25
Ngaithoumnae hoi rungngangnae
Kathutkung: Devit
1 Oe BAWIPA nang koe ka ratoum.
2 Oe ka Cathut nang teh na kâuep dawkvah,
Kayanae koe na phat sak hanh,
ka tarannaw ni na tâ hanh naseh.
3 Nang na karingnaw teh kayak awh mahoeh.
Hatei, nang taran hanlah a hue karangnaw teh a kaya awh han.
4 Oe, BAWIPA na lamthung hah
na cangkhai nateh na panuek sak haw.
5 Nang teh kaie rungngangnae lah na o dawkvah
na lawkkatang boiboe lah hringnae teh na cangkhai haw.
Amon hoi kanîloum ditouh nang hah na kâuep han.
6 Oe BAWIPA yampa hoi ka lathueng vah
na la kamnue sak e lungpatawnae, pahrennae teh pahnim hanh.
7 Ka naw nah ka yonnae hoi ka payonnae teh
na ngaithoum haw, kacakpounge na lungmanae hoi
na hawinae kecu dawk kai teh na pahnim hanh Bawipa.
8 BAWIPA teh a lan teh ahawi.
Tamikayonnaw ni a dawn e lamthungnaw hai a cangkhai.
9 A lungthin kârahnoum e teh lam kalan dawk a hrawi teh
angnae hno hah a cangkhai.
10 A lawkkam hoi kâlawk katarawinaw teh
lungpatawnae hoi a hrawi teh yuemkamculah a ceikhai.
11 Oe, Cathut ka yonnae teh banghloi kalen nakunghai
na min lahoi na ngaithoum haw.
12 BAWIPA kâlawk ka tarawi e teh
a dawn hane lamthung a panue han.
13 Lungnem lahoi na o vaiteh na canaw teh
hete ram dawkvah phu kanepcalah kho a sak awh han.
14 BAWIPA e kâlawk katarawinaw e hui lah
ao teh a lawkkam teh a cangkhai awh.
15 BAWIPA teh kâuep yungyoe,
hatdawvak tangkam dawk hoi ka khoh hah a rasa han.
16 Oe, BAWIPA kai koe lah kangvawi nateh na pahren haw,
bangdawk tetpawiteh ka o a ru teh ka thayung abaw.
17 Ka lung reithainae naw pueng teh na panue patetlah
ka runae pueng koehoi na rungngang haw.
18 Ka reithainae puenghoi ka khangnae naw pueng hah,
na pouk pouh teh, ka yonnae naw pueng teh na ngaithoum haw.
19 Ka tarannaw apap e hoi,
kai puenghoi na hmuhma awh e hah pouk haw.
20 Ka hringnae ring nateh na rungngang haw.
Hloutnae hmu ka ngai dawkvah nang teh na pâtam.
Yeiraipo hoi na awm sak hanh.
21 Nang teh na kâuep dawkvah ka hawinae hoi
laithoehoehnae ni na la ngue lawi seh.
22 Oe, BAWIPA Isarelnaw runae koehoi
rungngang haw.