18
1 Amadueng kaawm e ni ama ngainae dueng a tawng teh,
lungangnae pueng hai a taran.
2 Tamipathu ni thaipanueknae dawk konawmnae tawn laipalah a
mae lungthin dueng a kamnue sak.
3 Tamikathout a tho toteh dudamnae ao,
yeiraiponae hoi yuenae hai hmawi ao van.
4 Tami e pahni dawk hoi ka tâcawt e lawk teh
kadung e tui patetlah ao teh,
lungangnae tuikhu teh ka lawng e palang patetlah ao.
5 Tamikathout e minhmai khet lahoi
tamikalan sung sak nahanlah lawkceng e heh hawihoeh.
6 Tamipathu e pahni dawk hoi kâyuenae lawk a tâco teh
a lawk ni hemnae hah a tâcosak.
7 Tamipathu e pahni teh ama rawknae lah ao teh,
a pahni teh ama hanelah karap lah ao.
8 Tamcueklawk teh katuipounge rawca patetlah ao teh,
von thung a thung totouh a kâen.
9 A thaw dawk ka pangak e teh karaphoekung e
hmaunawngha lah ao.
10 BAWIPA e min teh kacake imrasang lah ao,
tamikalan ni a kâen teh roumnae a hmu.
11 Tami katawntanaw e tawntanae teh,
amamouh pouknae dawkvah,
kacake khopui, karasang e rapan lah a o.
12 Rawknae kâhmo hoehnahlan tami lungpouk a rasang teh,
barinae ao hoehnahlan kârahnoumnae ouk ao.
13 Thai hoehnahlan lawk pathung e teh
pathunae hoi yeiraiponae doeh.
14 Tami e muitha ni a patawnae hah a khang thai,
hatei muitha rek e teh apinimaw a khang thai han.
15 Kho ka pouk e lungthin ni panuenae hah a pang teh,
tamilungkaang e hnâ ni panuenae hah a tawng.
16 Poehno poe e ni lam a kâko sak teh,
kacuenaw hmalah na phakhai.
17 Amahoima hmaloe ka kâdei e teh
tamikalan lah pouk e lah ao eiteh,
a imri ni akung ouk a khei.
18 Cungpam rayunae ni kâounnae a roum sak teh
athakaawmnaw hah a roum sak.
19 Hmaunawngha lungkuep sak hoeh e teh
khopui tâ e hlak aruhnawn,
lawk kâounnae teh sum hoi kâtaren e patetlah ao.
20 A pahni dawk hoi ka tâcawt e a paw hoi a von a paha vaiteh,
a pahni paw hoi a lung a kuep han.
21 Hringnae hoi duenae teh lai bahu dawk ao teh,
lai ka lungpataw e ni laipaw a ca han.
22 Yu kahmawt e ni hnokahawi a hmu teh,
BAWIPA koehoi ngaikhainae ka pang e tami doeh.
23 Tamimathoe ni teh a kâhei, hatei ka tawnta e niteh
lawk kahram lah ouk a dei.
24 Hui kapap ka tawn e teh hui kahawi lah
ao van hanelah ao,
hatei hmaunawngha hlak kahnai e huiko hai ao.