52
ዓይኑሞ ሱኡጋሢ ዓይሣ ጎይፆና ዔራቶና ካላሊንታ ዳውቴ ካላሎ፤ ዔዶኦሜ ዓሢ ዶይቄ ሳኣዖኦሌ ኮራ ሙኪ፥ «ዳውቴ ዓቤሜሌኬ ማኣሪ ሙኬኔ» ጌይ ኬኤዜያና ዓይናዺንቴያኬ።
ፆኦሲኮ ዎጎና ኮሹሞና
1 ዔዞ ዎልቆሶ ፑርቱሞና ዓይጋ ኔ ጪኢዺንታይ?
ፆኦሲ ዓኣፓ ኔኤኒ ቶኦቺንቴያታዖ
ቢያ ዎዴ ዎይቲ ኔ ዖቶርቃይ? 52፡1 1ሳሙ. 22፡9-10።
2 ኔኤኒ ጌሺሢ ታኣኮ ማዾኬ ጌዒ ዓርቄሦ
ዻንጋ ኔኤኮ ዓጬ ሺጊሬጉዲ ባይሲንታ ሱኪ ሺራኔ።
3 ኮሹሞይዳፓ ባሼ ፑርቱሞ
ጎኑሞይዳፓ ሉኡዙሞ ባሼ ኔኤኒ ዶኦራኔ።
4 ኔኤኒ ዓሶ ጌሻ ዓሢ
ዓሲ ማኣሳንሦንዶ ጎይሢ ጌስታኒ ናሽካኔ።
5 ዬያሮ ፆኦሲ ኔና ጋፒ ባይዛንዳኔ፤
ኔ ማኣራፓ ኬሲ ኔና ዒዚ ዳውሳንዳኔ፤
ዓሳ ናንጋ ሳዓፓ ኔና ቱጊ ኬኤራንዳኔ።
6 ፂሎ ዓሳ ዬያ ዛጊ ዒጊጫንዳኔ፤
ሚኢቺያ ሂዚ ጌዒ ዔያታ ሚኢጫንዳኔ፦
7 «ፆኦሲ ፔኤኮ ጊቲማጉዲ ማሂባኣ
ፔ ቆሎ ሚርጉሞና ሄርሺንቴ
ፔ ፑርቱሞናኣ ዶዴ
ሃያ ዓሢ ዛጉዋቴ።»
8 ታኣኒ ጋዓንቴ ፆኦሲ ማኣሮይዳ
ዋርቂ ዓኣ ዛይቶ ሪሚቶጉዲኬ፤
ዒዛኮ ጋፑዋ ናሹሞ
ናኣናና ታ ጉሙርቄ ጎይሣ ናንጋንዳኔ።
9 ፆኦሲዮ!
ኔኤኒ ማዼ ኮዦ ባኮሮ ቢያ ናንጊና ታ ኔና ጋላታኔ፤
ሱንፃ ኔኤኮ ኮሺታሢሮ ኔ ሱንፆ ታ ሃጋኣ ዎዛ ማሃኔ፤
ኔኤም ዱማዼ ዓሶ ባኣካ ታ ኔና ጋላታኔ።