Kuyie nhɑ́ kpɑnnɛ̀ bɛ̀ɛ̀ ǹ kpɑ̀nnɛ̀,

kɛ́dokɛ́nɛ̀ bɛ̀ɛ̀ n dokùnɛ̀.

2 Ítɛ́ kɛ́túótɛ́ kudɔpìkù kusɑ́m̀pɔ́kù nɛ̀ kudiɛkù.

Cómmú kɛ́ n dɛɛtɛ́.

3 Youtɛ ɑ kpɑ̃nnì nɛ̀ ɑ cɑ́úkù,

kɛ́bɑɑo bɛ̀ɛ̀ n fɛ̃́ũnko.

N nɑ́kɛ́ fɔ̃́ɔ̃̀ tumɛ̀ n dɛɛtíwè.

4 Bɛ̀ɛ̀ dɔ́ kɛ́ n kuɔ ifɛii bɛ̀ pĩ nkɛ̀ bɛ̀ɛ kɛ̃kɛ,

bɛ̀ɛ̀ n dɔ́nɛ̀ mɛyɛi, ifɛii bɛ̀ pĩ kɛ̀ bɛ̀ɛ bótí bɛ fɔ̃nkúò,

5 kɛ́nɑɑ́ ntiyontì kuyɑɑkù tɔ tì.

Kuyie ntɔ̃nnìi bɛ̀ bɛ̀ti.

6 Bɛ cɛɛ nɑɑ́ ndibiìnnì kɛ́ɑnkɛ,

kɛ̀ Kuyie ntɔ̃nnì mbɛ̀ bɛ̀tì.

7 Bɛ̀ sɔ̃̀ńtɛ́ kɛ n dii ticùɔ̀tì nti,

kɛ n keù difɔ̃̀tìrì kɛ̀ m bo do kɛ́kú.

8 Mɛhɑ́ɑ́rìmɛ̀ɛ bɛ̀ dɛ̀ɛ́tɛ́,

bɛ̀ɛ tɑ bɛ̀ dìí ntìì cùɔ̀tì miɛkɛ,

kɛ́do bɛ̀ keú dìì fɔ̃̀tìrì.

9 Kɛ̀ diwɛ̀ì ní nni mbo,

kɛ̀ nní nyɑ̃nku,

Kuyie nni nteenɛ̀mɛ̀ kpɛ́í.

10 N nɑ́ɑ́nnɛ̀ n yɛ̀mmɛ̀ mɛmɔu ndi,

kɛ tú òmɔù í dɑ dònnɛ̀ fɔ̃́ nKuyie,

fɔ̃́ɔ̃̀ ɔ̃ dɛɛtɛ́nɛ̀ ocĩ̀rì wèè ò kpeńnìnɛ̀,

kɛ dɛɛrí osénnìwè nɛ̀ bɛ̀ɛ̀ fèkù o kpɛrɛ.

11 Bɛ̀ nɑ̀ɑ́ mbɛ̀ í yɑ̀ tì nti,

Bɛ̀ m̀ bèkú nyí yɛ̃́ tì nti.

12 Kɛ̀ n dɔ̀ɔ̀ri mɛsɑ̀ɑ̀ nkɛ̀ bɛ̀ n dɔ̀ɔ̀ri mɛyɛi,

kɛ̀ m bo m mɑ́ɑ̀.

13 N dootitɔbɛ̀ ɔ̃ mmɔ nkɛ̀ n dɑ́ɑ́tí kufɔ̀ɔ̀tɔ̃̀nkù nku,

kɛ́bɛnkɛ n yɛǹcɑɑ̀rìmɛ̀

kɛ́boú dinùù kɛ́kɛ̃́kùnnɛ m mɑ́ɑ̀ kɛ́nsĩ́ĩ́,

kɛ́mmbɑ́ɑ́ nKuyie nsɑ̃́ɑ̃̀,

14 kɛ́ndò n nɛ́po yoo n tebitɛ, kɛ̀ n yììkɛ̀ ńsɔ̀ù,

kɛ̀ n yɛ̀mmɛ̀ɛ cɑɑ̀rɛ̀ kɛ́ndò n yɔ̃ ku.

15 Kɛ̀ n do dìì mɔ̀nnì bɛ̀ nɛ́ tíí kɛ́ nni ndɑú,

kɛ́wɛ̃nnɛ́ kɛ́ nni ndɔɔri mɛyɛi,

kɛ̀ bɛpɔ̀ɔ̀bɛ̀ n yí yɛ̃́ bɛ̀ nni nnɑ́ɑ́ ntiyɛiti.

16 Bɛ̀ɛ̀ í dé Kuyie nnɛ̀ bɛ̀ɛ̀ dɑú bɛnìtìbɛ̀

kɛ̀ bɛ̀ wɛ̃nnɛ́ kɛ n dɑú mɛdiɛ̀,

kɛ mɑɑ̀ nyɛbìɛ̀ n kpɛ́í.

17 N Yiɛ̀ nKuyie nhɑ yó nni nwúónkomɑɑ̀?

N dɛɛtɛ́nɛ̀ bɛ kó kuyonku,

bɛ̀ tu yɛcìrícìrɛ̀ nyɛ.

18 M bo ndɑ sɑ̃ntí ditĩ̀nnì cuokɛ̀,

kɛ́ ndɑ sɑ̃ntí kubotí diɛkù cuokɛ̀.

19 N dootitɔbɛ̀ bɑ́ nyɑ̃nku n kpɛ́í,

bɛ̀ɛ̀ sɔ̃́ntɛ́ kɛ n níí bɛ̀ bɑ́ nni nhũũnnɛ̀ inuɔ.

20 Bɛ̀ í nɑ́ɑ́ ndiwɛ̀ì kó tinɑ́ɑǹtì bìtì!

Bɛ̀ dɑ̀kii kɛ bo dɔ̀ɔ̀ mɛyɛi mmɛ dihɛì kó bɛnitisɑ̀ɑ̀bɛ̀.

21 Kɛ ɑɑri tinùùtì kɛ tú: Àɑ̀ ti dɑ yɑ̀mu!

22 N Yiɛ̀ nKuyie nhɑ wúómmu dɛ̀ɛ̀ dɔ̀ɔ̀ri,

bɑ́ ncĩ́ɛ̃́kɛ́, bɑ́ n dɛ́tɛ́nɛ̀.

23 Kuyie nyítɛ́ kɛ́ n kónnɛ́!

N Yiɛ̀ nKuyie nhentɛ kɛ́kpɑ n kpɑ̀nnì.

24 N Yiɛ̀ nKuyie nhɑ wennimu,

n kónnɛ́ kɛ̀ bɛ̀ bɑ́ nni ndɑú.

25 Bɑ́ yóu kɛ̀ n dootitɔbɛ̀ dɔ̀:

Tóò! Ti do mɛ ndɔ́,

ti ò mɑɑnkomu.

26 Bɛ̀ɛ̀ do n dɔ́nɛ̀ mɛyɛi nkɛ yɑ̃nku,

ifɛii bɛ̀ pĩ nkɛ̀ dɛ̀ɛ bɛ̀ di,

ìi pĩ mbɛ̀ɛ̀ yɛ̀mmɛ̀ do dò mbɛ̀ m pɛ̃ɛ̃tɛ́,

kɛ̀ bɛ̀ɛ kɛ̃kɛ kɛ̀ ifɛii bɛ̀ pĩ.

27 Bɛ̀ɛ̀ yɛ̃́ nyí dɔ̀ɔ̀mɛ̀ mɛyɛi,

bɛ yɛ̀mmɛ̀ ńnɑɑti,

kɛ̀ bɛ̀ ḿbonɛ̀ kunɑɑtí

kɛ́nnɑ́ɑ́ nsɑ̃́ɑ̃̀ kɛ tú:

Dɛ́úkùnnɛ Kuyie nyètìrì kùù dɔ́ ku tɔ̃ntì kó mɛsɑ̀ɑ̀.

28 Mí mmɔ́mmuɔ m bo nnɑ́ɑ́ nhɑ wennimɛ̀,

m bo ndɑ sɑ̃ntí sɑ̃́ɑ̃̀.