13
धुर वास्न्या घर्ती
(मर्कूस ४:१-९; लूका ८:४-८)
1 हो छ्याम येसु नो झ़िमनी पुलुस्द दह छ्योक बाद च़ुसिद उलिज़्याक, 2 ल्यो माल्यो मिँर ओल्योक छुइसिहुकेर। है जैद येसु दोङ्गाल च़ुसिद दोङ्गालाई ऱील छ्यावा होकसै लाँक्यो। माहोल्या भरी ओङ़ाक दह छ्योक च्याँःसिकेर। 3 येसुए नोरालाई ओपाँ घर्ती झाःद यासथैक्यो। तोबो ओरासथैव आव ज़, “तोबो मिँ ओएँःल धुर वास्ना बाके दी। 4 धुर ओवास्ज़्याक ख्वा येम जीदा परिके दी। नो येमलाव परिउ बाज़ाराए ज़्युकेर दी। 5 ख्वा धुर गम छ्या छ्या ल्यो ओदादरत परिके दी। नत गम छ्या छ्या वाज़ ल्यो ओतावए हतप्त ज़ परीके दी। 6 खाली निमी ओसोराक उहुवत ओजरा नाम जींल ओमाल्योए च्याकराप चिकुरूप थँके दी। 7 फरी ख्वा धुर ज़ुर ऱमराए खार्ल परिके दी। नोलाई ज़ुर ऱमराए गाल्क्यो दी। 8 फरी ख्वा धुर ते चाव गमस्याल परिके दी। नो ओसै बनै झाःद ख्वात तीस, ख्वात साथी, ख्वात सय दोबोर यासै झाःकेर दी। 9 आव पाँ जोए थैन्या उयुँ लिज़्या, चावस ओथैवक।”
थैज़्यावत ब मातीधुर
(मर्कूस ४:१०-१२; लूका ८:९-१०)
10 येसुए उसिसर ओल्योक हुद, “काराव मिँरालाई घर्ती झाःद वाज़ नरासथैज़्याव?” है यादोक ते, 11 येसुए, “जेलाई वाज़ स्वर्गताव राज्यालाव कप्सिउ पाँर छर्लङ्ग सतैंसिउ लिज़्या, उपुर्कावरालाई ते म़ोंसिउ मिताव लिज़्या। 12 है जैद जोए परमेस्वरए ओपाँ रैद नैव, होए झन ज़ तीधुन्या ले। जोए परमेस्वरए ओपाँ माभैंःए, होए ओरैव ब ओपो·स ज़ म़ान्या ले। 13 होए उजूँनी ज़ घर्ती झाःद ङारासथैज़्याव। नोराए रँःज़्यावत ब मारँःधुर, थैज़्यावत ब मातीधुर। 14 नितावराए जूँनी ङ़ादा ज़ यसैयाए धर्मसास्त्रल अइ लिद सर्द नैद यायो,
‘थैन्या ते जेथैज़्या, जेमातीधुइ।
रँःन्या ते जेरँःज़्या, जेमासरेस्धुइ।
15 आवराए यायुँ काता ज़ मातीधुन्या भुत्यासो ताद ले।
यार्ना ब सूइसिउ मिताव ताद ले।
यामी ब च़िम जैद यानैज़्याव मिताव लिज़्या।
निताव यामाताव ताकिन आः झरी यामीए रँःधुखेरहो,
यार्नाए थैधुखेरहो,
यायुँल तीधुखेरहो।
ङाल्योदा यायुँ ते फर्कैधुखेरहो।
सोजोकावर ब ङाराजैधुखेहो।’ 13:14-15 यसै ६:९-१०
16 जे ते परमेस्वर दाइनो तावर जेलिज़्या, जेमीए ब जेरँःधुज़्या, जेर्नाए ब जेथैधुज़्या। 17 जेलाई साचो है ङादाचिज़्या, अगमबक्तार, घेप्पा धर्मी मिँराए ब आव जे जेरँःव पाँर रँःन्याए जूँनी यायुँ थू जैद ब रँःव मादैकेर, थैन्या युँ दाद ब थैव मादैकेर।”
धुर वास्सिउ घर्तीए ओअर्थ
(मर्कूस ४:१३-२०; लूका ८:११-१५)
18 “है जैद जे नो धुर वास्सिउ घर्तीए ओअर्थ थैचिके। 19 जोए परमेस्वरए ओराज्यालाव पाँ थैद ओमाबुझिधुकिन, सैतान ओल्योक हुद उयुँलाव वास्सिउ पाँ भरी स्याप सिप जैद लाँदिज़्याव। नो ज़ नो येमलाव परिउ धुर। 20 फरी नो ओदादरताव परिउ आव ज़, जोए परमेस्वरए ओपाँ थैद बेहार ज़ तीद खुसी ब ताज़्या। 21 खाली नो मिँ परमेस्वरए ओपाँत उयुँल ओजरा माल्यो मिताव ओतावए नो पाँ छ्यावा पै वाज़ रहिज़्या। नो पाँनी नोए ओक्याँत खिरीर उपसिकिन दुखर ओदैकिन नो पाँत उयुँ क़्याज़्या। 22 फरी नो ज़ुर ऱमराए खार्लाव परिउ धुर आव ज़, जोए परमेस्वरए ओपाँ ते थैज़्याव, खाली धन सम्पतीदा उयुँ थू जैद ‘आव ङाजिउत कै तान्या ओताव’ लिद व़ीनी फुइ ब लिज़्या। है जैद नितावराए परमेस्वरए ओपाँलाई यागालोए नो पाँ ओसै माझाःज़्याव ताज़्या। 23 फरी नो चाव गमस्याल परिउ धुर आव ज़, जो मिँए परमेस्वरए ओपाँ थैद चावस उतीकिन नो मिँ परमेस्वरए ओराज्याल ख्वात तीस, ख्वात साथी, ख्वात सय दोबोर ओसै झाःज़्याव धुर स्यासो ज़ ताज़्या।”
ताम खार्ल खु वास्सिउ घर्ती
24 नकिन येसुए फरी तोबो घर्ती झाःद अइ लिद यासथैक्यो, “स्वर्गताव राज्या किताव उलिज़्याव लिक ते, तोबो मिँए ओएँःल बनै चाव धुर ओवासो मिताव लिज़्या। 25 नो ओवासोत तछा रील ओल स्याँद उलिज़्याक उसुतुर हुद ओएँःलाव ओवासो धुर खार्ल खु वास्द ख्यानैदिक्यो दी। 26 छींनी नो धुर परीद ओबालार ओझाःवत नल खुर ब रैंःकेर दी। 27 नो एँःए ओर्गेए ओय़ेन दाज़्यावर याघरपतीए ल्योक हुद, ‘आव नएँःल ते चाव धुर वाज़ नवास्ज़्याव सानी, आव खुर कातानी याहुव ओताव?’ है यादोक ते, 28 नो याघरपतीए, ‘काताकाव ङासुतुर हुद खु ओवासो ताखेहो,’ है यादोक्यो दी। ओय़ेन दाज़्यावराए फरी, ‘कै नलिज़्या? नो खुर गेराखुल्कैना रो?’ है यादोक ते, 29 ‘खुल्कैन्या माःक, नोलाई जेखुल्कैक कसाराक तामर ब जेराखुल्कैया। 30 क्या·न्या बेला ओमातावा पै निताव ज़ घलिज़्याक, सिप सिप ज़ घमींःरक। यामींःवत क्या·ना बाज़्यावरालाई ङ़ादा खु भरी खुल्कैव परींद पोला पोला जैद मेंःल म़ुव ङारापरींरिज़्या। ताम भरिलाई ते सिम्द दहरा बुमल झाःव ङारापरींरिज़्या,’ है यादोक्यो दी।”
बाजीए उधुर स़ोनो भरेस सोगोइन्या वासः
(मर्कूस ४:३०-३४; लूका १३:१८-२१)
31 नकिन येसुए फरी तोबो घर्तीनी अइ लिद यासथैक्यो, “स्वर्गताव राज्या तोबो मिँए बाजीए उधुर बारील ओझाःव मिताव लिज़्या। 32 नो धुर प़ाइँरानी तकेज़ा ओतादी ब, परीद ओघ्योःवत नो बारीलाव ङ़ैंराकिन प़ाइँरानी घेप्पा ताद नोए ओखारत नमताव भुर्ज़्याव बाज़ार सिपर जैद बासिज़्यार।* 13:32 मर्क ४:३०-३२ चिऊन्या।
33 “हिताव ज़ फरी स्वर्गताव राज्या भरेस सोगोइन्या वासः स्यासो ब लिज़्या। सोंःसेमे मुछिसिउ कनेल तोचोप झाःदी ब प़ाइँ सरालिज़्याव।”
34 येसुए माहोल्यारालाई ओपाँ ओरासथैक घर्ती ओमाझाःवा पै ओमारासथैज़्याव। 35 ननी ज़ अगमबक्ताए धर्मसास्त्रलाव ओसरो यो·के। नोए ओसरो आव ज़,
“ङापाँ भरी घर्तीर झाःद ङारासथैरिज़्या।
नाम नम ओतावकिनकाव कप्सिउ पाँर ब सतैंद्यान्या ङाले।” 13:35 भज ७८:२
ताम खार्लाव खुए ओअर्थ
36 नकिन येसुए नो माहोल्यारालाई ख्यानैद झ़िमल बाके। उसिसर ओल्योक हुद, “गुर्बा, नो आछ्याकाव नझाःव एँःलाव खुए ओअर्थ गेलाई पलास्द्याव ताके,” है यादोक ते, 37 येसुए, “नो चाव धुर वास्ना बाज़्याव मिँ मिन्सिउ ख्रीस ज़। 38 एँः आव मानुवा ज़। नो चाव धुर परमेस्वरए ओराज्यालाव मिँर ज़। नो खु फरी, सैतानए उमींर ज़। 39 नो खु वास्ज़्याव उसुतुर ओल सैतान ज़। नो क्या·न्या बेला आव जुक खेम्न्या बेला ज़। नो क्या·ना बाज़्यावर परमेस्वरए ओचाकर्यार ज़। 40 किताव नो एँःए ओर्गेए खु भरी खुल्कैद मेंःल म़ुज़्याव, हिताव ज़ आव जुक ओखेमोत, 41 ङा मिँ मिन्सिद हुवए स्वर्गताव ङाचाकर्यारालाई ङारापरींरिज़्या। नोराए बले·ज़्यावर, अधर्म दाज़्यावरालाई दुप्द परमेस्वरए ओराज्यानी पले·द, 42 मेंःए मुल्काल याराख्यारिज़्यार। नल याहार ङर ङर कैद चिर्लनी बिर्ल घर्न्या लेर। 43 धर्मी भरी ते परमेस्वर याबाबुए ओराज्याल निमी मिताव झ़ार झ़ारोर तारिज़्यार। आव पाँ जोए थैन्या उयुँ लिज़्या, चावस ओथैवक।”
एँःल गादैसिउ गदान्त
44 “फरी, स्वर्गताव राज्या तोबो एँःल गादैसिउ गदान्त मिताव ब लिज़्या। नोलाई तोबो मिँए ओदैकिन नो एँःए ओएः ओमासुदुमा पै पाखात मापले·द नल ज़ नैज़्याव। नो बनै रेंए रेंए उझ़िमदा बाद ओलसकाव लिज़्याव भरी यो·द नो गदान्त ल्यो एँःलाई लँःज़्याव।”
असली हिरामुती
45 “फरी, स्वर्गताव राज्या तोबो बेपारीए असली हिरामुती उखिम्ज़्याव मिताव लिज़्या। 46 नोए बनै ओएः ल्यो ओदैकिन ओलसकाव लिज़्याव भरी यो·द तादी ब लँःज़्याव।”
जाल रैःसिन्या घर्ती
47 “फरी, स्वर्गताव राज्या तोबो जाल रैःसिज़्यावए दहल जाल ओख्याव मिताव लिज़्या। नो ओजाल ओस़ेल्क चाव माचाव ङाँः भरी स्याप सिप जैद यारैज़्याव। 48 नो जाल दहनी ओहाइवत च़ुसिद चाव भरी ओजाल झाःद माचाव भरी याख्याज़्याव। 49 आव जुक खेम्न्या बेला ब हिताव ज़ तारिज़्या। परमेस्वरए ओचाकर्यार हुद धर्मीराए खार्लाव लिज़्याव पापीरालाई स़ेल्द, 50 मेंःए मुल्काल याराख्यारिज़्यार। नल याहार ङर ङर कैद चिर्लनी बिर्ल घर्न्या लेर।”
51 नकिन येसुए उसिसरालाई, “आव ङापाँव भरी जेमातीया?” है ओरादोक ते, “गेतीके,” है दोकेर। 52 येसुए फरी, “चाव ताके। धर्मसास्त्रलाव पाँ सैंज़्याव सास्त्री स्वर्गताव राज्यालाव पाँर ब उसिऊसिकिन तोबो बनै धनी मिँ स्यासो ताज़्या। नोए उझ़िमनी बनै याएः ल्योर, साःरोर पुराँदोर पुलुस्न्या लेर।”
येसुलाई ओमान नैद यामायो
(मर्कूस ६:१-६; लूका ४:१६-३०)
53 येसुए आव घर्तीलाव ओपाँ भरी तुपैद ननी पुलुस्द, 54 ओल ओनाखारल बाद नलाव धर्मसास्त्र झ़िमल ब परमेस्वरए ओपाँ यासथैक्यो। नलावर येसुए ओपाँ थैद अचम्ब ताद, “आवए इताव ग्यानर, अचम्बलाव सक्तीर कातानी ओरैव? 55 काता, आव नो सीं त़ुज़्यावए ओज़ा माःक रो? आवए ओआमा ब गेसकाव लिज़्याव मरियम ज़ सानी। ओभाइर ब याकूब, योसेफ, सिमोन, यहूदार ज़ सानी। 56 ओबैंनीर ब गेस ज़ लिज़्यार सानी। नितावए इताव पाँर कातानी ओरैव ओताव?” है लिद, 57 जाँ सोव माँःती जैकेर। येसुए नो यापाँ सैंद, “अगमबक्तालाई ओल ओनाखारलावर स़ोनो ओक्याँदाङावराए वाज़ ओमान नैद माएर, उपुर्कावराए ते नैदिज़्यार,” है यादोक्यो। 58 नोर येसुलाई यायुँ ओमाहुबोए नल अचम्बलाव ओय़ेनर कोसै मादोक्यो।