1 Gii dokopa Galilea tange isingi akali, Erote Antipasa lenge dokome, Jisasame pilyamo lapae dupa sia. 2 Sepala baanya kalai akali dupa lamaiyoo, “Akali doko Jone kaimbu pingi doko. Baa malunya sakatatala, mirakolo kalai dapale dupa pyoo kalyamona” lea. 3-4 Wamba Eroteme baanya kaiminingi Pilipa, etanenge Erodiasa lenge doko baa tondao nyia. Dopa piamosa, Jone kaimbu pingi dokome Erote lamaiyoo, “Embame enda tondao nyilino doko, kopeta pilinona” lea. Dopa lati siamosa, Eroteme Jone anjinya pyandea. 5 Anjinya pyandatala baame Jone pyao kumasotoo lao masiamoaka doko, Juda dupame Jone baa propetana lao masiaminosa, paka kaeyapala yakinea. 6-7 Erotenya mandenge gii doko epeamopa, gii doko kandao nyoo, endakali longo peteami. Dopa piaminopa, kaina dokonya Erodiasa wanenge doko ipao, danisa lea. Danisa leamo doko kandatala, Eroteme etete auu kaeyapala, wanaku doko lamaiyoo, “Nambame kiningi etete lelyo. Embame dopale mende dii lateno doko, lateliaka pyoo dyaapona” lea. 8 Dokopa wanaku doko endangi peteasa pupala, aipa laowape lea. Dopa leamopa, endangi dokome, “Jone kaimbu pingi dokonya aiyombo doko, pelesanya setapala dina lamaiya puu” lea. Dokopa wanaku doko Erote peteasa pupala, endangimi leamo dutupa lamaiya. 9 Pii dutupa sepala, Erote mona kenda kaeyamoaka doko, wamba baame endakali enombanya, kiningi etete mende ditoana leamo doko masetala, 10 baame yanda singi mendeme anjetae andaka pupala, Jonenya aiyomba doko kepao nyala pena lea. 11 Pena lateamopa, Jonenya aiyomba doko kepanyetala, pelesa mendenya setapala, wanaku doko minao ipao maiya. Maitiamopa, wanaku dokome nyepala endangi pao maiya. 12 Maitiamopa, Jonenya disaipolo dupa ipupala, baanya yonge doko nyoo, malu piami. Malu petala, Jisasa pao lamaiyami.

13 Jisasame Jone malu pimi lapae doko sepala, baame yuu doko yakinatala, sipi mendenya pituu, Galilea pete omotena endakali napalenge yuu mendakaita, mendeme nakandena lao baa pea. Baa pelyamo lapae endakali dupame sepala, nyakamanya taono dupanya katao, baa watao kaitini peami. 14 Jisasa Galilea pete omotena pao pyakamatala, endakali kambu andake mende kateamino kandea. Kandatala baame endakali dokaita kondo kaeyapala, yaina pyapae dupa mee jakamaiya. 15 Niki landa piamopa, disaipolo dupa ipupala Jisasa lamaiyoo, “Endakali napalenge panda dakenya, yuu kuiyalanya pilyamona, embame endakali kambu dake maketa seta dupanya, tange nee sambao nala pena laa” leami. 16 Dopa leaminopa, Jisasame dokaita lamaiyoo, “Daa, dokaita napena, nyakamame nee maiyepa” lea. 17 Dopa leamopa, dupame baa lamaiyoo, “Naimanya nee longo nasilyamo. 5-pela betesa-pipa, pisa lapo-pipa iki silyamona” leami. 18 Dokopa baame lao pituu, “Dutupa nyoo minao ae ipupa” lea. 19 Dopa latala baame endakali dupa tanu dupanya petena lea. Petena latala, 5-pela betesa-pipa, pisa lapoma-pipa nyepala, kaiti-kisa kandalyetae katao, yaka pilino lea. Dopa latala betesa dutupa konjepala, baanya disaipolo dupa maiyamopa, dupame endakali dupa mokosoo maiyami. 20 Endakali dupa pitakame nao tiaka kaeyateaminopa, kakana siamo dupa disaipolo dupame nyoo, 12 baseketa tumbasiami. 21 Enda wanepi itaki napyao, akali iki 5 tausenepi mendeme, nee neami.

22 Dokopa Jisasame baanya disaipolo dupa, sipinya pyakalyetala, Galilea pete omotena wambao pena lea. Baame endakali kambu dupa, andaka pena latala kandao katea. 23 Dokaita pateaminopa, baa iki loma sala, yuu manda mendenya pea. Yuu kuiyala peamopa, baa iki dokonya katea. 24 Dokopa disaipolo dupa sipi dokonya pituu, endaki pete kainanya peaminopa, poo andake mende paanya peamino dokaita-kaita pituu, laeyao lao ipupala, endaki doko buli piamo dokome, sipi doko nyoo yangi pyasa-pyasa pia. 25 Yuu yongao pukiamopa, Jisasa baa endaki pete dokonya moko katao, disaipolo dupa sipinya peamino dokonya pea. 26 Disaipolo dupame baa endaki pete dokonya moko katao epeamo kandatala, “Timango mende epelyamona” latala, paka kaeyao ae leami. 27 Dopa piaminopa, Jisasame dokaita lamaiyoo, “Namba epelyona, nyakama paka nakaeyalapa” lea.

28 Dokopa Pitame baa lamaiyoo, “Kamongo, kini emba-tamo doko, embame namba endakinya moko katao ipu laa” lea. 29 Dopa leamopa, Jisasame, “Emba ipu” lea. Dokopa Pitame sipi doko yakinatala, endakinya moko katao, Jisasa kateamo dokonya pea. 30 Pao pituu kandeamopa, poo andake mende leamosa, baa paka kaeya. Dokopa baa endakimi nyoo landa piamopa, baame ae lao, “Kamongo, namba nisa!” lea. 31 Dopa leamopa, Jisasame yapa kingi pyale latala, Pita kii nyokonyetala, “Aipuma emba mona lapo palipala, namba kuki tungi pyalepe?” lea. 32 Dokopa nyakamba sipinya pyakalyiambinopa, poo doko yatu lea. 33 Yatu leamo doko kandatala, disaipolo sipinya peteamino dupame, “Kiningi etete, emba Gote Ikiningi-lamona” lao mambo piami.

34 Jisasa disaipolo dupa-pipa, Galilea pete dokonya yangi-kaita, Genesarete yuu dokonya pao pyakameami. 35 Yuu dokaita tange endakali dupame, Jisasa-lamo lao kandatala, yuu dosa singi dupa pitakanya wai leaminopa, yaina pyapae dupa pitaka soo epeami. 36 Endakali soo epeamino dupame, baanya yonge pee punanya, yaina pyapae dupame watandena lao, Jisasa tee leami. Watandeamino endakali dupa pitakanya, yaina dupa mee jeta pia.