27
Job
1-2 Gu be micheg u fithingan Got ni Gubin ma Rayag Rok ni be par nib fos,
ni ir e kesiyeg mat’wug ma ke mo’oynag e yafos rog —
3 n’umngin nap’an ni be pi’ Got e pogofan rog,
4 e dap’pilugnag e ri dabi yog bbugithin nib kireb,
ma blowotheg e dabi malfith bi’id.
5 Dabiyag ni nggu micheg ni gimed e bfel’ e romed;
dab gu tal i yog ni bfel’ e rog nge taw ko rofen ni ngum’ riy.
6 Dariy e ngiyal’ ni gu ra pag i yog ni gub mat’aw;
ya mmich u wun’ug ni gu bfel’.
7 Mang e yigi urngin e pi’in yad be togopluw ngog ma yad be cham ngog,
min gechig nagrad ni bod e pi’in kireb, ni pi’in nde mat’aw.
8 Mang e bay nma l’agan’ e pi’in nde nang Got ngay
ko re awa ni nge fek Got e yafos rorad?
9 Gur ra taw e gafgow ngorad mra motoyil Got ko meyor rorad?
10 Thingar ra chogow niged e felfelan’ nma pi’;
thingar rmaybilgad ngak ni gubin ngiyal’.
11 Mu pageg nggu fil ngomed feni ga’ gelngin Got,
mu gu weliy e tin ke tanomnag Got ni Gubin ma Rayag Rok.
12 Machane danga’, ya rogon riy ma kam guyed nga owchamed;
Ere mang ni gimed be non ni dariy angin?
[Zofar]
13 Irera’ rogon Got ni Gubin ma Rayag Rok
nma gachignag e pi’in kireb, nge pi’in tacham.
14 Ra mange ba yo’or pifakrad ni pumo’on,
machane yad gubin ni yad ra yim’ ko mael;
pifakrad e darir gamangad ko ggan.
15 Pi’in ni magay nib fos e yad ra yim’ ko liliy,
ma mus ngak pi leengrad ma dab ra yornaged yad ni karm’ad.
16 Pi’in kireb e manga yug ra yo’or e silber rorad ni dabkiyag i the’eg
nge mad nike pag oren,
17 machane boch fa pi’in nib manigil e yad ra yin’ fapi mad
miyad f’oth fapi silber rorad.
18 Pi’in kireb e yad ma toy e naun ni bod ba tafen e gonow
fa bod bochyang i sipal ni tafen ba sib nma matnag u milay’.
19 Pi’in tadenen e yad ra mol ni bo’or ban’en rorad,
ma nap’an e yad ra od ma dakriy e fa’ab rorad.
20 Ra aw e marus ngorad ni bod feni tomgin e sugbur;
miyad ra un ko nifngin e nep’;
21 nifeng ko ngek e ra aw ngorad nge walguyrad u tabnaw rorad;
22 re cham e nifeng nga dakenrad
ko ngiyal’ ni yad be guy rogon ni ngar milgad.
23 Be non ngulan e nifeng nga dakenrad ni yad be mil,
be karmarus ngorad nga feni gelmarin ni be cham.
DRAFT VERSION — Proofreading in progress