64
Ngode Datagaliwabehondo handayaho habe lalu bi lenego ogo
1 Ngode Datagaliwabe-o i̱na genda timbuniore howa
í̠hondo bi larogo hale habe.
I̱ waitigi karu hondowa gi ho kogoni.
Tigua i̱ bo waholigo í̠na i̱ handayaho habe laro.
2 Agali ko biaga karume ndelalu hariga tai bialu
i̱ bo wahole mo mogobu kagoni.
Tigua i̱ mo ko nahelo í̠na i̱ handayaho habe.
3 Tinaga hége ayu tibu ne gadelehe ale howa
tigua bi ko lararume i̱ timume bogole edaho hagadagua kagoni.
4 Tigua ha do ho howa agali bayale kagoha
timu bo pelagadagua ndelalu kagoni.
Agali urunime gi nahaga howa ke̱ gibi hararume
timu ala baga biagadagua balu kagoni.
5 Tigua mana ko uruni bulenaga✡ Iba 10.11, 59.7, Min 1.11
tini mo hongo hagahaga bialu ka.
Agali bayale karu gonoha delonaga
tigua gono ogoha wimi̱ya laga bialu kagoni.
Tigua gono wuwa lo mitangi bialu,
O beremagoni mbiralime nahondolebira, laga ka.
6 Mana ko ngaru bule tigua pongo bo wialu howa lalu,
Iname mana ko gibiore mbira bulene hariga handa walia harimagoni, lalu ka.
Agalinaga bu habaneha mini wia do ho kago o gibihego
iname handabe naheore kamagoni.
7 Agali korume bi ogonibi laragoyu Ngode Datagaliwabehanda ibunaga timume ti baragola
ti abale ibira holebira.
8 Tigua agali maru karu bo wahole layagonaga
Ngode Datagaliwabehanda tini bo wahai holebira.
Wali agali maru karume ti de handaya howa
mege bialu tinaga ma bonge laga bulebira.
9 Wali agali bibahendeme Ngode Datagaliwabehondo gi hai holebira.
Tigua Ngode Datagaliwabehanda biyarunaga te laga bialu howa
mitangi bu haabo holebira.
10 Wali agali tigabi biaga karume✡ Iba 32.11, 58.10, 68.3
Anduane Homogohanda biyarunaga turu holebira.
Tigua ibuha ha do ho howa bayale holebira.
Wali agali mini bayale karume
Ngode Datagaliwabenaga mini yaraga haabo helo laro.