16
Bab-Dummadgi an bensulid
David namaked-Mictam narmaksad.
1 Bab-Dummadye, be an-bendake,
an begi dukued amidiid.
2 Bab-Jehováʼga an sogsad:
“Bebi unnila be an-Dummadga-guye,
dule-baidgi ibnued an amisurye,
unnila beginbi ibnued an amiye.”
3 Dule-gwage-swilidikmalad we-yargi-bukmaladgi an yeer-itoged.
Dule-gwage-inniki-gudimaladgi an yeer-itoged.
4 Dulemar ibmar-bab-dummadyob-imaklemaladga nue-alamakdimaladdi, dukin nunmaked-onasguega imakdimalad.
Andi, ibmar-bab-dummadyob-imaklemaladga ablis-uklegedi, bipisaale gwen ukosulid.
An-gwabindukubela, gwen e-nug biosulid.
5 Bab-Jehová, bela ibmar-nueganba
be anga ibmar-biriginedga gued.
Be angi doggus ise-nued-binsamaid.
An-san-burba, bela be-argan-yaurgi siid.
6 Napa-nuegan be anga uknonikid,
napadar-nued be anga daksad.
7 Bab-Jehová-anga-binsaed-ukmaid-nug an odummogoed.
E-binsaedi, mutikidba an-ulubgi, anga ibmar-soge an itodaed.
8 Gusgu Bab-Jehováʼse an idaked, ar anba-gudiguad.
Ar an-yalaba gwichigusoggu, dule gwen an-oakalogosulid.
9 A-ulale, an-gwagegi an yeer-itoged.
Bela an-ulubgi an weligwar itoged.
Bela an-san-burba begi-bensuli gudii guoed.
10 Gwen be an-san-burba neg-uangi oyogsaosulid,
ar be-mai-gwage-swilidikid-e-mui gwen neg-uangi onunsaega be imakosulid.
11 Igar-nuedba-gudigued be anga oyosad,
be-asabinni bela-belad weligwar-gudii be an-imaked.
Be-yalaba degisadegu-gudiid an yeer-itoged.