2 N yɛntotí iì te kɛ̀ n dɔ́ kɛ́bɛ́i,

n yĩɛ̃kɛ mɛminnímɛ̀ mmɛ dɛɛ̀ te kɛ̀ n dɔ́ kɛ́bɛ́i.

3 A nɑ̀kɛ́ tì n yonkɛmu,

kɛ̀ n yóó dɑ tɛ̃́nnɛ́ nɛ̀ mɛciì.

4 A yɛ̃́mu kɛ dò nnɛ̀ ti bomɛ̀,

nɛ̀ Kuyie nkɑ̀nnɛmɛ̀ onìtì kɛtenkɛ̀ ĩ́nkɛ̀,

5 oyɛiwe kó kuyɛǹnɑɑtí ɔ̃ɔ̃ í mmɔ̀ntɛ,

osĩ̀nwè kó diwɛ̀ì ɔ̃ mmɑ sɑ́m̀pɔ́ nwe.

6 Bɑ́ kòo òkɛ̀ kɛ tùɔ̀kɛ kɛĩ́nkɛ̀,

bɑ́ kòo yuu kɑ́ɑ́ nyɛwɛtɛ̀.

7 Ò yóó pɛ̃ɛ̃tɛ́mu timútì kɔ̃mɛ kɛ̀ dɛ̀ɛ deè,

bɛ̀ɛ̀ do ò yɛ̃́ kɛ̀ bɛ̀ mbékú kɛ tú yé ò kɔ̀tɛ kɛ̀.

8 Ò yóó pɛ̃ɛ̃tɛ́mu tidɔùntì ɔ̃ɔ̃ yĩ́mɛ̀ bɑ́ ɑ bɑ́ nyɛ̃́ tì kɔ̀tɛ kɛ̀,

Ò yóó yɛntɛ́mu bɛ̀ ɔ̃ɔ̃ yɑ̀ dɛ̀ nɛ̀ tidɔùntì kɛyènkɛ̀ dɛ kɔ̃mɛ.

9 Fɛnɔ̀nfɛ̀ fɛ̀ɛ̀ do ò wùó nfɛ̀ tɛ̃́nkɛ bɑ́ɑ́ yɑ̀,

o kɑ̀rì tɛ̃́nkɛ bɑ́ɑ́ ò kɔ̃ṹ fɛnɔ̀nfɛ̀.

10 Bɛcĩ̀rìbɛ̀ bo pi o bí,

kɛ̀ ìì bɛ̀ tɛ̃̀ńnɛ́ ò do fèkɛ bɛ̀ɛ̀ kpɛrɛ.

11 O kɔ̃̀ntì do píɛ́kɛ́ muwɛ̃rímú mmu odɑcĩɛ̃̀ nkɔ̃mɛ,

kɛ nɛ́ yóó ò wɛ̃nnɛ́nɛ̀ kɛ́tɑ kudɔnkù.

12 Kɛ̀ mɛyɛi mmɛɛ̀ mɛ nnɑɑti o nùù,

kòò mɛ̀ sɔ̀nnɛ o nɔ́ndɛnfɛ̀ fũ̀ɔ̃̀.

13 Kòo mɛ̀ u kɛ í dɔ́ kɛ́ mɛ̀ tìútɛ́,

kɛ mɛ̀ dɑ̀nnɛ̀ o dɑndɑɑkù sɑ̃́ɑ̃̀, kɛ̀ mɛ̀ dɑ̀ri.

14 Mɛ̀ yóó tɑroo o pɔutì miɛkɛ kɛ́ceetɛmu,

mɛ̀ yóó nɑɑ́ mmɛdɑutidɔ̀mmɛ̀ mmɛ o miɛkɛ.

15 Ò mɑmmú tìì kpɑ̀tì ò bo tì tɔ̃́,

Kuyie mbo duɔ́ nkòo wɛ̃tɛ kɛ́ tì tĩ̀ṹtɛ́ní.

16 Ò yɔ̃̀ ndɛ̀ dò mmɛdɑutidɔ̀mmɛ mmɛ,

mɛɛ̀ yóó ò kùɔ.

17 Ò tɛ̃́nkɛ bɑ́ɑ́ yɑ̀ mɛcekùɔ̀ pũɔ̃̀ ndɛ̀ kukó nkɔ̃mɛ,

nɛ̀ mɛnɑɑmiɛ̀ mpũɔ̃̀ ndɛ̀ kɛ dò nkukó.

18 Ò ɔ̀u kɛ cɔ̃ntɛ dɛ̀ ò bɑ́ɑ́ dɛ̀ di,

ò dɔ̀ɔ̀ kupotɑɑ́ nkɛcɔ̃ntɛ dɛ̀ í yó ntú o kpɛrɛ,

ò bɑ́ɑ́ di dɛ kó diwɛ̀ì mɑrì.

19 Kɛ yɛ̃́ ò sènkɛ̀rìmɛ̀ bɛcĩ̀rìbɛ̀,

kɛ bɛ̀ sénnìnko, kɛ yùúkú tɛcĩ́ɛ̃̀tɛ̀ ò í mɑɑ́ tɛ̀.

20 Ò do mɑɑ́nko dɛmɔu ndi kɛ í diɛ̀,

kòò yɑɑ ndɛ̀ ò bɑ́ɑ́ dɛ̀ yóu.

21 Ò do ɔ̃ nkòo yɑ̀ dɛ̀, wèe mɑɑ́nkomu,

dɛɛ̀ te kòo wɛ̀ì í yóó mɔntɛ.

22 Ò yó mbo mɛtuɔ̀ mmiɛkɛ nkɛ, kɛ̀ mɛsémmɛ̀ɛ ò do,

mɛyɛi nkó tiyɛ̃ĩti timɔu doti weè ĩ́nkɛ̀.

23 Ò yóó ndɑkɛnɛ̀ o pitiri ndi,

kɛ̀ Kuyie nkó kɛmiɛkɛɛ do o ĩ́nkɛ̀,

kɛ̀ cutiní o ĩ́nkɛ̀ fɛtɑɑfɛ̀ kɔ̃mɛ mmɛ,

kɛ yóó nɑɑ́ nho kó mudiì.

24 Kòò nɑ kɛ́yentɛ́nɛ̀ timɑ́tì kó tikpɑ̀rìseuti,

disɔɔwũɔ̃̀ kó ipie nho tùɔ̀ti.

25 Bɑ́ kòò fũ̀ṹtɛ́ kupie nkùù tɑ o ĩ́nkɛ̀,

kɛ̀ bɛ̀ dɛ̀itɛ mɛpembii mmɛ̀ɛ̀ tɑ o dinni,

kɛ̀ kukɔ̃m̀bɔ̀doróo ò kùɔ.

26 Dibiìnnì diɛrì diì duɔ́ o kpɛ́í kɛ bo ò do,

muhɑ̃ɑ̃́ nhòmɔù í tɔ̀tinnɛ mù muù yóó ò cɔ̀útɛ́,

kɛ́cɔ́útɛ́nɛ̀ dɛ̀ɛ̀ kpɑɑ́ kɛ bo o cĩ́ɛ̃̀tɛ̀ miɛkɛ.

27 Kɛĩ́nkɛ̀ dɑ́ɑmmu o cɑɑ̀rìmɛ̀,

kɛ̀ kɛtenkɛ̀ nɑ̀kɛ́ o kpɛ́í,

28 Kuyie mmiɛkɛ bo ò yɛ̀ dìì yiè o kpɑ̀tì bo yɛntɛ́ yɛntɛ́,

tì bo pɔ̃ntɛ́ mɛniɛ ntɛ̃mɛ̀.

29 Kuyie mbɑ̀ɑnɛ̀ tì oyɛiwe tintì mɛmmɛ.

Ò yóó tiekɛ dɛ̀ndɛ,

Kuyie ndɛ nhò bɑ̀ɑnɛ̀.