23
Job Eliphaz a pathung
1 Hahoi Job ni a pathung teh.
2 Sahnin hai ka phuenangnae a patawpoung.
Ka kâhram lawi vah ka kut ni thayung awm hoeh toe.
3 Oe, ama teh nâ lah maw ao tie hah ka panue vaiteh,
a tahungnae koe ka phat haw pawiteh.
4 A hmalah ka kong heh ka phakhai vaiteh,
ka pahni teh na lawkpanuesaknae hoi a kawi han ei.
5 Na pathungnae lawk hah ka panue vaiteh,
kai koe a dei hane hah ka thaipanuek han ei.
6 Ka lentoe e hnotithainae hoi na taran han namaw
Na taran mahoeh, ka kong hah hoe na pouk pouh han doeh.
7 Hawvah ama hoi tamikalan ni pouk thai awh vaiteh,
lawkcengkungnaw koehoi yungyoe ka hlout han toe.
8 Khenhaw! hmalah ka cei, hateiteh ama la awm hoeh.
Hnuklah bout ka ban eiteh, ama teh ka hmawt thai hoeh.
9 Avoilae kut hoi a tawk navah ama teh ka khen thai hoeh.
Aranglae kut dawk a kamlang toteh ama hah ka hmawt thai hoeh.
10 Hateiteh, ka dawn e lamthung hah ama ni a panue.
Na tanouk toteh sui patetlah ka tâco han.
11 A khok dawk ka khok ni kacakcalah a kamtung teh,
a lamthung hah phen laipalah ka dawn.
12 A pahni dawk hoi kâpoelawk hah ka cettakhai hoeh.
A pahni dawk hoi ka tâcawt e lawk hah
ka panki e rawca hlak hai ka pâtung.
13 Hateiteh, ama teh buet touh lah ao dawkvah,
apinimaw a dum thai han.
A hringnae ni a sak han a ngai e pueng hah a sak.
14 Kai hanelah a pouk e hah a sak.
Ama dawk hot patet e hah moikapap ao.
15 Hatdawkvah, a hmalah o e hah ka taki.
Hetheh ka pouk navah ama ka taki.
16 Cathut ni ka lung a pout sak teh,
Athakasaipounge hah na taki sak.
17 Hatei, hmonae dawk hoi na kapek hoeh teh,
ka hma lae hmonae kadung poung e dawk na ramuk hoeh.