Ípúru
Ísu wíyómpaꞌa iyówana moóráwigon-awiꞌa ímbo agaimakáiwai moórá-waai úmai sísamaifakemba afakaeté-aataiyaꞌiyo miyáumai-aatai maisuwéna maanááí agaimái Yúndaa-waasi moórá-awiꞌa Ípúru-waasi Ísun-aai isésa wení aampaꞌó kuntáfésa tuwíyáái ésa sáwíꞌa uwátínkówasa minámbá ifátuwesa ááéraan-amaan-amba anekaꞌá arááíwáéfo séna maarán-ááí agaimái mátímakaiye.
Ísu Maníkón-ááninkoma Mósesemba íyáákaraiye. Ísu aifaꞌ-ámáán-káwáágómá ámáán-kisau-waasi íyáákaraiye. Póí tufúꞌmai Maníkómbá ámakaamba aifaꞌ-ámáán-ámbá isaná Ísu marapáꞌá kumbéna kentáásí sáwí-imayaa maisiyuwáíndasafena puwéna wenáúma Maníkómbá ámakaimba póna kentáásí ámáán-amba wikáimba póꞌa Ísumba ímbo aúwémba fasiꞌámai méraaro séna agaimái mátímakaiye.
1
Maníkón-ááninkon-awikoma wíyómpaken-kisau-waasi-tuwiꞌo íyáákarain-aai.
1 Naaófáꞌá moórá-mora-kanaa Maníkó wenáái simátímakowisafena súwasa miwí Maníkó siyáin-aai miyám-biyan-aai kentáá síwáꞌnásomba simátímaꞌmaena tiyáimba isaná 2 káféꞌa ánaaen-kanaafimba Maníkón-ááninko Maníkón-aaisa simásímakaiye. Naaófáꞌá wíyóne marawé ímbo wéronkaꞌa Maníkó súwana ááninko wíyóne marawé úmakena ánaaemba seyaafá-tántáákáꞌá káráwiyiniye. 3 Maníkóní sámo kainkó ááninkompinkemba sáma kaisaná Maníkómó méraintemba miyáumai ména miyáumaimo méraiwai kentáá aráásímísana wení fasiꞌaén-ááígómó intáféna wíyóne marawé waéꞌwaeꞌa wéiye. Wemó pukáintafena kentáásí sáwí-imayaa maisiyuwéna pukáimpinkemba íyáfasinena wíyómpaꞌa iyéna Maníkó fasiꞌaémbó íyáákaraiwain-ayáánúrapaꞌa fasiꞌaén-áémpáꞌá maraꞌá ména 4 wenáwíꞌa Maníkón-ááninkon-awiko Maníkóní wíyómpaken-kisau-waasi-tuwikomba íyáákaraiye.
5 Maníkó wení wíyómpaken-kisau-waasisafena
ímba siyáifo ááninkontafena séna
emá kesáánimba ónaꞌa
kesí kísauraꞌa ankáúmne
Maníkó séna moórá-aaiwaraꞌa séna
kemá afowámá onaná wemá
kesáánimba íníye
séna wíyómpaken-kisau-waasisafena ímba
siyáifo ááninkontafena séna 6 Maníkó wenááninko íyáákaraiwaimba aiꞌmarówana kunkáinkaꞌa
séna
Maníkóní wíyómpaken-kisau-waasi
wen-ímáyáá mósá maránááwe
wenááninkontafena siyáimbanifo 7 wení wíyómpaken-kisau-waasisafena súwana Maníkón-aai aúfáífimba agaimaréna séna
kemá súnasa kesí wíyómpaken-kisau-waasi fiyúndáraamba toꞌmaésa wénowe. Kemá súnasa
kesí kísau-waasi iyagómó intenkáán-kísáú wémaewe
siyáifo 8 Maníkó wenááninkontafena séna
Maníkóo waásiyaꞌo káráwimaemo íyínda ímba taiꞌáíníye. Káráwiyonda arupíse úmai wégarawiyone. 9 Kawe-tántáátáfé aamoí é sáwí-tantaatafe áyámba wéone. Mindásafena Maníkó ení Fasiꞌaénkó embá íyáfasinankaraisa
seyaafáꞌ-wáásí íyáákaraanana enarumbá
kaweꞌá uwánkaraiye
séna 10 ááninkontafena moórá-aai séna
Fasiꞌaénkóo áwáuraꞌa maramá úmare enayáántamba wíyómbo úmakaanda 11 mintántááꞌá taiꞌáína emá maéꞌmaeꞌa ínone. Unáánkwátóimo aúsú kénamo taíꞌáíntemba wíyóne marawé miyáumai taiꞌáíníye. 12 Wátóimo usisi fámáráántemba wíyóne marawé miyá ínone. Unáánkwátóimo aúmo ontembá wíyóne marawé miyá éma káféꞌo méraanten-úmai maéꞌmaeꞌa éma ímba puwínone
siyáiye. 13 Maníkó maanááí ímba wíyómpaken-kisau-waasisafena siyáifo ááninkontafena séna
kesiyáánúrapaꞌa fasiꞌaén-áémpáꞌá maraꞌ-iménaꞌa ení namuro-wáásí tínkamona emá íyáákainone
siyáiye.
14 Minááí siyáifo Maníkóní wíyómpaken-kisau-waasi nórawaꞌiyo. Miwí ímba túma wéraiwai timan-aantembo wéraiwai ésa Maníkómó sintembá miyá owaná Maníkó simátimena séna kaweꞌ-ámpáꞌó métinkaunda-waasi kuntúwaꞌnai oro séna wétiꞌmaraiye. Mindásafena Maníkón-ááninkon-awiko wíyómpaken-kisau-waasi-tuwikomba íyáákaraiye.