20
Jeremías, dule-Pasurʼye-nugad-seledoedgi sunmaksad
1 Dule-irwa-Bab-Dummadse-goled-Pasur Bab-Jehováʼse-goled-neggi dummadga-gudiid. Pasurʼde Imer-machid. Pasur, Jeremías Bab-Dummad-gayaburba-barsoggwichi-itosgua, 2 Jeremías-sarsomalaga dulemar-barmisad. Geb Benjamín-neggwebur-yawagak-biribalid-nagaba, Bab-Dummadse-goled-negmobin sepo-maidgi Jeremías-odosad. 3 A-bangine, Pasur, Jeremías-sepogi-galessiidgi-onosgua, Jeremías ega sogded: “Bab-Jehová bar Pasurʼye be-biosulid, emisgi Magor-Misabibʼye be-bioed. A-sogleged: ‘Gwayed-dummad-neg-naidye.’
4 ”Ar Bab-Jehová weyob soged: ‘Na be dukin gwayed-dummadga guoed, degi, be-aimar-ogwayedga be gubaloed. Be-aimar e-isdarmaladse es-suidgi oburgwilegoed, be-sunnagwad be dakoed. Bela Judá-dulemar, Babilonia-e-reyga an urmakoed, geb a-rey, Babilonia-yarse bemar-sedoed, sulile, es-suidgi be-oburgwemaloed.
5 ” ’Deginbali, be-isdarmaladga an bemar-neggwebur-e-ibmar-nuegan ukoed. Bela be-ibmar-sanmakmaladi, be-ibmar-gargemaladi, degi, bela Judá-dulemar-e-reymar-ibmar-nuegana an ega urmakoed. Bela we-ibmala, atursamaloed, Babilonia-yalase bela sedmaloed. 6 Pasur, bedina, bela-be-negyaginmaladbo, Babilonia-yalase gales be ebipiledmaloed. A-yalagi be burgoed, agine be diglegoed. Be-aimarga be gakansaale ega sunmaksadi, deyob gumarmogoed.’ ”
Jeremías, Bab-Dummad-abin bukib-binsasad
7 Ani Jeremías Bab-Dummadga weyob sogded:
“¡Bab-Jehová, be nue an-binsaed gasad!
¡Nue an bese binsaed galesad!
Ar be anba bur dutusurgusoggu, be angi obichad.
Bela-dulemar angi dodogedbimalad, anga alledibidamalad.
8 An sunmaked-ilibali, unnila an sogdedaed.
¡Belamarye! ¡Ibagan-bulegan daniye!
Agala, be-gayaburba mesagwar-guega an-imaked,
degi, angi-dodolegega an-imaked.
9 An sogdibe: ‘Bar an begi binsaosurye,
bar be-nuggi an sunmakosurye,
aka bur bule be-gayaburba an-ulubgi soo-duurmaksiiyobi naddaed,
an-galamarse-bakale, ebuged.
Aisaar an-sunmaked na bargaye sogdaenad,
degi-inigwele, gege an na bargaed.
10 Dule-bukidar sabsur-uasogagwar-sunmake an itoged.’
Weyob sogmalad: ‘¡Bela gwayed-dummad neg-naiye!’
Weyob sogmarbalid: ‘¡We-dulegi anmar gwisgunamala!
¡Anmar dummaganga barsognamala!’
An-aimar-nueganbela begi-isguega an-imakbimalad,
amarbela weyob sogmalad:
‘Sunna Jeremías anmarse binsaed galeged.
Deyobile, anmar egi obinoed,
anmar buged-mai imakoed.’
11 ”Degi-inigwele, Bab-Jehová, bee be anba gudiid,
bila-onoged-gandikidyob be anba garmakdiid.
Degisoggu, dulemar an-balegindimaladi, angi obinosulid, anse galakumaloed,
igarga guosurmalad, bingedar itomaloed.
Degisadegu, suli-suli-itodii gumaloed,
bipisaale dulemar we-ibmar iegosurmalad.
12 ”Be, Bab-Jehová-Bela-Gangued-Nikadid.
Bedi dule-innikigwad-e-daed balamied.
E-gwage-ulubgi-ibmar-itoged be wisid,
degi, e-binsaed magar be daked.
Degisoggu, be we-dulemar-buged-mai-imakoed-dakega be an-imake.
Ar an-bonigan an bega uksad,
emidi, begi siid.
13 ”¡Bab-Jehová-nuggi be namakmala!
¡E-nug be odummomala!
Ar Bab-Dummad dule-wilemalad abonoged,
dule-isganamar-e-ganguedgi ollorsaed.
14 ”¡Ibiga an we-ibagi gwalulesdibe!
¡Iba-isganaga gusun!
¡Ibiga we-ibagi an-nan an-odesdibe!
¡Iba-isganaga gusun!
15 Dule an-bab-weligwar-imaksadi, deun ega weyob sogsagusgu, susugwa bega uklesye.
¡We-dule iwigusun!
16 We-dule, Bab-Jehová-neggweburmar-sabsur-obelosgusadyob gumosun.
Degi, we-dule, wakdaradbali, neg-oimake itosun,
yorukudbali, dule-bila-onomalad-oimake itosun.
17 ¿Ibiga Bab-Dummad, an sapidukugi-maidgi burgwega an-imaksasuli?
Adi, an burgwar aidesanad.
An-nan anga neg-uanga gusanad.
18 ¡Ibiga an sapibeneggi-maid aidesdibe!
¿Unnila an boniganba-galitogega nonide?
¿Unnila bukib-binsaega an nonide?
¿Unnila emarse bingegudiguega an nonide?”