29
1 Voutsout yue eiteh a lahuen ka patak sak e tami teh,
hawinae awm laipalah hmawi a rawk han.
2 Tamikalan ni kâtawnnae a tawn toteh tamimaya a konawm awh,
hatei tamikathout ni a uk navah tamimaya a cingou awh.
3 Lungangnae ka ngai e ni a na pa a konawm sak,
hatei kâyawt e hoi kamyawng e tami ni a hnopai koung a pâbaw.
4 Siangpahrang ni lawkcengnae lahoi ram a caksak,
hatei tadawnghno ni ram a rawk sak.
5 A imri laithoe lahoi ka oup e teh a khok kâman nahanlah
tamlawk a yangda pouh.
6 Kâtapoenae ni tamikathout a man,
hatei tamikalan teh la sak lahoi a lunghawi.
7 Tamikalan ni tamimathoe hanlah a pouk,
hatei tamikathout ni teh banglahai noutna hoeh.
8 Kadudamnaw ni khopui hmai a sawi,
hatei tamilungkaang ni teh lungkhueknae a takhoe thai.
9 Tamilungkaang ni tamipathu hoi kâyue pawiteh,
tamipathu a panui hai thoseh,
a lungphuen hai thoseh banglahai tho hoeh.
10 Tami kathetnaw ni tamikalan a hmuhma awh,
tamikalan teh hawinae hah a tawng.
11 Tamipathu ni a pouk e pueng hah a dei,
hatei tamilungkaang ni teh a panguep.
12 Ukkung ni laithoe dei e banghai nahoeh tet pawiteh,
a sannaw pueng teh tamikathout lah koung a coung awh.
13 Tamimathoe hoi repcoungroenaw ni cungtalah a hmawng e teh,
BAWIPA ni a mit reirei a ang sak.
14 Atangcalah tamimathoe hanelah
lawkcengkung siangpahrang teh,
a bawitungkhung a yungyoe caksak lah ao han.
15 Bongpai hoi yuenae ni tami a lungangsak teh,
ka pangak e camo ni a manu yeirai a po sak.
16 Tamikathout apapnae koe kâtapoenae apap,
hatei tamikalan ni a rawk awh e hah a hmu.
17 Na capa hah yue yaw lannae na poe han,
hothloilah hring nawmnae na poe han.
18 Vision ohoehnae koe tami pueng a thathoe awh,
hatei kâlawk ka tarawi e teh tami yawkahawi e doeh.
19 San teh lawk hoi dueng yue thai lah awm hoeh,
bangkongtetpawiteh a thai eiteh tarawi laipalah ao thai.
20 Pouk laipalah lawk ka deirumram e ouk na hmu ou,
hot patet e tami koe hlak teh
tamipathu koe ngaihawine bet aohnawn.
21 Camo nah ekvoi pahren e san teh a cue torei teh
calan e lah ao han.
22 A lung ka khuek e ni kâyuenae a tâcokhai teh,
ka matheng e ni kâtapoenae pou a tâcokhai.
23 Ma e kâoupnae ni na rahnoumsak han,
hatei muitha lahoi kârahnoum e ni barinae a coe.
24 Tamru hoi kamyawng e teh
amae hringnae ka hmuhma e tami doeh,
lawkkatang dei hanelah thoe a kâbo ei dei kalawn hoeh.
25 Tami barinae ni karap patetlah na man,
hatei BAWIPA kâuep e teh rungngang lah ao han.
26 Tami kapap ni ukkungnaw e lungyouknae hah a tawng awh,
hatei taminaw hanelah lawkcengnae teh
BAWIPA koehoi doeh a tho.
27 Tamikalanhoehe teh tamikalan hanelah panuet a tho e patetlah,
tamikalan teh tamikalanhoehnaw hanelah panuet a tho van.