50
Babilonia-dulemargi-iduakwaa-sunmaklesad
1 Bab-Jehová weyob e-gayaburba-barsoged-Jeremíasʼga Babilonia-yar-Caldea-dulemar-neggwebur-annik soged:
2 “Dulemar be owisogo,
dulemar bela-wisguega be imako.
Dulemar-owisoged-bander be onako,
melle be soggwenad odukuo.
Weyob be sogo:
‘¡Babilonia-yala sulegoed!
¡Bab-dummad-Bel nue-bingedar itogoed!
¡Bab-dummad-Merodac nue-gwakidoed!
E-wilubgan-sobarmaladi, bingedar itomaloed,
e-babyob-imaklemaladi, bela wawanmakdoed.’
3 Dad-nakwed-argan-sapiledsik-bukmaladi egi gwichiguoed,
bela ollobi e-yala nasikoed.
Dulemar, degi, ibmar-durganmar duurmakdemaloed,
dulemar agi bar ambikuosulid.”
4 Bab-Jehová soged:
“A-ibagangine, Israel-dulemar, Judá-dulemar, ise-boale, an-e-Bab-Dummad-guedgi anse abarmakdanimaloed.
5 Ansega egisdanimaloed,
bia Siónʼse-naed-igar maiye.
Ar a-igarbali nadapi gumaloed.
Siónʼse modapile, anbo igar degisadegu omesmaloed,
a-igar bar iegosurmalad.
6 ”An-dulamar sibad-wawaad-yoggus-gudiiyobi gusmalad.
E-edarbemaladi yogasaar-sesmalayob gusmalad,
igar-oes sapurba-gudiiyobi imaksamalad.
Yala-mulluganba-bipirmakdiiyobi gusmalad,
e-galu-ies-gudimalayobi wilesmalad.
7 E-isdarmalad dakarmalale, obelodamalad,
e-isdarmaladi sokardamalad:
‘Anmargi sisuli.
Ar wemar Bab-Jehováʼgi isgusmalad.
Bab-Dummad ega ibmar ukmainad,
e-dadgan we-Bab-Jehováʼgi ibmar-abdakdii gusmaladinad.’
8 ”Mimmigan, Babiloniaʼgi-gudimalad be ainimar,
we-yalagi be wakinmar.
Sibad-machered, sibad-wawaad-idunadapdaeyobi,
be dulemar-idumar.
9 Ar ani an, Babilonia-idu, dad-nakwed-argan-sapiledsik, neggwebur-dummagan-bukwad gilamaknaid.
Babilonia-yalabina guakwaa bukumaloed,
dad-nakwed-argan-sapiled-akale, Babilonia-yalagi gwichigumaloed.
E-sigumala, sunsogmaladid,
sigu-miledele, nosaa maksurmaladid.”
10 Bab-Jehová soged:
“Babilonia-ibe bela ibmarmar welegoed,
dulemar-ibmar-weemaloedi na yeer itomaloed.
11 ”Bemar, Babilonia-dulemar, an-dulamar-ibe-ibmar-atursamalad,
be weligwar itomar, be wergumar.
Moli-bebe-nikad-sapingwagwadyobi, gagan-ara-aramalad-birgi be gwirmar,
molimar-goleyobi be gormar.
12 Ar bemar-yala, bela mesagwar guoed,
egi be gwalulesmaladi, nue bingedar itogoed.
Bemar-yala napa-negadulesulidga naguoed,
nega-dinnaregedga, degi, bela napabi-nai guoed.
13 An-urwed-ulale, bemar bar-ambikuosulid,
bela swanga naguoed.
Dulemar Babilonia-yalagi-nasmalale, geger dakdamaloed,
nue-oitolesnai dakdamaloed.
14 ”Bemar-sigugi-urwemalad, guagwar be Babilonia-dikarba ambikumar.
Egi be sigu mimar,
melle be sigu sabomalo,
ar we-dulemar angi dummad-isgusmalad.
15 Binnasuli be Babilonia-dikarba gormakmar,
weyob be sogmar:
‘¡Babilonia-sordamar galakude!
¡E-neg-suigan marwide!
¡E-galu-matusulid-akwabimalad ayaride!’
We-ibmar-gunaidi Bab-Jehová buged imaknaid.
Igi Babilonia-dulemar bemar-imaksa, deyobi bemar Babilonia-dulemar imakmogo.
Bemar-wiosayobi be wiomarmogo.
16 Babiloniaʼgi ibmar-digmalad be obelomar,
degi, Babiloniaʼgi ibmar-gwag-wemalad be osulomar.
Dulemar, bila-onolenaid dakdamalogu,
Babiloniaʼginsurmaladi e-yalase gannar namaloed,
e-neggweburse wakitemaloed.
17 ”Israel-dulemar sibad-wawaad-yoggus-gudimalayob gued,
achumigur-nono-wawaadse balegilledimaladyob gumalad.
Gebegine, Israel-dulemar Asiria-reyse dolesad,
geb sorba, Babilonia-rey-Nabucodonosorʼse bela e-garmar bibichilesad.”
18 A-ulale, Israel-dulemar-e-Bab-Dummad-Jehová Bela-Gangued-Nikadi weyob soged:
“An Babilonia-rey sabsur-odurdakoed,
degi, an e-yala sabsur-wiobaloed,
igi an Asiria-rey sabsur-odurdaksa,
deyobi, an imakmogoed.
19 An Israel-dulemar gannar e-yalase-naega imakoed,
Carmelo-yalagi, Basán-yalagi nue mas-gunbukwa an imakoed.
Degine, Efraín-yalagi, Galaad-yalagi nue-immelebukwa an imakoed.”
20 Bab-Jehová soged:
“A-ibagangine, Israel-dulemar-e-isguedi amilegoenad,
degi-inigwele, amilegosulid.
A-ibagangine, Judá-dulemar-e-isguedi amilegoenad,
degi-inigwele, amilegosulid.
Ar ani an bemaloedga isgued elioed.”
21 Bab-Jehová soged:
“Merataim-yalagi be gwichigunamar,
degi, Pecod-dorgangi be gwichigunamar.
¡Ogilomalo, bela naitinagase be obelomalo!
An bega igar-uksadba be imakmalo.
22 ”Neggweburgine bila-onolegega binnasuli-oimake itoleged,
nue-dummad wilemaloed.
23 Babilonia-yala, be mardoyobi, dulemar-sabsur-imakedinad,
emigindi, be yarmar-bamalad-imbagi olloo mellesiid.
24 Bee be, yamoleged-galu sisad, agine na be dukin galesad.
Galesadi gwen be itossulid,
ukiagwale be galesad.
Babilonia, ar be angi-gwisgusadba be daklenonikid,
degidbali, be galesad.
25 An-gingi-sabolebukwad an egasad, an-sae-itoged-gingimar an onisad.
Ani an Bab-Jehová-bur-dutusulidi, Bela-Gangued-Nika-Maidi, Babilonia-yalagi igar-soggwen an imakergebed.
26 Napneg-ugakagi-bukmalad, Babilonia-yalagi be gwichigumar.
E-ibmar-gwag-sabolebukwad ei be egamar,
ibmar-gwag-weemaloedi, danar-danar be oambikumalo.
Bela nagase be obelomalo.
¡Melle ibmar be obemalo!
27 E-moli-bebe-nikad-sapingana bela be oburgwemar.
Oburgwileged-negse be sedmar.
Babilonia-dulemar, duledar-wilesmalad, sabsur-odurdakleged-iba ega nonikid.
28 Dulemar-duurmakmaid-e-sunmakedi be itomar.
Babiloniaʼgi-wakinmamaid-e-sunmakedi be itomar:
‘Bab-Jehová, ese-goled-neg-earismalad-ular, Babilonia-yar buged-imaknaiye,’
Sión-yalase sogdanimalad.
29 ”Be Babilonia-sordamar-idu sigugi-urwemalad danar oambikumar,
dulemar-warsi-yaa-saemaladi bela be urbemar.
Babilonia-ebilis be ambikumar,
melle dulemar-wakinnega be samalo.
E-ibmar-imaksamaladba be sabsur-imakmarmogo,
dulemar-wiosmaladba be wiomarmogo.
Ar we-dulemarde Israel-dulemar-e-Bab-Jehová-Gwage-Isligwaledgi gwichigusmalad.”
30 Bab-Jehová soged:
“A-ulale, a-ibagangine, e-sapingana neg-imbaba omiledoed,
degi, bela e-sorda-bila-onomaladi, girgumaloed.”
31 Bab-Jehová-Bela-Gangued-Nikad soged:
“San-dummarba-imakmalad-yala, an begi gwichiguoed.
Emide, sabsur-odurdakleged-ibagan bega nagunonikid.
32 San-dummarba-imakedi, gowarmakdoed, aimukudoed,
dule e-ogwisega bendakosulid.
Bela e-neggweburmargi an soo ogaoed,
bela e-neggwebur an soogi ogumakoed.”
33 Bab-Jehová-Bela-Gangued-Nikadi, weyob soged:
“Israel-dulemar, Judá-dulemar, mesagwar gudidimalad.
E-isdarmaladi gasa bukwad, gwen onobisurmalad.
34 Ar dule-e-bendakeddi, dule-dutusulidid,
ani an Bab-Jehová-Bela-Gangued-Nikadye nugad.
Gandikidgi an bendakoed,
nega-bogidikid an ega nasikoed.
Babilonia-yalagindina, an dobed-dummad nasikoed.”
35 Bab-Jehová soged:
“Babilonia-dulemar oburgwilegoed,
e-dummagan, degi, e-dule-binsaed-ibegan, ogilolegoed.
36 Ega-gayaburba-gakansaar-barsogmaladi, oburgwilegoed,
amar binsaedsulidga naddamalad.
E-sorda-bila-onomaladi nue-dobe-itomaladi ogilolegoed.
37 E-molimar, oburgwilegoed,
e-ur-napaginmaladi, osulolegoed.
Sorda-bila-onomalad-ainebarmalad-bennuklegarmaladi, bela girgumaloed.
Omeganyob dobgudmaloed.
E-ibmar-nuegana obelolegoed,
e-ibe atursalegoed.
38 E-diimar dinguoed,
bela dinna guoed.
Ar Babilonia-yala bab-dummadyob-imaklemalad-yalad,
amala, suli-suli dule-imakmaladid.
39 ”A-ulale, nega-dulesulidganba ibdurgan-ursirmaladi, achu-sapurmarbo gudii gumaloed.
Agine nuu-dummad-dukar-suidmar gudii gumarmogoed.
Dulemardi Babiloniaʼgi bar-bukwa guosulid,
degisadegu, olloo nai guoed.”
40 Bab-Jehová soged:
“An Sodoma-neggwebur-imaksayobi,
Gomorra-neggwebur-imaksayobi,
degine, amar-dikarbali neggweburmar-bukwad-wiosayobi,
an Babilonia-yala imakoed.
Bar agine dulemar bukwa guosulid,
agine bipisaale dulemar bar megosulid.
41 ”Dad-nakwed-argan-sapiledsiki, sorda-bila-onomalad danikid,
napneg-ugaka-akale, bela neggwebur-dummagan-bukwad,
degine, reymar-bukidar danikid.
42 Sigumar-annik-annik danimalad,
eswar-swiswidikmalad annik-annik danimalad.
Dule-ursirmalad nanaed,
wile-dule-daksurmaladid.
Moligi-sii danimalad.
E-uurmakedi, demar-uurmakmaidyobi gordanikid.
Babilonia-yeerdakleged, we-dulemar bebina danimalad,
we-dulemar begi gwichigudanimalad,
bila-onoledanikiyob ilemakar danimalad,
dule-wargwenadyob ilemakar danimalad.
43 Babilonia-rey, dulemar-egi-bila-onodanikid wisgusad,
deyob-itosgua, dobedbali wawanmakded,
na egine suli-suli-itoged nagusad,
ome-e-boniganba-galitonaidaeyobi, itoalid.
44 Achumigur Jordán-diwar-bulaganba, gagan-nuegan-naidse danidaeyobi,
ukiagwale an Babilonia-dulemargi gwichigudagoed.
Babilonia-dulemargi an dule-susadi an onugsaoed.
¿Ar doa anyobsunna?
¿Doa angi obinosunna?
¿Biti-sibad-edarbed angi gwisguosunna? Dule angi obinosuli.”
45 Ani Jeremías soged:
“Bab-Jehová Babilonia-dulemarga-igar-mesisad, be itomar.
Babilonia-dulemarga igar-mesilesad, be itomar:
‘Emar-imbagi sapingan-senigana ebipiledmaloed,
e-gagan-nanaidi, swanga naguoed.
46 Babilonia-neggwebur-berguoedi neg-ogiglimakoed,
e-gollomakoedi neggwebur-baiganse itolegoed.’ ”