1 O amac nucac, aŋô ŋoc biŋ

ma amac lau gamêŋ jaêcŋaac, akêŋ taŋem.

Apômtau kêkalem aê gêdêŋ tinoc kêkôc aê atomgeŋ.

Eŋ gê aêŋoc ŋaê aŋga tinoc têtaclêlôm.

2 Eŋ gêgôm aocsuŋ ŋamata amboac bôjaŋ

ma kêsiŋ aê gamoa nê lêma ŋalabu.

Eŋ gêgôm aê katu sôb ŋawanic sawa teŋ

ma kêsiŋ aê ôkwi kasêp nê atali sôbŋa ŋalêlôm.

3 Eŋ kêsôm gêdêŋ aê gebe “Ŋoc sakiŋwaga aôm, Israel,

aôm oc ôwaka ŋoc waec sa.”

4 Mago aê kasôm gebe “Aê gaim tauc su

ma kajaiŋ ŋoc ŋaclai ŋaômageŋ.

Mago ŋoc biŋgêdêŋ gêc Apômtauŋa

ma ŋoc ŋaôli gêc ŋoc Anôtôŋa.”

5 Ma galoc Apômtau, taŋ kêmasaŋ aê aŋga tinoc têtaclêlôm,

gabe jatu ênê sakiŋwaga naŋ, kêsôm gebe

Jakôc Jakob êmu êndêŋ eŋ êna êtiam

ma Israel sênac tauŋ sa sêndêŋ eŋ sêna.

Tec Apômtau ketoc aê sa

ma ŋoc Anôtô kêtu ŋoc ŋaclai ŋam.

6 Eŋ kêsôm gebe “Aôm kôtu ŋoc sakiŋwaga

gebe ômboa Jakobnê gôlôac sa

ma ôkôc Israelnêŋ lau ŋapopoc sêmu sêmêŋ êtiam necgeŋ atom,

aê oc jakêŋ aôm ôtu tenteŋlatunêŋ ja amboac tonaŋgeŋ

gebe ŋoc moasiŋ janam lau kêsiŋa naêndêŋ nom ŋamadiŋ.”

7 Biŋ tonec Apômtau, Israelnê kêsiwaga ma nê ŋac dabuŋ

kêsôm gêdêŋ eŋ, taŋ lau sêsu eŋ susu ma tenteŋlatu sedec eŋ

ma gôliŋwaga sêlic eŋ kêtu gêŋôma naŋ, gebe

“Kiŋ oc sêlic aôm ma dêndi sa êtu aôm ŋa

ma kasêga oc sêpôŋ aeŋduc êndêŋ aôm

êtu Apômtau ŋaŋêŋ, taŋ kêtu Israelnê ŋac dabuŋ

ma kêjaliŋ aôm sa naŋŋa.”

“Aê kakêŋ taŋoc aôm gêdêŋ têm moasiŋŋa

ma gajam aôm sa gêdêŋ bêc gajam lau kêsiŋa.

Aê gajob aôm ma kakêŋ aôm kôtu poac gêdêŋ lau,

gebe jamboa nêŋ gamêŋ sa êtiam

ma janac sam nêŋ nomlênsêm, taŋ kêtu gasaŋ naŋ.

9 Tec jasôm êndêŋ lau kapoacwalôŋa gebe ‘Asa amêŋ,’

ma êndêŋ êsêac, taŋ sêŋgôŋ ŋakesec ŋalêlôm naŋ, gebe

‘Asa awê amêŋ.’

Êsêac oc têtap nêŋ mo sa aŋga intêna

to sêlôm tauŋ aŋga lôc kwalam.

10 Mo to bu oc êjô êsêac atom

ma mu ŋandaŋ to oc oc êpac êsêac atom

gebe ŋac, taŋ taê walô êsêac naŋ, oc ejoŋ êsêac

ma êwê êsêac sêndêŋ bumata.

11 Aê oc jaŋgôm ŋoc lôc samob êtu intêna

ma jamansaŋ intênasêga samob êtu solop.

12 Alic acgom, lau ŋagêdô oc sêmêŋ aŋga jaêc

ma ŋagêdô aŋga nodo to aŋga oc kêsêpŋa

ma ŋagêdô aŋga gamêŋ Siene.”

13 O undambêac, anam lasê. O nom, ŋaôndu êpi.

O lôcac, lasê êtaŋ

gebe Apômtau gêjac nê lau têntac tôŋ

ma taê walô nê lau, taŋ sêôc wapac naŋ.

14 Mago Sion kêsôm gebe “Apômtau gêwi aê siŋ,

ŋoc Apômtau kêliŋ aê siŋ.”

15 “Awê teŋ oc êtôm gebe êliŋ nê gêŋ dedec siŋ

ma taê walô nê têtaclêlôm ŋaŋanô atom me.

Ma embe êliŋ siŋ, naŋ aê oc jaliŋ aôm siŋ atomgoc.

16 Ôlic acgom, aê gajac bô nêm ŋaê gêc lemoc tapa,

nêm tuŋbôm kêkô aê laŋôcnêm ŋapaŋ.

17 Nêm lau-sêkwê-aôm-sawaga sêlêtigeŋ sêmêŋ

ma êsêac, taŋ seseŋ aôm su to sêgôm aôm kôtu gasaŋ naŋ, sêc sêja.

18 Oc matamanô sa ma ôlic.

Êsêac samob sêkac tauŋ sa dêdêŋ aôm sêmêŋ.”

Apômtau kêsôm gebe “Aê jasôm êtu tôŋ gebe

aôm oc ônam êsêac samob sa êtu nêm gêlôŋ

ma ôjandiŋ êsêac amboac awê gebe ênam ŋacŋa kêjandiŋ nê ômbiŋkap.

19 “Biŋŋanô, nêm malac gasaŋ to ŋaalê katuc

ma nêm gamêŋ, taŋ lau seseŋ su naŋ,

oc êtu sauŋ-sauŋ êtu nêm lauŋa

ma êsêac, taŋ seseŋ aôm su naŋ, sêc su jaêcgeŋ sêja.

20 Nêm gôlôac, taŋ kôkôc gêdêŋ gôŋgôŋ toŋalêlôm ŋawapacgeŋ naŋ,

oc sêsôm êsô taŋamsuŋ gebe

‘Gamêŋ tonec e kêtu sauŋ-sauŋ ma kêtôm aê atom,

ôŋgôm ŋasawa êtu kapôêŋ gebe êtôm aê jaŋgôŋŋa.’

21 Ma aôm oc ôsôm êndêŋ taôm gebe

‘Asa kêkôc gôlôac tonec.

Aê awê kapoac ma ŋoc ŋapalê masi.

Êsêac sêkêŋ aê gaŋgôŋ kapoacwalô aŋga gamêŋ jaêc

ma lau tonec asa gêlôm êsêac,

sêwi aê siŋ gamoa tauŋa,

tec lau tonec sêmêŋ aŋga ondoc.’ ”

22 Apômtau Anôtô kêsôm biŋ tonec gebe

“Alic acgom, aê oc jaôc lemoc sa êndêŋ lau samuc

ma oc jakêŋ puc êndêŋ lau tomôkê-tomôkê

ma êsêac oc sêsip nêm latômi tamiŋ bôŋdagi

ma sêkuc nêm latômio sêŋgôŋ magiŋm ŋaô sêmêŋ.

23 Ma kiŋ oc têtu tamemi sêpô mo amacŋa,

ma nêŋ kwin oc sêlôm amac têtôm tenemi.

Êsêac oc sêpôŋ aeŋduc êndêŋ amac laŋôŋanô êsêp nomgeŋ

ma oc sêlêsôp kekop aŋga emkaiŋ.

Go amac ajala gebe aê Apômtau.

Ma êsêac, taŋ sêôŋ aê naŋ, oc majeŋ êsa atom.”

24 Lau têtôm gebe sêjaŋgo ŋactêkwanê waba su me.

Êsêac têtôm gebe sênam gôliŋ-waganê lau kapoacwalôŋa kêsi me.

25 Mago Apômtau kêsôm biŋ tonec gebe

“Aê oc janam ŋactêkwanê lau kapoacwalôŋa kêsi

ma jajaŋgo gôliŋwaganê waba su.

Aê oc janac siŋ êndêŋ êsêac, taŋ sêjac aôm naŋ,

ma janam nêm gôlôac wakuc kêsi.

26 Êsêac taŋ sêkôniŋ aôm naŋ, oc jakêŋ êsêac sêniŋ tauŋ nêŋ ŋamêsôm

to sênôm tauŋ nêŋ dec e êjaŋiŋ êsêac êtôm wain kêjaŋiŋ lau.

Go ŋamalac pebeŋ sêjala gebe aê Apômtau, Jakobnê ŋaclai,

nêm kêsiwaga to nêm gêjam-sawaga.”