38
Ibmar-ogumakar-ukleged-aila-soblesad
(Éxodo 27:1-8)
1 Deginbali, Bezaleel urgo-acaciaʼye-nugadgi Bab-Dummadga-ibmar-ogumakar-ukleged-aila sobsabalid. E-sugued, daligwen-gaka-achabo, e-matardungued, daligwen-gaka-achabo-nika sobsad. E-sugued, degi, e-matardungued, emarbi imaksad. E-nibgueddi, bisgipaa-nika imaksad. 2 We-aila mullugwad-sogabake-abingunaidgi moli-bebegiid ogwichisad. We-moli-bebegiid ailaba-mesa sobsad. Bab-Dummadga-ibmar-ogumakar-ukleged-aila-birgi esgoro-gordikid egi nasiksad. 3 Deginbali, bela Bab-Dummadga-ibmar-ogumakar-ukleged-ailagi we-ibmar-ebulemaloed sobsabalid:
Buru-simalad-bormomar.
Buru-weemalad-wesar-dummagan,
Abe-bomied-nog-dummagan.
San-obin-obin-saed-iko-dummagan.
Soo-seed-bormomar.
Bela-wemala esgoro-gordikidgi sobsad.
4 Bab-Dummadga-ibmar-ogumakar-ukleged-ailaga, san-nared-saki-sakid esgoro-gordikidgi sobsad. We-san-nared-saki-sakid Bab-Dummadga-ibmar-ogumakar-ukleged-aila-yagi, negabaladgi nasiksad. 5 Deginbali, olua-dummagan-sobega esgoro-gordikid dusbalid. Deyob imaksad, adi, san-nared-saki-sakidgi we-olua-dummagan-gwabake nasikega, adi, agi suarmar-suigan odogegar. 6 Urgo-acaciaʼye-nugad-walagana suitii sobsad. Geb a-suarmar-birgi, esgoro-gordikid nasiksad. 7 Geb degine, Bab-Dummadga-ibmar-ogumakar-ukleged-aila-dikarba oluaduk-dummagan-nanaid-yaba suarmar-walagana odosad, adi, nabir aila selegegar. Bab-Dummadga-ibmar-ogumakar-ukleged-aila ollor sobaled. We-aila urgomargi sobaled.
Dii-sied-soblesad
8 Bezaleel, dii-sied, degi, e-sigedga-gued, esgoro-gordikidgi sobsabalid. We-sobegala, omegan-Bab-Dummadse-goled-neggi-arbamalad e-isbemar-esgoro-gordikidgi-sobaled ebusad.
Bab-Dummadse-goled-e-imba-nasiklesad
(Éxodo 27:9-19)
9 Bezaleel, Bab-Dummadse-goled-neg-sunna-seleged-e-neg-imba, degi, e-galu sobsabalid.
Dad-nakwed-argan-nuedsik, a-neg-imba-e-galuga, mor-dummagan imaksad:
Lino-mor-nued dali-dulagwen-gakatar-sugu (25), sobsad.
10 E-buarmar, dulagwen (20) mergued.
Egi-sigmalad, dulagwen (20) mergubalid,
bela esgoro-gordikidgi sobaled.
Buarmar-e-nonomar, e-gamalad,
bela manibi sobaled.
11 Bab-Dummadse-goled-neg-sunna-selegedgi dad-nakwed-argan-sapiledsik,
mor-dummad dali-dulagwen-gakatar-sugu (25) naibalid.
E-buarmar, dulagwen (20) gwigwisbalid.
Degi, e-sigmalad esgoro-gordikidgi dulagwen (20) imakarbalid.
E-gamalad, degine, e-buar-nonomar, manigi sobarbalid.
12 Dad-argwanedsik mor-dummad-naidi,
daliambe-gakabo-abala (12½) sugued.
E-buarmar, warambe (10) gwigwichid,
degi, e-siged, gwaambebalid (10).
E-gamalad, degi, e-buar-nonomar, manigi sobarbalid.
13 Dad-nakwedsik mor-dummad-naidi,
daliambe-gakabo-abala (12½) sugued.
14 E-yawagak-dikarsiki, mor-dummad-naidi, dalipaa-gaka-bisgipaa sugued.
E-buarmar walapaa, degine, e-sigmalad, gwapaa sobarbalid.
15 Degine, yawagak-baid-dikarbali,
mor-dummad dalipaa-gaka-bisgipaa-sugu naid.
Degi, buarmar, walapaa,
degi, e-sigmarmogad, gwapaa sobarbalid.
16 Mor-dummagan neg-galugi-nanaidi, bela lino-mor-nuegan naed.
17 E-buarmar-sigmalad bela esgoro-gordikidgi sobaledbiid.
E-gamaladi, degi, e-olua-dummagandi, manibi sobaled.
Deginbali, e-buar-nonomargi, bela manibi matak-matak ebiris naid.
Bela Babse-goled-neg-e-buarmar-bukwad-e-olua-dummagan bela manibiid.
18 Yawagakga neg-imba-dogedgi mor-dummad-naidi, mor ise-nue-sobar, bela-bela nue-yeerdakle-imakar naid.
We-mor-dummad-sobaledi, we-dubmargi sobaled:
Nirbadub-aradgi,
nirbadub-suir-akwagiidgi,
nirbadub-ginnidgi,
degi, linoʼdub-nuedgi sobaled.
E-suguedi, daliataled.
E-nibgueddi, daligwen-gaka-bisgise nibgued.
We-mor-dummagan mor-dummagan-neg-imbagi-nanaidyob-dungu imaklesad.
19 E-buarmar, walabake gued,
e-sigmalad, gwabakebalid.
Wemar, esgoro-gordikidgi sobaled.
E-gamalad, e-olua-dummagan manigi sobaled,
degi, e-buar-nonomargi, bela manibi matak-matak ebiris naid.
20 Bab-Dummadse-goled-neg-sunna-seleged-e-bargamalad,
degi, neg-imba-e-galu-ebirnaid-e-bargamalad,
bela esgoro-gordikidgi sobaled.
Babse-goled-neg-selegedgi ibmarmar-ebulesad
21 Bab-Dummad-dulemarbo-Igar-Mesisad-neg-sunna-selegedgi ibmarmar-ebulesad ebislesgusad. Leví-e-wagan, Moisés-sogedba ibmar-ebismalaga arbasmalad. Geb Aarón-dule-irwa-Bab-Dummadse-goled-machi-Itamar, ibmarmar-ebislesad narmaksad.
22 Uri-machi-Bezaleel, bela Bab-Jehová igi Moisésʼga sogsagusa, deyob ibmar imaksad. Bezaleel Hur-e-wagwad, dad-dummad-Judáʼgi danikidid.
23 Ahisamac-machi-Aholiab, Bezaleel-bendakega gusad.
Aholiab, dad-dummad-Danʼgi danikidid. Aholiabʼde, esgorogi-ibmar-sobed-duled, nabir-ibmar-akar-akar-onogedbalid. Deginbali, nabir we-dubmargi ibmar-sobedbalid:
Nirbadub-aradgi,
nirbadub-suir-akwagiidgi,
nirbadub-ginnidgi,
degi, linoʼdub-nuedgi
mor-yeerdakle sobedid.
24 Israel-dulemar Bab-Dummad-neg-sunna-selegedgi-ebulegega,
Bab-Dummadga-or-uksamalad, bela ebusmalad.
Nibir-milibo gaka dulabakebak-gakambe-gakatar (2,195), ebusmalad.
Bab-Dummad-neggi nibirgi-ibmar-wilubsalegedba imaksamalad.
25 Dulemar-bukwad-ebislesadba,
e-mani, nibir-miligugle gaka dulataled-ilatar gaka dulabo-gakambe (7,550) gusad.
Bab-Dummad-neggi nibirgi-ibmar-wilubsalegedba imaksamalad.
26 Bela-dulemar-birga-dulagwen-gaka-nikmaladi (20+),
mili-dulataled-ilanergwa-gakapaa gaka dulataled-ilatar gaka dulabo-gakambe-mergu (603,550) daklealid.
Wemala, e-dule-irba mani-gramo-nergwa uksamalad.
Bab-Dummad-neggi nibirgi-ibmar-wilubsalegedba imaksamalad.
27 Deginbali, Bab-Dummadse-goled-negga e-sigmalad-sobega,
degi, mor-dummad-naidga e-sigmalad-sobega,
mani, nibir-miligugle gaka dulataled-ilatar (7,500) ebulesbalid.
E-siged-dulatargi (100),
mani, nibir-miligugle gaka dulataled-ilatar (7,500) ebulesad.
Degisoggu, e-siged-iliba nibir-dulapaa-gakambe-gakatar (75) ebulesad.
28 Mani-gwabgusadgindi buarmar-gamalad sobsad,
Degine, buar-e-nonomar, degi, e-olua-dummagan sobsabalid.
29 Dulemar esgoro-gordikid nibir-miliatar gaka dulataled-ilapaa gakambe (5,310) uksamalad.
30 We-esgoro-gordikidgi Bab-Dummadse-goled-neg-sunna-seleged-e-yawagak-siged,
degine, Bab-Dummadga-ibmar-ogumaker-ukleged-aila, sobsamarbalid.
Agine, san-nared-saki-sakid sobsamarbalid,
degine, a-ailagi-ibmar-ebulemalad bela sobsamarbalid.
31 Amba Bab-Dummadse-goled-neg-sunna-seleged-e-sigmalad,
e-yawagak-e-sigmalad esgoro-gordikidgi sobsamalad.
Degine, bela a-neg-bargamalad,
degi, bela e-galu-bargamalad-dikarba-gwigwismalad,
esgoro-gordikidgi sobsamarbalid.