138
BAWIPA koe lunghawilawk deinae
Kathutkung: Devit
1 Oe BAWIPA, kai teh nange pahrennae hah
ka lungthin abuemlahoi ka pholen han,
cathutnaw hmalah nang koe pholennae la ka sak han.
2 Kai teh nange kathounge Bawkim koelah
kangvawi laihoi ka bawk vaiteh,
nange pahrenlungmanae hoi nange lawkkatang hanelah,
na Min teh ka pholen.
3 Bangkongtetpawiteh, nang teh nama ni na dei e naw hah na min onae lathueng vah na tawm toe.
Kai ni na kawnae hnin navah, nang ni na pato teh,
ka hringnae teh tha hoi na kawisak.
4 Oe BAWIPA talai van e siangpahrang pueng ni,
nange lawk a thai awh toteh, na pholen awh han.
5 BAWIPA e lamthungnaw dawk la a sak awh han.
Bangkongtetpawiteh, BAWIPA e bawilennae teh a len poung.
6 Atangcalah BAWIPA teh arasang ei nakunghai,
ka rahnoum e naw hah a khetyawt.
Hatei, kâoupnaw teh ahlanae koehoi a panue toe.
7 Kai teh runae um ka cet ei nakunghai,
Bawipa ni na hring sak han.
Bawipa ni a kut dâw vaiteh,
ka tarannaw e lungkhueknae hah ngang vaiteh,
Bawipa e aranglae kut hoi kai hah na rungngang han.
8 BAWIPA ni kai hanlah a noenae a kuep sak han.
Oe BAWIPA nange pahrenlungmanae teh a kangning.
Na kut hoi na sak e naw heh hnoun hanh lah a.