6
1 Bab-Jehová Moisés-abin sogded:
—Emigindi be dakodo, igi an Faraón-imakoe. Emide, an-dutusur-ganguedgine an ibmar-imakedba, Faraón bemarga sogdagoed, ‘bemar namarye.’ Ar an-dutusur-ganguedgine an ibmar-imakedba, Faraón bemarga sogdabaloed, ‘bemar an-yargi nomarye.’
2 Bab-Dummad Moisésʼga sunmakdebalid, ega sogded:
—Ani an Bab-Jehová gued.
3 Ani an Bab-Dummad-Bela-Gangued-Nikadid. We-nugba Abrahamʼse, Isaacʼse, Jacobʼse, an magarosad. An-nug-Jehováʼye-nugadbardi, an ese magarossulid. 4 Deginbali, amar-ebogwa an igar-mesisad, an sogsad, bemarga Canaán-yala an ukoye. A-yargi, Abraham, Isaac, Jacob, e-yarsulidgi sikwas gudigusmalad. 5 Emide, Israel-dulemar nunmakedba bodidimalad. Degine, Egipto-dulemar na e-maiga gandikidgi-be-imakdidimalad an itosad. Be-dadganbo an igar-mesisad an iessulid.
6 “Degisoggu, Israel-dulemarga be sogna: ‘Ani, an Bab-Jehová gued. Egipto-dulemar-maiga be gubukmaladgi, sabsur be-imakdimaladgi an bemar-onogoed. An-gangued-nikadba an Egipto-dulemar sabsur-odurdakoed. Aba an be-bendakoed. 7 Ani an be-sumaloed, an-dulamarga an be-imakmaloed. Ani an be-Bab-Dummadga guoed.
” ’Deyobi, bemar wisgumaloed, ani an be-Bab-Dummad-Jehová gued. Deginbali, bemar wisgumarbaloed, ani an Egipto-dulemar sabsur-bemar-oarbananaimargu an bemar-onosad. 8 Abrahamʼga, Isaacʼga, Jacobʼga an sogsagusad, Canaán-yala an bemarga ukedseye. A-yalase an be-nidmaloed. A-yala, degisadegu an bemarga ukoed. Ani an Bab-Jehová gued.’ ”
9 Moisés bela weyob Israel-dulemarga sogsad. Degi-inigwele, Israel-dulemar maiga-gudidimalad-ular, nue bukib-itodidimalad-ular, Moisésʼba ibsassurmalad. 10 Geb degine, Bab-Jehová Moisésʼga sogded:
11 —Egipto-rey-Faraónʼga be sogna, Israel-dulemar-Egipto-yargi-bukwad be onogoye.
12 Ar Moisésʼdi Bab-Jehová-abin sogded:
—Israel-dulemarbela anba ibsassurmalad, ar Faraón-bulesunna. Ar ande nued sunmaksurbalid.
13 Geb degine, Bab-Jehová Moisésʼga, degi, Aarónʼga, Israel-dulemargi, degi, Egipto-rey-Faraónʼgi sunmakded. Geb Bab-Jehová Israel-dulemar-Egipto-yargi-bukwad-onogega, Moisésʼga, degi, Aarónʼga igar uksad.
Aarón, Moisésʼbo
14 Israel-dulemar-e-dadgansik wemar e-gwenadgan-iduedga gumalad:
Israel-machi-sailagined-Rubén-e-masmala, wemalad:
Hanoc, Falú, Hezrón, Carmi.
Wemar Rubén-e-masmala gumalad.
15 Simeón-e-masmaladi, wemalad:
Jemuel, Jamín, Ohad,
Jaquín, Zohar, Saúl.
We-Saúlʼde, ome-Canaánʼgined-e-machid.
Wemala, Simeón-e-masmala gumalad.
16 Leví-e-masmaladi, machi-dummad-inse, geb bipigwadse, wemalad:
Gersón, Coat, degine, Merari.
Levíʼdi birga-dulanergwa-gakambe-gakagugle-nika (137) burgwisad.
17 Gersón-e-masmaladi, degi, e-gwenadgandi, wemalad:
Libni, degine, Simei.
18 Coat-e-masmaladi, wemalad:
Amram, Izhar, Hebrón, Uziel.
Coatʼdi birga-dulanergwa-gakambe-gakapaa-nika (133) burgwisad.
19 Merari-e-masmaladi, wemalad:
Mahli, degine, Musi.
Wemar, garda-maidba Leví-e-gwenadgan gumalad.
20 Amram e-ammor-Jocabed nikusad.
Amarga Aarón, degi, Moisés uklenonikid.
Amram birga-dulanergwa-gakambe-gakagugle-nika (137) burgwisad.
21 Izhar-e-masmaladi, wemalad:
Coré, Nefeg, Zicri.
22 Uziel-e-masmaladi, wemalad:
Misael, Elzafán, Sitri.
23 Aarónʼdi, Elisabet nikusad. Elisabetʼde Aminadab-e-sisgwad, Naasón-e-bunad.
Geb Aarónʼga, degi, Elisabetʼga machimala-uklenonikid:
Nadab, Abiú, Eleazar, Itamar.
24 Coré-e-masmaladi, wemalad:
Asir, Elcana, Abiasaf.
Wemala, Coré-dulemar-idumaladga gusmalad.
25 Aarón-e-machi-Eleazar, Futiel-e-sisgwa-wargwen nikunonikid.
Machigwa ega uklenonikid, Finees.
Wemala, Levita-e-gwenadgan gumalad, na e-idumaladid.
26 Ar Bab-Jehová Aarónʼga, degi, Moisésʼga wemar-sunnadga sogsagusad, Israel-dulemar-Egipto-yargi-bukwadi danar-danar na e-gwenadgan-e-gwenadganba be onogoye. 27 Amba Moisés, degi, Aarón, Israel-dulemar-Egiptoʼgi-wilebukwad-onogega, Egipto-rey-Faraón-ebo sunmakap gusmalad.
Aarón Moisés-anar sunmaksad
28 Bab-Jehová Egipto-yargi Moisésʼbo sunmaksagua, ega sogsad:
29 —Ani an Bab-Jehová gued. Bela an bega ibmar sogoedi, Egipto-rey-Faraónʼga bela be ibmar-sogmogoed.
30 Ar Moisésʼdi Bab-Jehová-abin sogded:
—Bab-Jehová, ar ande gale-gale sunmaksoggu, ¿igi Faraón an-ibmar-ega-sogedba ibmar-imakosunna? An-sogedba ibmar imakosuli.