24
Bab-Dummad napneg-naid-e-ibedid
David we-namaked narmaksad.
1 Bela we-napneg-naidi, bela egi ibmarmar-bukwadi, Bab-Jehováʼgadid.
Bela yalagan-nanaidi, dulemar-egi-bukwadi, bela Bab-Dummadgadbiid.
2 Bab-Jehová, demar-naidgi napaneg onakwisad,
dii-wilagangi napaneg nasiksad.
3 ¿Doa Bab-Jehová-yarse nakoe?
¿Doa Bab-Jehováʼse-goled-neg-islidikidgi gudiguoe?
Unnila weyob-gudimaladbi gudii guoed:
4 Dule-ibmar-nueganbi-imaked,
dule-gwage-swilidikid,
dule-ibmar-bab-dummadyob-imaklemaladse-gordisulid,
yamo-ibmar-ise-sogar-imakdisulid,
amarbi unnila, Bab-Jehováʼse-goled-negse dogoed.
5 Dule-deyob-daedgi, Bab-Jehová ise-nued-binsaoed,
Bab-Jehová-e-abonogedid ega nuedgi igar-nabogoed.
6 Bab-Dummad, dule-be-amidimaladi, weyob damalargebed,
dulemar Jacob-e-Bab-Dummad-dakbi-gudimaladi, weyob nanamalargebed.
7 Yawagak-dummagan, be argamarsun,
yawagak-degisadegu-gwichimalad, be argamarsun,
we-yawagakgi, Rey Gandikidba-Yeerdakleged dogesokalid.
8 ¿We doawa, Rey Gandikidba-Yeerdakleged?
We-Rey, Bab-Jehová-Dule-Gandikidid, dule-buledid.
Bab-Jehová bila-onogedgi dule-buledid.
9 Yawagak-dummagan, be argamarsun,
yawagak-degisadegu-gwichimalad, be argamarsun,
we-yawagakgi Rey Gandikidba-Yeerdakleged dogesokalid.
10 ¿We doawa, Rey Gandikidba-Yeerdakleged?
We-Rey, Bab-Jehová-Bela-Gangued-Nika-Maidid.
We, Rey Gandikidba-Yeerdaklegedid.