Sapta 28
1 Ol manmeri i givim pe nogut long ol arapela manmeri bai ol yet i kisim pe nogut long han bilong Bikpela. Na Bikpela bai i no inap lusim tingting long ol rong bilong ol. 2 Sapos Mt 6.14, Mk 11.25 yu lusim rong ol arapela manmeri i bin mekim long yu, orait taim yu singaut long Bikpela, em bai i lusim sin bilong yu tu. 3 Tasol sapos yu holim tingting kros long ol arapela manmeri, yu ting Bikpela inap long mekim yu i kamap orait? 4 Yu ting Bikpela inap long lusim sin bilong yu, sapos yu yet yu no marimari long wantok bilong yu? 5 Yu man nating tasol, na sapos yu no laik pinisim belhat bilong yu, orait husat bai i rausim ol sin bilong yu? 6 Tingting gut. Laip bilong yu bai i pinis, na bai yu dai na kisim bagarap. Mobeta yu lusim pasin birua na bihainim ol lo bilong Bikpela. 7 Tingting gut long kontrak Bikpela i bin mekim na long ol lo em i bin givim. Na yu no ken kirapim kros wantaim ol arapela manmeri na tu yu no ken wari long ol longlong pasin bilong ol.
Pasin bilong tok pait
8 Maski, yu no ken resis na tok pait. Nogut sin bilong yu i go bikpela. Long wanem, ol manmeri bilong kros i save kirapim ol pait. 9 Na ol manmeri bilong mekim sin bai i bagarapim gutpela sindaun bilong ol pren, na bai ol i kamapim pasin birua namel long ol manmeri i stap gut. 10 Paia i save kamap traipela moa sapos yu hipim planti paiawut. Na pait i save kamap bikpela moa sapos ol manmeri i bikhet. Tru tumas, sapos ol manmeri i gat bikpela strong, bai kros bilong ol i moa moa yet. Tasol sapos ol i gat planti mani samting, bai belhat bilong ol i pairap nogut tru. 11 Ol manmeri bilong kros hariap i save kirapim bikpela trabel, na kwiktaim bai wanpela man i kisim bagarap. 12 Sapos yu winim paia, bai em i lait bikpela. Sapos yu spet long liklik paia, bai em i dai. Na maus bilong yu i save kamapim dispela tupela samting wantaim.
13 Yupela Sir 51.2-6, Je 3.5-12 ol manmeri i mekim tok baksait na tok giaman, yupela bai i kisim pe nogut. Long wanem, yupela i bin bagarapim gutpela sindaun bilong ol manmeri. 14 Tok baksait i mekim planti manmeri i pret, na ol i ranawe i go long olgeta hap nabaut. Em i bagarapim ol biktaun, na i pinisim ol gavman. 15 Tok baksait i save rausim ol gutpela maritmeri long haus bilong ol, na ol i no inap long kisim pe long hatwok bilong ol. 16 Ol manmeri i bilipim ol tok baksait, ol bai i no inap painim malolo na bel isi long laip bilong ol. 17 Sapos ol i paitim ol manmeri long kanda, orait skin bilong ol bai i solap. Olsem tasol ol manmeri bilong toktok nogut i save pinisim olgeta strong bilong ol manmeri. 18 Bainat i bin kilim i dai planti manmeri, tasol toktok nogut i kilim planti moa yet. 19 Ol manmeri i abrusim dispela kain toktok, ol i ken amamas, long wanem, ol i no pilim strong bilong tok nogut. Ol i no bin karim hevi bilong tok kros. Na ol i no bin pas long sen bilong tok giaman. 20 Hevi bilong tok baksait i olsem hevi bilong ain, na strong bilong en i olsem strong bilong bikpela sen. 21 Yes, tok baksait i save kilim tru ol manmeri. Mobeta yumi dai nau tasol.
22 Dispela tok nogut i no inap long winim ol stretpela manmeri, na em i no inap long kukim ol. 23 Tasol em bai i holimpas ol manmeri i lusim Bikpela, na em bai i pinisim ol long paia i no save dai. Tru tumas, tok baksait i olsem laion i ranim ol, na i olsem weldok i kaikaim ol.
24 Was gut. Banisim ples bilong yu long rop i gat nil, na haitim gut ol silva na gol bilong yu. 25 Skelim gut ol toktok bilong yu, na pasim maus bilong yu olsem dua i gat lok. 26 Lukaut. Nogut yu mekim tok kranki, na yu pundaun long han bilong birua.