61
Dɑfiti dɔ́mɛ̀ Kuyie nni nhò kɑ̃nkɛ́
1 Bɛdèmbɛ̀ kóo kótì dìèmmɛ̀ Dɑfiti yɛ̀nfɛ̀ kɛ biennɛ̀ tibómbonti iwɛ̃ĩ kpɛti.
2 Kuyie nkéntɛ́ n dɑbònnì,
keè m bɑ́ɑmmìi.
3 M bo kutemmɑ̀nku nku,
kɛ̀ n yɛ̀mmɛ̀ cɑ̀ɑ̀rɛ̀ kɛ̀ n dɑ kuɔ̀nnɛ̀,
n dee kupèrìkù n yĩɛ̃kɛ kù.
4 Fɔ̃́ɔ̃̀ tu n kó disɔ̀rì,
didènnì kperì ti dootitɔbɛ̀ í yóó nintɛ dì.
5 N dɔ́ kɛ́mbo ɑ cĩ́ɛ̃̀tɛ̀ miɛkɛ nkɛ,
kɛ́nsɔri ɑ fìɛ̀ti miɛkɛ sɑ̃́ɑ̃̀.
6 Kuyie nfɔ̃́ɔ̃̀ kèè n dɑ nɑ́ɑ́ ntì,
kɛ duɔ́ nhɑ kɔbɛ bɛ̀ɛ̀ dɑ dé bɛ kó kɛtenkɛ̀ sɑ̀ɑ̀kɛ̀.
7 Yíɛ́ okpɑ̀ɑ̀tì mufòmmu,
kòò nfòù yɛbie nyɛbie.
8 Kòò ndɑ tɑunnɛ̀, ɑ́ nhò bonɛ̀ kòo mbɑkɛ́ sɑ̃́ɑ̃̀,
kɑ̀ɑ sɑ̀ɑ̀ nnɛ̀ timɔ́mmɔnti nhò bɑ̀ɑ.
9 M bo ndiè nkɛ dɛ́úkùnko ɑ yètìrì sɑ̃́ɑ̃̀,
bɑ́ dìì yiè kɛ́ndɔɔri n yɛ̃ n yóó dɑ dɔɔ̀ tì.