-meegwadyob anmarga dule-barmialid.
A-dule, nibneg-akale, dad-nakwedanikiyobi danikid.
79 Adi, negsichidgi-bukmalayobid, Bab-Dummad-akudakmalad, gwallu-mee-imaklegeyobi,
Bab-Dummad-magar dakegar.
Degi, dule burgwileged-dobmalad ega osulogegar.
Degine, igar-bogidikidba anmar-niegar.”
80 Degine, mimmi dungumai, e-burba gangumai gusad. Juan, Israel-dulemarga Bab-Igargi-sunmakdedse nega-dulesulidganba gudii gusad.