141
Kahawihoeh hno sakpayon hoeh nahanelah ratoumnae
Kathutkung: Devit
1 Oe BAWIPA, nang teh, kai ni na kaw.
Karanglah kai koe tho haw.
Kai ni nang na kaw nah kaie ka lawk hah na thai pouh haw.
2 Kaie ratoumnae teh na hmalah hmuitui hmaisawi e patetlah thoseh,
ka kut ka dâw e teh kanî a khup nah thueng e patetlah thoseh,
pouk e lah awm lawiseh.
3 Oe BAWIPA, ka pahni karingkung na tat pouh haw.
Ka pahni takhang hai ring haw.
4 Payonnae ka sak e taminaw hoi hawihoehnae sak nahanelah,
ka lungthin heh hawihoehnae koe lah na kangvawi sak hanh.
Ahnimae canei kawi hai na catnet sak hanh.
5 Tami kalan ni kai na hem naseh.
Hot hateh pahrenlungmanae lah ao.
Kai hah na yue naseh.
Hot hateh, lû dawk satui awi e lah ao.
Ka lû ni hot hateh mat hanh naseh.
Bangkongtetpawiteh, kaie ratoumnae niteh,
hawihoehnae ka sak e naw hah pou a taran han.
6 Ahnimouh ka ukkungnaw teh pango dawk tanawt lah ao awh han.
Hat toteh, kaie lawknaw teh ngai ao tie hah na panue awh han.
7 Talai tai e laitueng pâpâwn e patetlah,
kaie ka hrunaw teh phuen longkha koe a kâyat.
8 Hatei, Oe Bawipa Jehovah, kai teh, nang doeh na khet toe.
Nang doeh na kângue toe.
Ka hringnae hah kângue han kaawm hoeh lah awm sak hanh.
9 Ahnimouh ni kai hanelah sut patûng e tangkam dawk hoi thoseh,
payonnae kasaknaw e karap dawk hoi thoseh,
kai hah na khoum haw.
10 Kai ni hote tangkamnaw ka tapoung toteh,
tamikathoutnaw teh amamouh ni
a patûng awh e tangkam dawk reirei bawt awh naseh.