70
Dɑfiti dɔ́mɛ̀ Kuyie nhò tee mmɛcɑ̃ɑ̃
(Wéntɛ́ Yɛsɑ̃ɑ̃ 40:14-18)
1 Bɛdèmbɛ̀ kóo kótì dìèmmɛ̀ Dɑfiti yɛ̀nfɛ̀ kɛ denniní Kuyie nkpɛ́í.
2 Kuyie, nyɑ̀ n dɛɛtɛ́!
Cɑ̃rikɛní kɛ́ n tee.
3 Bɛ̀ɛ̀ n dɔ́nɛ̀ mukṹṹ ifɛii bɛ̀ pĩ́ nkɛ̀ bɛ̀ɛ sĩ́nnɛ́,
bɛ̀ɛ̀ n dɔ́nɛ̀ mɛyɛi bɛ̀ɛ di ifɛi kɛ́wɛ̃tɛ bɛ fɔ̃nkó.
4 Bɛ̀ɛ̀ n dɑú kɛ tú wũ̀ɔ̃̀ɔ̃̀,
ifɛii bɛ̀ pĩ́ nkɛ̀ bɛ̀ɛ bótí.
5 Bɛ̀ɛ̀ dɑ wɑɑ̀ ndɛ̀ mbɛ̀ nɑɑti kɛ̀ bɛ̀ nyɑ̃nku,
diwɛ̀ì mbo bɛ̀ɛ̀ dɔ́ fɔ̃́ nhOdɛɛtíwè,
bɛ̀ nnɑ́ɑ́ nsɑ̃́ɑ̃̀ kɛ tú ɑ yètìrì ndɛu.
6 N tú osénnìwè nwe, ocĩ̀rì,
Kuyie mmɔ́nnɛ́ní kɛ́ n tee.
Fɔ̃́ɔ̃̀ tu n teentì n dɛɛtíwè.
N Yiɛ̀ nKuyie mbɑ́ɑ́ ɔɔtɛ!