Godigo te Israel bage dali po elalubao
4
(Dąį 4-13)
Genuai Bidigo Israel po tų ilali
1 Genuai Bidigo te kantri tǫde bidibo we bidi dabeba po kisilama wali.
Dage Israel, te Genuai Bidigo po odao.
Agai te tama po wai,
“Te bulu tǫ kantride bidibo we bidi dabego
te mu po wabo kolesaga konesiąma,
tama augwa abagi dabe digi
te godolo homu me ebeo.
Augwaligo te ena augwa Genuai Bidi da
homu me isąwai.
2 Augwaligo te po dąų wali,
tiali goli augwaligo wali me pisąwai.
Augwaligo tibo po olama, tama bidi ela muyu,
te nai doado bage wi siyu,
tama penani eyu ebo dao,
tama augwa te bidi ela mubo sę ela pabo dao.
Tama te dwai kolesaga te genuai mu pedelama,
3 tama tibaso, te tǫ wa pai.
Tama te tǫde elalubo nai tigidali,
te hasa dabe, me ba dabe, me sųgų dabe,
te tigidali isibo dao,” wali.
Genuai Bidigo te pris dabe po tų ilama, tama augwaliba wado po wai
4 Genuai Bidigo po ma weyu,
te tiwai po wai,
“Te mena bidi me deligo te we bidi dabe
po tų me iligobeo, magi baso meni,
te dwai kolesaga page augwalide me
elalubeo. Meni.
Te dage prisde po elalubao,
tama tiyu eno dage dali po elalubao,” wali.
5 “Tigidali sogo dagego sę yali,
tiali goli dagego sę besela palama eyu,
tama dagego geda mubo dao.
Tama te profet dabego me tama naga tibo dao.
Tama tibaso, eno te Israel dolaibao,
te dagego ida tiwai dao.
6 Te we bidi dabego ena bugagia konesiąbaso,
augwaligo ena wali me asobeo,
tama teyu, te augwali dolaibao,” wai.
“Dage pris dabego ena wali me asisąyu,
tama dagego eno po sela sąwanio.
Tama tiyu, te eno dage sela sąwaibao.
Tama eno te dagego wai dabe me
te eno pris pedalumainu me egobeo,” wai dao.
7 “Dage pris te hauwa mu pedelali,
tama tiyu dagego dwai sę hauwa mu yali.
Megi dage genuai nogi elalubo,
tiali goli te eno dage aiyaba elaluama,
tama dage dwai hale mu yaibao,” te po wai.
8 “Te eno we bidi dabego dwai sęgę selama,
tama tede te hasa dabe ofa mayu,
tama te ofa nai te dagego tubo nai tiwai ebao.
Tama tiyu, dagego te tobage ofa nai hauwa somainu eyu,
dagego te we bidigo dwai sę umabo
emainao homu mu ebao,” wai dao.
9 “Tama tibaso, eno te we bidiba
dwai dene mayu, te augwali dolaibao,
tama dage pris dabe me te sabo dene tiwai saibao,” wali,
“te eno dwai dene mabo sę dageba eyu,
te dagego yali dwai kolesaga
wei ponoyu tiaibao,” wai dao.
10 “Te dagego wiegi yai nai tueibao,
tiali goli, te dage tabi elama pągągobeo.
Te dagego tibo god dabeba lotu weyu,
tama te wai hauwa ame naibao homu elama,
te penani ebo kolesaga yaibao,
tiali goli te dage wai meni yaibao.
Magi baso meni, te dagego ena tudiba munama,
tama dagego te tibo god naga
wali pabo dao,” Godigo te po wai.
Genuai Bidigo te tibo godiba lotu wabo bidi dabede haliga sębę yali
11 Genuai Bidigo te po wali,
“Te haniani bomai wain ąįgo te eno we bidi dabego homu kolesaga
ayana palama, dolobo dao.
12 Tama augwaligo te olo ni dagego nigali
tibo god hanaluama,
te geme dualali po page pedalumainu yali.
Iya, tegoba, augwaligo homugo te ni dage dabego
te augwaligo koneainu ebo nai dabe
ola momainu homu elama tiali.
Awe, augwaligo ena tagalalio,
tama augwaligo te tibo god dabe wali pai,
te penani ebo we me deligo aga bidi
tagaliyu ebo tiwai yalio.
13 Augwali te bulu duba holama,
te tibo god dabeba ofa eyu,
tama te wiegi yai denami ebo ofa me,
te habu selali pesage te genuai ni page
dologode te ofa ebo dao,
magi baso meni, te ni dologode
te wiegi yai tiwąi madi elalubaso yai.”
“Tama tiyu, duga wegi dabe te sunumide
bilalubo we dabe tiwai ebao,” wai.
“Tama duga wąį we dabe me te penani ela bilibo dao.
14 Tiali goli, te eno augwaligo ebo
dwai kolesaga wei me ponogobeo,” wali.
“Magi baso meni, dage bidi dabe duga digi me
te tibo godigo lotu beba
te penani ebo we dabeba pabo dao.
Tama dage augwali dali deliba sisinama,
tama te tibo godiba ofa ebo dao.
Tama eno po dolo dageba te tiwai wali,
‘Dage te we bidi te wiegi yai
homu kolesaga elalusiąbo we bidi,
te dage dolaibao.’ Eno te po wali.”
15 “Dage Israel we bidi te penani we tiwai elama,
tama dagego ena tagalalio.
Tiali goli, tiyu dage te Juda we bidigo
te tobage kolesaga tiwai igimio.
Dage munu me te tibo lotu te Gilgalba
ma te Betelba me wagi pelamuo.
Dagego te tebo kolesagago
te Betel te dwai pesage pedalubo tiwai ebao.
Tama teyu, te eno be tiwai ąǫ me egobeo. * Te bulu nogi Betel wabo, te nogi page e tiwai dao, “Godigo be,” tama wabo dao.
Tama te bulu pesage side, dagego te po dąų walobo po
te eno nogide me wagio,
‘Genuai Bidi te sesemane bidada pabo dao.’
16 Te Israel dabe augwali te hagoma ebo
bulmakau dabe tiwai yai.
Augwaligo homugo te eno augwali
te sipsip tonalubo bidigo te aga sipsip dabe
tonalubo tiwai yaibao homu yali.
Tiali goli, augwali te hagoma mu eyu,
te eno usu me egobeo.
17 Te tibo godigo te Israel dabe kegalio.
Tagalao, te augwa homu wali pomainao.
18 Augwaligo te bidi dabego augwalide
dwagi yai homu yao, te homu me ebeo. Menio.
Augwaligo te hale ebo kolesaga naga godolo ebo dao.
Tama tiyu, augwa te ąį hauwa tulama,
tama gęǫ page yali, tama nosali
augwa penani ela palio.
19 Tialima, odao.
Te eno augwali te bomai waligo
te pobele bage hogomu
tolasa pelama sągi pabo tiwai eyu,
tama augwali dolaibao.
Tama augwa te tibo godiba ofa yali homu kone palama,
tama te augwali hale dwai mu yaibao,”
Genuai Bidigo te po wai.