44
Bab-Dummadse bendakleged egised
Coré-wagan namakmalad-e-iduedga we-namaked-Masquilʼye-nugad narmaksad.
1 Bab-Dummad, epenne ibmar-dakledisurmalad be imaksadi, anmar-sunnagwad uayagwar itosad.
Epenne-ibmar-gusadi, anmar-dadgan anmarga sogsad.
2 Be-sunnagwadi, dule-be-wissurmalad be onisad.
A-muchubbi, anmar-dadgan be urbisad.
Dule-be-wissurmaladi be sabsur-odurdaksad,
anmar-dadgandi nasgumai be imaksad.
3 Dadgan gwen e-es-suidgine yar sussurmalad,
gwen e-surgangine dulemargi obichasurmalad.
Unnila be-ganguedgi, be-surgangi, be anmar-dadgan-bendaksad.
Eba-be-gudigusadgi be amar-bendaksad.
Ar bede, dadgan-nue-sabedbali, deyob imaksad.
4 Bebi unnila be an-Bab-Dummadid, bebi be, an-reyd.
¡Be-igar-ukedba dulemargi-nakwega be anmar-imaksad!
5 Be-ganguedgi anmar-isdarmaladgi anmar nakwisad.
Be-nuggi anmargi-gwichigudimaladi anmar obelosad.
6 An-warsigi bendakleged an amiosulid,
an-es-suid dulemargi-nakwega gwen an-imakosulid.
7 Be anmar-isdarmaladgi-nakwega be anmar-imaksad.
Bebi, dule-anmargi-gwisgudimalad-obingegsaega be imaksad.
8 ¡Bab-Dummad, anmar beginbi nug-dummarba-itodii gumaloed!
¡Anmar be-nug-odummodii gumaloed!
9 Emisgindi, be anmar-obachad, be anmar-obinge-imaksad.
Bar be anmar-sorda-bila-onomaladba nanasurgusad.
10 Dule-isdarmalad-abin sikirmakega be anmar-imaksad.
Dule-sae-anmar-dakdimalad, anmar-ibe ibmar-atur-imaksamalad.
11 Sibad-wawaadyob be anmar-oburgwega anmar-urmaksad.
Dulamar-bamalad-imbagi be anmar-oaisakisad.
12 Be-dulamar mani-bipii be uksad,
egi be ibmar-nued gwen-amissulid.
13 Dule-anmar-neg-dikarba-mamaid-abin, dule-gegegwaga be anmar-imaksad.
Dulemarga anmar dodogedga guded,
dulemarga anmar alledga guded.
14 Neggweburmar-oallega be anmar-imaksad.
Anmar-dakalir, yamo-yamo anmarga guardamalad.
15 Bane-bane bingedar an itodigussunnad.
An akusunna-itogedba bingeguarsunnad.
16 An-isdarmalad-buged-an-imakbi-gudimaladse,
an-isdarmalad-sae-an-dakdimaladse,
an-isdarmalad-an-dikarba-urwedimaladse,
an bingedar-itoged.
17 Bela we-ibmar anmargi gusad. Degi-inigwele, anmar be-iessulid.
Dadgan-Ebo-Be-Igar-Mesisadi anmar gwen-bichissulid.
18 Anmar bega uayasuli gussulid,
be-Igargi anmar gwen bangussurbalid.
19 Ar bedi achusapur-bunnu-wawaad-e-gubya-yaba be an-balimetemalad,
negasichidbi be anmar-idu nasiksad.
20 Bab-Dummad, ar anmar be-iesana,
be-muchub anmar bab-dummad-baidse gochana,
21 ¿ar be wisguosulin be insae?
Ar bede bela ulubgi dulemar-binsaed mag-daked.
22 Be-ular, anmar bane-bane oburgwilediid.
Sibad-wawaad-oburgwelegedyob anmar imaklediid.
23 ¡Bab-Dummad, atake! ¡Mer gabe!
¡Gwisgue! Mer be anmargi bangudii gue.
24 ¿Ibiga be anmar-idu dukue?
¿Ibiga be anmar-wilediid be iege?
¿Ibiga be anmar-sabsur-imaklediid be iege?
25 Anmar napa-nukuse yasulemamaigus-naed.
Napayala baparmakdigusmalad.
26 Bab-Dummadye, be dage.
Be anmar-bendakdage.
Be-sabguedgi be anmar-bendakdasun.