45
Messiah hoi a langa bawilennae
Kathutkung: Korah capanaw
1 Ka lungthin heh hnokahawi hoi a poum teh,
Siangpahrang kong hah ka dei han.
Ka lai teh ca kathutkung e cacung patetlah coungkacoe ao.
2 Nang teh tami capanaw hlak na mei ahawihnawn.
Na pahni dawk pahrennae awi lah ao.
Hatdawkvah, Cathut ni yawhawi pou na poe.
3 Oe athakaawme, na bawilennae hoi na taluenae hoi,
na tahloi teh na keng dawk kâyeng haw.
4 Lawkkatang hoi kârahnoumnae hoi lannae kecu dawkvah,
na taluenae hoi ka tânae lahoi marang dawk kâcui haw.
Hottelah, aranglae kut hoi kângairu hnonaw hah na cangkhai han.
5 Ka pasum e tahroe hoi siangpahrang e tarannaw e lung teh
poukkayawng lah thun naseh.
Na lungtabue dawk koung rawm awh naseh.
6 Oe Cathut, na bawitungkhung teh a yungyoe kangning e doeh.
Lannae na sonron hai na ram sonron lah doeh ao.
7 Lannae hah lung na pataw teh, thoenae hah na hmuhma.
Hatdawkvah, Cathut, na Cathut ni, satui hah na awi toe.
Na huinaw hlak hai, konawmnae satui hah na awi toe.
8 Na khohna pueng dawk hoi murah hoi aloenaw hoi,
khasia hmuitui a hmui teh, kasaino hoi pathoup e
siangpahrang imnaw ni na lunghawi sak.
9 Bari kaawm e napui na tawn e naw thung dawkvah,
ramlouk siangpahrangnaw e canunaw hai a bawk teh,
nange aranglah Ophir sui hoi kamthoup e siangpahrangnu teh a tahung.
10 Oe, Canu thai haw, pouk nateh na hnâpakengh.
Na taminaw hoi na pa im kaawm e naw hai pahnim haw.
11 Hottelah pawiteh, siangpahrang ni na meihawinae hah
a ngai katang han, ahni teh na bawipa doeh, bari haw.
12 Taire canu ni poehno sin vaiteh, tamimaya thung dawk hoi
na tawnta e ni na minhmai hawi a tawng awh han.
13 Siangpahrang im e siangpahrang canu teh,
a sungrenpoung teh, a khohna teh sui hoi pathoup e lah ao.
14 Pathoup e hni kahawi kâkhu hoi siangpahrang koe cetkhai awh vaiteh,
tanglakacuemnaw ama hnukkâbang hane naw hah
ahni koe a thokhai awh han.
15 Lunghawi thahmeica lahoi thokhai awh vaiteh,
siangpahrang im a kâen awh han.
16 Napanaw yueng lah na canaw awm awh vaiteh,
ahnimouh teh talai van pueng dawk siangpahrang lah na o sak han.
17 Na min teh se pueng dawk panue hanelah ka sak han.
Hatdawkvah, tami ni pou na pholen han.