2
Hodáay bádsháha kayt, pádáni kapét
1 Á dega kawm pa ché shóresha kanant o
ráj chiá mopt o náhudagén pandala* 2:1 Pandal, bezán repk, mandr, makr. sázant?
2 Jahánay bádsháh tayára bant o hákem yakjáh mocch,
Hodáwand o áiay Masihay helápá óshtant:
3 “Byáét tán áyáni sád o bandán beborrén o zamzilánesh besendén.”
4 Hodáwand ke ásmáná bádsháhia kant kandit o
áyán maskará kant.
5 Á wahdá wati hezhmay tahá gón áyán habara kant,
wati gazabay tahá áyána torsénit:
6 “Man wati bádsháh, wati pák o gechénién kóh, Sahyunay sará nendáréntag.”
7 Nun Hodáwanday hokmá darshána kanán ke maná gwashti:
“Taw mani Bacch ay, maróchi man tará pédá kortag.
8 Cha man belóth tán kawmán tai mirás bekanán o
zeminay chárén kondháni ráján tai sawgát.
9 Gón ásenén asáé áyán prósha dayay o
kunzagáni paymá hurt hurtesha kanay.”
10 Paméshká, oo bádsháhán! Aglmand bebét.
Anchosh oo jahánay hákemán! Adab bezurét.
11 Pa tors, Hodáwanday hezmatá bekanét o
pa drahag pádáni kapét.
12 Chokká bechokkét chó mabit ke zahr begipt o
shomá ráhay némá gár o bégwáh bebét,
chiá ke á anágat bránza gipt.
Bahtáwar hamá ant ke áiay mayár o báhótha bant.