2
ፆኦሲ ዶኦሚ ካኣታሤ ካኣቲ
1 ዴራ ዓይጎሮ ጉንዱማይ?
ዓሳኣ ጌኔ ማዻኒ ዓይጋ ዞርታይ?
2 ዓጮ ካኣታ ዔቄኔ፤
ዔያቶ ዎይሣ ዓሳኣ ናንጊና ናንጋ ጎዳና
ዒዚ ዶኦሚ ካኣታሤ ካኣቲናም ጌኔ ማዻኒ
ሂዚ ጌይ ዞርቴኔ፦ 2፡2 ዳኪ. ማዾ 4፡25-26።
3 «ኑና ዔያታ ቱኬ ዓንጎ ዱፆ ቶካፓ ኑ ቲቆም፤
ሱዞዋ ዱኡዚ ኑኡኒ ኬኤሮም» ጌዔኔ።
4 ጫሪንጫ፥ ካኣቱሞ ቤዛ ዴዔሢ ዔያቶ ሚኢጫኔ፤
ዬያ ዔያቶኮ ፓሡዋ ማሊፆ ናንጊና ናንጋ ጎዳ ቶኦቻኔ።
5 ሃካፓ ሴካ ዒዚ ፔ ዻጎና ዔያቶ ጎራንዳኔ፤
ታሞጉዴ ዻጎና ዔያቶ ዒዚ ዒጊቻንዳኔ።
6 «ታኣኮ ዱማዼ ፂዮኔ ዹኮይዳ
ታኣኒ ዶኦሜ ካኣቲ ታ ካኣታሤኔ» ጋዓንዳኔ።
7 «ናንጊና ናንጋ ጎዳ ጌዔ ባኮ ዒላቲ ታ ኬኤዛንዳኔ፤
ዒዚ ታኣም ሂዚ ጌዔኔ፦
‹ኔኤኒ ታኣኮ ናዓሢኬ፤
ታ ኔና ሃኖ ሾዔኔ፤ 2፡7 ዳኪ. ማዾ 13፡33፤ ዔብ. 1፡5፤ 5፡5።
8 ታና ሺኢቄ፤ ዴራ ቢያ
ኔ ቢታንቶ ዴማ ዎርቃንዳጉዲ ታ ማሃንዳኔ፤
ዓጪ ማዔ ካራና ቢያ ኔ ዴኔ ማዓንዳኔ።
9 ዓንጊ ኮኦሎና ኔ ዔያቶ ጳርቃንዳኔ፤
ዓጪና ማዢንቴ ሜሄጉዲ ኔ ዔያቶ ጋኣጫንዳኔ› » ጌዔኔ። 2፡9 ዮሃ. ፆፔዻ 2፡26-27፤ 12፡5፤ 19፡15።
10 ዒንሢ፥ ካኣታ ማሊ ጶቂሡዋቴ፤
ዒንሢ፥ ዓጮ ዎይሣ ዓሳ ዒንሢና ዔሩዋቴ።
11 ናንጊና ናንጋ ጎዳም ዒጊቹሞና ማዹዋቴ፤
ጎጋይቂ ጎጋይቂያኣ ዒዛ ቢታንቶ ዴማ ዎርቁዋቴ።
12 ዻጋ ዒዛኮ ዔኤታንዳሢኮ ቤርታ
ዒንሢያ ዒ ባይዙዋንቴ ቤርታ
ጎጋይቂ ጎጋይቂ ናዓሢም ዳዲ ባዑዋቴ፤
ዒዛ ፑኖ ካይዚ ማሃዞንሢ ቢያ ዓንጂንቴያኬ።