9
Ala b’a janto ɲanibagatɔw ra
1 Dɔnkirilabagaw kuntigi. Dɔnkiri min bɛ la ni filen ni gɔni ye. Dawuda ta Zaburu.* 9.1 Zaburu sura kɔnɔntɔn, ani sura tan ta hayanw bɛɛ kelen kelen bɛ damina ni heburukan sigininden dɔ ye, k’a ta a sigininden fɔlɔ ra, min ye Alɛfu ye, ka taga a bla a laban na min ye Tavu ye.
2 Matigi Ala, ne bɛ i fo ka i waleɲumanlɔn ni ne jusukun bɛɛ ye,
ne bɛna i ta kabakobaw bɛɛ lakari.
3 Ne bɛna ninsɔndiya, ka ɲagari kosɛbɛ ele Matigi Ala ta jɛnɲɔgɔnya kosɔn;
ne bɛna Alatandodɔnkiriw la ka i tɔgɔ tando, ele Ala kɔrɔtaninba!
4 Ne juguw sekɔra ni o kɔ ye;
o bɛ talon ka ben, ka halaki i ɲa kɔrɔ;
5 sabu ele le bɛ ne ta kiti tigɛ, ka ne ta jo di ne ma.
I siginin bɛ i ta masasiginan kan, i bɛ kiti tigɛ ka kaɲa ni terenninya ye.
6 I ka siya tɔw jaraki, ka mɔgɔjuguw halaki;
i ka o tɔgɔ jɔsi ka bɔ yi pewu!
7 Ne juguw bɛɛ banna, o sigiyɔrɔw kɛra tomo lawuribariw le ye;
i ka o ta duguw cici, mɔgɔ si hakiri tɛna to o ra tuun.
8 Matigi Ala kɔni siginin bɛ a ta masaya ra wagati bɛɛ,
a siginin bɛ a ta masasiginan kan, ka kiti tigɛ.
9 Ale le bɛ dunuɲa mara ni terenninya ye,
ka mɔgɔw ta kiti tigɛ ka ɲa.
10 Matigi Ala le ye sɛgɛbagatɔw dogoyɔrɔ ye,
ale le ye o dogoyɔrɔ ye o degu wagatiw ra.
11 O kosɔn minw ka i tɔgɔ lɔn, olugu bɛ o jigi la i kan;
sabu minw bɛ i yɔrɔɲini, i tɛna olugu to o kelen na, Matigi Ala.
12 Aw ye Alatandodɔnkiriw la Matigi Ala ye, Ala min siginin bɛ Siyɔn,
aw ye a ta kokɛninw lakari mɔgɔw ye.
13 A bɛna mɔgɔfagabagaw ɲininka, sabu o ka mɔgɔ minw faga, a hakiri bɛ olugu ra;
a tɛ ɲina ɲanibagatɔw kasikan kɔ.
14 E, Matigi Ala, makari ne ra,
ne ɲanicogo flɛ ne kɔninyabagaw boro;
ele le bɛ ne lawuri ka bɔ saya ta so donda ra,
15 janko ne ye i tando ka i ta bonya bɛɛ lakari
Siyɔn dugu donda ra,
ka ɲagari i ta kisiri kosɔn.
16 Siyaw benna o yɛrɛ ta dinga soginin kɔnɔ;
o dogora ka jɔ min siri, o yɛrɛ sen minana o jɔ ra.
17 Matigi Ala k’a yɛrɛ yira, a ka kiti tigɛ can kan;
mɔgɔjugu ta kɛwalew kɛra jan ye k’a yɛrɛ mina.† 9.17 Nin yɔrɔ ra a sɛbɛra heburukan na ko: Higayɔni, Sela.
18 Mɔgɔjuguw bɛna taga saya dibi ra,
o siya minw bɛɛ bɛ ɲina Ala kɔ.
19 Nka Ala tɛ ɲina fagantanw kɔ ka o to yi ten,
ɲanibagatɔw jigi tigɛnin tɛ to yi ten tuma bɛɛ.
20 E, Matigi Ala, i wuri! I kana a to mɔgɔw ye se sɔrɔ!
Siyaw ta kiti ye tigɛ i ɲa kɔrɔ.
21 Matigi Ala, siranyaba bla o ra,
siyaw y’a lɔn ko olugu tɛ foyi ye ni adamaden gbansanw tɛ.‡ 9.21 Nin yɔrɔ ra a sɛbɛra heburukan na ko: Sela.
*9:1 9.1 Zaburu sura kɔnɔntɔn, ani sura tan ta hayanw bɛɛ kelen kelen bɛ damina ni heburukan sigininden dɔ ye, k’a ta a sigininden fɔlɔ ra, min ye Alɛfu ye, ka taga a bla a laban na min ye Tavu ye.
†9:17 9.17 Nin yɔrɔ ra a sɛbɛra heburukan na ko: Higayɔni, Sela.
‡9:21 9.21 Nin yɔrɔ ra a sɛbɛra heburukan na ko: Sela.