77
Bab-Dummad-ibmar-dummagan-imaksadgi binsaed
Asaf, we-namaked narmaksad. Namaked-idued-Jedutúnʼga soglenaid.
1 Bab-Dummad an-itogega, an ese binnasuli goled.
Suli-suli an itodiidgine, Bab-Dummadse an goted.
2 Bab-Dummadse mutikidba bogigusuli an argan-onakgwar gormai daed,
degite, amba an-gwage naibi-itodaed.
3 Bab-Dummadgi an binsadele, nue-bukib an itodaed.
An egi nue-binsadele, an boddaed,
an binsaddaed bar an bendaklegosurye.
4 Bab-Dummad, gabsuli be an-imaked.
Suli-suli an-itosoggu, geg sunmak an naddaed.
5 Ibagan-epenne-nasmalad an insaddaed,
birgamar-epenne-nasmalad an insaddaed.
6 An mutikidba-namakmaidaed an ebinsaddaed,
ulubgi an binsamaidaed, an egismaidaed:
7 “¿Ar Bab-Jehová degisadegu anmar-obandiguode?
¿Ar anmargi nued-binsadii bar guosurde?
8 ¿Bab-Dummad degisadegu-anmar-sabgudiid bergussi?
¿Bab-Dummad anmarga-ibmar-imakoye-sogsad degisadegu bergussi?
9 ¿Bab-Dummad dule-wiledaked iessi?
¿Bela-bela urwemaidba, bar anmar-sabguosurde?”
10 Geb an sogdesunnad: Bab-Dummad-Bur-Birigined bar epennegii anmarga ibmar imaksulid.
We, nue-nunmak an-imaked.
11 Epenne Bab-Jehová-ibmar-dakledisurmalad-imaksad an ebinsaoed.
Epenne Bab-Jehová ibmar-gegerdakleged-imaksad an ebinsaoed
12 Bab-Dummad-ibmar-dummagan-imaksad an egi binsaoed,
be-ibmar-dummagan-imaklesadgi an sunmakoed.
13 Bab-Dummad, be-ibmar-imaked islidikidbiid.
¡Bab-dummagan-baigan anmar-Bab-Dummadyobid sulid!
14 Bab-Dummad, be ibmar-dakledisulid-imakedid.
Be-gangued dulemar-yar-baid-baidgi-bukmaladse be oyomaid.
15 Be-ganguedgi, be-dulamar be ollor-imaksad,
Jacob-wagan be ollor-imaksad,
José-wagan be ollor-imaksad.
16 Bab-Dummad, demar be-daksagua, be-dobguded,
muu-wilasailad be-daksagua, binnasuli giglimakded.
17 Mogirmar, dii-dummad owialid,
nibneggi, malamar gollomakded,
nibneggi, malamar ibyeded.
18 Burwa-bipirmakaled-imbaba be-goled malayobi binnasuli gollomakded,
be-mala-ibyemamaid napaneg ibegwar-imakded,
napaneg wawanmakded, bela giglimakded.
19 Demar-abargi, igar be mesisad,
Muu-billi be egasad,
a-abargi be nasad,
degite, be-gannar daksasurmalad.
20 Sibad-wawaadyobi be-dulamar Moisésʼba, Aarónʼba be semai gusad.