5
Sui-nue-sabgulediid namaked
1 Be, an-ome-nue-sabesailad, an-bunbalid.
An-dutugaluse an dogsad,
agi an-mirra-wawadikid an aminonikid,
agi an-ina-wawadikid an sunonikid.
Agi an-achanis an nue-masad,
agi an-achanis-e-uu an nue-guchabalid.
Agi vino an nue-gobsad,
nunis an nue-gobsabalid.
Bular-namakleged
An-aimar, mas-nued be gunmala, gatik be gobmarbali,
immee gudii be imakmala.
4. NAMAKLEGED-SOGBAKEGWAD
(5:2–6:3)
Ome-nue-sabgulediid namaked
2 An gabmaidgine itoakwaa an gabmaid.
Agine, an-sui yawagakba gorgwichi an itoalid:
“An-ome, an-buna, nuu-yeerdaklegeyob be yeer dakleged.
¡Anga yawagak be egae!
Ar boo-batenaidba an-nono waradikgusad,
ar neg-mutikidba-boo-batenaidba, an-sailagia waradikgusad.”
3 Bato an mor esusad.
¿Gannar an mor yobarsunde?
Bato nag an enuksabalid.
¿Gannar an nag ollibi-gubarsunde?
4 An-sui yawagakgi-yaa-ollo-siidgi e-argan odosad.
Deyob an daksagua, bela an-gwagese an-ebusad.
5 An-suiga an yawagak-egaegala, yog gwisguar an imaksad.
An-argangi mirra-wawadikid ariomaid,
an-goomar-imbaba bela ariomaid,
yawagak-eduedgi deemaknai gusad.
6 An an-sui-nue-sabesailadga yawagak-egasgua, bar gwichisulid, an-idu naded.
An-idu-nadedbali, an naibi itononikid.
Aisaar an amisanad,
an amissurgusad.
An ese gornaigusbalinad,
an-abin-imaksasurbalid.
7 Agine geb, dulemar-nakulemalad nakuledimargua, an-aminonimalad.
A-dulemala an-sarsononimalad, an-naibi-imaksamalad.
Dulemar-galugi-nakulebukwad, sabsur-an-ibe mor esusmalad.
8 Jerusalén-bunamala, ise-wilegagwar an bega sogmar.
Bemar an-sui-nue-sabesailad-abingualile, ega be sogmalo, sui-abegedba an uelledye.
Bular-namakleged
9 Omegan-bamaladba-bur-yeerdakleged, be anmarga soge,
“¿ibugi be-macheredde, machergan-bamaladgi obinsunna?
¿Ibugi obinsunna, emide be weyob anmarse egisnaigu?”
Ome-nue-sabgulediid namaked
10 An-sui-nue-sabesailad, machered-nued dakleged,
e-uka sichisaar-daklebalid.
Dule-miliambegwad-abargi (10,000) magasar dakleged.
11 An-sui-e-nono, or-nuedyob yeer dakleged.
E-sailagia, sinni-sinni nikad, sikwisichidyob sichii gued.
12 E-ibyamar-gwabogwad-daklegedi, nuumar diwar-gakanaba-simalayob dakleged,
nunisgi-obsayob dakleged.
E-ibyamar innikimakar bukwad.
13 E-wagardi, wawadikid,
ina-wawadikid egi digar-naiyobid.
E-gakuli dutumar-daklegeyobid,
agi mirra-nis egi dedemaknaiyobid.
14 E-swidamardina, or-suarmar-daklegeyobid,
akwa-nuegan egi nanaiyobid.
Bela-e-abagan, elefante-nugar-daklegeyob, swilidikid dakleged.
Akwa-nuegan-zafiroʼye-nugad, bela egi ebiris naiyobid.
15 E-malimar-warbogwaddina, akwa-nued-mármol or-nued-sobaled-birgi-gwigwichidyob dakleged.
E-gwisgued, yeerdakle gwisgued,
Líbano-yargi-urwar-gwigwichidyob dakleged.
16 E-gakulide, bela osidikid,
bela e-daklegedi, machered-nued itoged.
Jerusalén-bunamala, ar deyob an-sui dakleged,
ar deyob an-ai dakleged.