1 Tinti timɔu n tì yɑ̀mu nɛ̀ n nɔ̀nfɛ̀,

n tì kèèmu timɔu nɛ̀ n toò kɛ tì bɑntɛ́.

2 Di yɛ̃́ tì n tì yɛ̃́mu múnkɛ,

di í m pɛ̃ɛ̃tɛ́.

3 Muwɛ̃rímú mumɔu yiɛ̀ nwe mí n nɑ́ɑ́nnɛ̀mɛ̀,

n yóó beé nKuyie nku n kpɛti.

4 Díndi biɛ di sũ̀ṹ nsiyɑ́ɑ̀bìsí nsi,

di tú bɛtɑ̀mbɛ̀ bɛ̀ɛ̀ ciintɛ bɛ̀mbɛ bɛnìtìbɛ̀.

5 Kɛ̀ di pètinkɛ do dò nkɑ́rɛ kɛ í bɛ́i ntìmɑtì,

bɛnìtìbɛ̀ nɑ ndi wúó mmɛciì nyɛmbɛ̀ mbɛ.

6 N tɑti tinɑ́ɑ́mbeéntì nti, kéntɛ́nɛ̀ ti,

kéntɛ́nɛ̀ mɛsɑ̀ɑ̀ ntìì yɛ̀tìní n nùù miɛkɛ.

7 Di yɛ̀mmɛ̀ dò ndi bo cómmú Kuyie nfɔ̃nkúò nɛ̀ siyɑ́ɑ̀bìsɑ́ɑ̀?

Di bo nkù kòḿmú kɛ nɑ́ɑ́ nkɛ soúnnɑ́ɑ̀?

8 Di ku nkòḿmúmu mɛmmɑɑ̀?

Di nɑ́ɑ́ nkuù kpɛ́ínnɑ́ɑ̀?

9 Kɛ̀ kù di wèńtɛ́ kù bo nsɔ̃́ ndi wennɑɑ̀?

Di bo nɑ kɛ́ kù soutɛ́ kɛ́ndò ndinititɔùɑ̀?

10 Kɛ̀ di kù kòḿmú disɔ̀rì,

kù í yóó yóu kù bo di potɛ́mɛ̀.

11 Kuyie nkpetì í duò di kɔ̃m̀bùɔ̀tɑ̀ɑ̀?

Kufɔ̃wɑɑ́ nyí kù ndi bonɑ̀ɑ̀?

12 Di tṹṹ nkɛ nɑ́ɑ́ ntì dò mutɑ́pɛí mmu n yììkɛ̀,

di n tɛ̃́nnìnko tì dò ntiyɑɑmɑtì nti.

13 Cĩ́ɛ̃́kɛ́nɛ̀ bɑ̀mbɑ̀! Yóunɛ̀ kɛ̀ m bɛ́i!

Kɛ̀ tìì bo n tuɔ̀kɛní tì n tuɔ̀kɛní!

14 N cĩnnɛ̀ m buu ndi,

kɛ̀ n fòmmu bo n nɔutɛ́ntɛnnì ĩ́nkɛ̀.

15 Bɑ́ kɛ̀ kù bo n kuɔ, n yó nku mbekɛ́,

n yóó kù bɛnkɛmu n yí cɑ̀ɑ̀rɛ̀mɛ̀ dɛ̀mɑrɛ̀.

16 Dɛɛ̀ pètìnkɛ yó ntú n kó mɛcootímɛ̀,

kɛ yɛ̃́ onitiyɛiwe í yóó dɑ́ɑ́tímɛ̀ kɛ́cómmú Kuyie ndiɛkù ììkɛ̀.

17 Kéntɛ́nɛ̀ n nɑ́ɑǹtì mɛsɑ̀ɑ̀,

kɛ̀ n tì ndi wénkùnnɛ kɛ̀ tìi tɑ di to.

18 M bɑɑti tibeéntì nti,

m mɛ nyɛ̃́mu kɛ dò mmíì yó nnɑɑti.

19 Kɛ̀ kù dɔ́ kɛ́ n sɛnninɛ̀,

n yóó yĩ́o yúóó nwe di mmɔ̀nnì kɛ́kú.

20 Kuyie, n dɔ́ ɑ́ n dɔɔ̀ dɛ̀, dɛ̀ bo dɛ̀dɛ́rɛ̀ ndɛ,

kɛ̀ n nɑ kɛ́cómmú ɑ ììkɛ̀.

21 Bɑ́ nsɔkɛ́ kɛ m puotì,

bɑ́ nsɔkɛ́ kɛ donnìnko n kɔ̃m̀bùɔ̀tì.

22 Dɛ kó difɔ̃nkúò ɑ nɛ́ bo nɑ kɛ́bɛ́i kɛ̀ n dɑ tɛ̃́nnɛ́,

yoo m bɛ́i nkɑ̀ɑ n cɔ́útɛ́.

23 N cɑɑ̀rìmɛ̀ bo mɛdɛ nɛ̀ n yetímɛ̀?

N nɑ́kɛ́ n cɑ̀kɛ mù nɛ̀ n yetɛ́ dɛ̀?

24 Bɑ nte kɑ̀ɑ m bùtínnɛ́

kɛ n wúó nhɑ dootitɔù?

25 A yó nni mbɛtimu mí nkufɔ̃kpɛ̃rikɑ̀ɑ̀?

A bo nni nfɛ̃mmú mí nkumukperíkɑ̀ɑ̀?

26 Dɛ̀ yĩ́mɛ kɑ̀ɑ wɑ̃̀ri tì n kpɛ́í nkɛ̀ tì tu titiiti mɑ́ɑ̀,

kɛ n tounko m bíkɛ́mbɛ́ntì kó mɛyɛi?

27 Dɛ̀ dòmmɛ kɑ̀ɑ tɑ́ú n nɑɑ̀cɛ̀i

kɛ pɑkíí n cemmu

kɛ kɑɑ n nɑcɛ̀fɔ̃̀tɛ̀?

28 N kɔ̃̀ntì pɑ̃̀ɑ̃̀kɛmu,

iyɑɑbiɛ ɔ̃ɔ̃ cɑ́ɑ́kɛ́mɛ̀ kuyɑ̀ɑ̀kù.