91
91-küy •••• Xudaning herxil yamanliqtin, jin-sheytanlardin qoghdishi
1 Eng Aliy Bolghuchining mexpiy jayida turghuchi,
Hemmige qadirning sayiside aramxuda yashaydu.
2 Men Perwerdigarni: —
«Méning bashpanahim, Méning qorghinim;
Méning Xudayim, Uninggha tayinimen» — deymen.
3 Berheq, U qiltaqchining toziqidin séni qutulduridu,
Shum waba-qazadin hem xalas étidu.■ Zeb. 124:7
4 U peyliri bilen séni yapidu;
Qanatliri astida panah tapisen;
Uning heqiqiti sanga qalqan hem istihkamdur.■ Zeb. 57:1
5 Sen ne kéchidiki wehimidin,
Ne kündüzi uchuwatqan oqtin,■ Ayup 5:19,20; Pend. 3:25; Küy. 3:8
6 Ne qarangghuluqta kezgüchi wabadin,
Ne chüsh waqtida weyranchiliq qilghuchi halakettin qorqmaysen.
7 Séning yéningda mingi yiqilip,
Ong yéqingda on mingi ghulap chüshsimu,
Lékin bala-qaza sanga yéqinlashmaydu.
8 Sen peqet közliring bilen béqip,
Pasiqlargha bérilgen jazani körisen.
9 Perwerdigarni panahim dep bilgining üchün,
Hemmidin Aliy Bolghuchini makan qilghining üchün,
10 Béshinggha héch palaket chüshmeydu,
Héch waba chédiringgha yéqinlashmaydu.
11 U Öz perishtilirige séning heqqingde emr qilidu,
Shuning bilen ular pütkül yolliringda séni saqlaydu.■ Zeb. 34:7; Mat. 4:6; Luqa 4:10
12 Ayighing tashqa urulup ketmesliki üchün,
Ular séni qollirida kötürüp yüridu.■ Luqa 4:11
13 Shir we kobra yilan üstidin bésip ötisen,
Arslan we ejdihani dessep-cheyleysen.■ Ayup 5:22,23
14 «U Manga muhebbitini baghlighanliqi üchün,
Men uni qutuldurimen;
U namimni ten alghini üchün yuqirida saqlaymen.
15 U Manga nida qilidu, Men uninggha jawab bérimen;
Éghir kün uni basqanda uning bilen bille bolimen;
Men uni xalas qilip, izzet-hörmetke sazawer qilimen.
16 Uzaq ömür bilen uni qandurimen,
Hem nijatliqimni uninggha körsitimen».