27
Bab-Jehová an-gwallu-meegwadid, an-abonogedid
David we-namaked narmaksad.
1 Bab-Jehová anga burba-dulad ukedid, an-abonogedid.
¿An doa dobguosunna?
Bab-Jehová an-gandikidga gued.
¿An doase gwayosunna?
2 Dule-isganamar an-obelogega angi gwisguarmargu, an-isdarmalad an-oburgwega angi gwisguarmargu,
aka bur amar burgwismalad.
3 Ar amba sordamar-bila-onoged, an-ebiris-bukwa-inigwele, andi an dobguosulid.
Amba angi bila-onolealile, andi an bukib-binsaosulid.
4 Bab-Jehováʼse unni ibmar-soggwen an egichisad,
abi an abeged:
E-neggi-degisadegu-gudigued an abeged.
Adi, an Bab-Jehová-e-yeerdakleged dakega,
e-neggi ese gordii gubaligar.
5 Ar Bab-Jehová, ibagan-bulegangi na ese-goled-neggi an-odukuoed,
na e-neg-megedgi an-odukuoed,
akwasaila-birgi an-ogwichoed.
6 A-sorbali, an-isdarmalad-an-ebiris-bukwamaladgi-nakwega an-imakoed.
Ese-goled-neggi, an e-nug odummogoed,
Bab-Jehováʼga andi namakoed.
7 ¡Bab-Jehováʼye, an bese-goled, be itoge!
¡Be wile-an-dake, be an-abinsae!
8 An-gwage anga-soge an itoged: “Be Bab-Jehová-amie.”
Bab-Jehová, an be-amied.
9 ¡Bab-Jehováʼye mer be angi dukue!
¡Mer be isdar-itogedgi be an-obane! Ar be an-bendakedid.
Bab-Jehová an-abonogedye, mer be walagwen an-obege,
mer be an-mete.
10 Ar amba an-bab, degi, an-nan an-obachale,
Bab-Jehováʼdi an-suoed.
11 Bab-Jehová, an-oburgwebimalad-ulale, be-igarba be an-nide,
igar-nueganba be an-idue.
12 Bab-Jehová, an-isdarmaladga mer be an-urmake,
ar gakansaar-emar-barsogmalad, emar-sabsur-imakmalad, angi gwisgunanaid.
13 Degisoggu, an nue-wisimakaled,
an we-napneggi-gudiidgi Bab-Jehová-dulemargi-nued-binsamaid an dakoed.
14 ¡Bab-Jehováʼgi mer be bengue!
¡Be gangue! ¡Be niga-gandik sae!
¡Eye, Bab-Jehováʼgi mer be bengue!