6
Suŋuuŋ to ŋeer tau moroghooŋ tiina ighamu
Mbouŋ to David
Ŋeer tau imuuŋ pa mbouŋ na, aat isaav pa tamtamon to tirav gita ve timbou mbouŋ tane
1 O Yoova, uyaon ghau toman atem yavyav sov.
Ve isaav ighe yo ughur pataŋani iŋarui ghau to upaduduuŋ ghau,
na ughamu toman atem yavyav kat sov. * Mbo 38:1
2 Yoova, yau besooŋa tsio. Lolom isaghatin ghau ve uul ghau lak!
Pa tapirig isov wa.
O Maaron, ugham ghau tinig poia.
Pa tuag isov iyavyav.
3 Yoova, lolog ipataŋan kat.
Pale upul ghau tauvene ila ila le ŋeez o isov?
4 Yoova, yo lolom isaghav tamtamon tsio ariaaŋ ve uluul zi.
Tauvene matam iŋgal ghau muul, ve upas ghau navot pa pataŋani tane.
Ugham mulin ghau lak.
5 Pa mateegha irau matazi iŋgal ghom muul mako.
Sei ta pale ighengheen ila naal ve ipait ghom? Mako. * Mbo 30:9, 88:10+
6 Yau nayakyak le tapirig isov.
Mboŋ ta naol ne, nataŋtaŋ le matag suuru ipot ila moogh tsiau.
7 Lolog ipataŋan kat ve nataŋ tiina le matag isarsar.
Pasaa, koiagŋa katini.
8 Yam zeran tau aghamgham ŋgar sasaghati na, asov aghau payau!
Pa taŋiiz tsiau, Yoova ilooŋa wa.
9 Yau nataŋ rarai Yoova pa uleeŋ, ve i ilooŋ suŋuuŋ tsiau.
Ghasoniiŋ tsiau, i aat iyok pani.
10 Pale igham koiagŋa tisov tiroi tiina ve mayazi.
Yes pale tivaghamgham, ve titoor zi rekia mon, ve titud mon ve tila.