1 Iesu Keriso ena vara revarevana binai: ia na David natuna, Abraham natuna.

2 Abraham ese Isaak e havaraia; Isaak ese Iakob e havaraia; Iakob ese Iuda mai tadina ida e havaradia; 3 Iuda ese Perese bona Sera e havaradia, Tamara bogana ai; Perese ese Hesrom e havaraia; Hesrom ese Ram e havaraia; 4 Ram ese Aminadab e havaraia; Aminadab ese Nason e havaraia; Nason ese Salmon e havaraia; 5 Salmon ese Boa e havaraia, Rahaba bogana ai; Boa ese Obed e havaraia, Ruta bogana ai; Obed ese Iese e havaraia; 6 Iese ese David, hanua pavapavana, e havaraia.

David ese Solomon e havaraia, Uria adavana bogana ai; 7 Solomon ese Rehoboam e havaraia; Rehoboam ese Abia e havaraia; Abia ese Asa e havaraia; 8 Asa ese Iehosafat e havaraia; Iehosafat ese Ioram e havaraia; Ioram ese Usia e havaraia; 9 Usia ese Iotam e havaraia; Iotam ese Ahasa e havaraia; Ahasa ese Hesekia e havaraia; 10 Hesekia ese Manase e havaraia; Manase ese Amon e havaraia; Amon ese Iosia e havaraia; 11 Iosia ese Iekonia mai tadina ida e havaradia, Babulono e laohaidia negana ai.

12 Babulono e laohaidia murinai, Iekonia ese Sealtiele e havaraia; Sealtiele ese Serubabele e havaraia; 13 Serubabele ese Abiud e havaraia; Abiud ese Eliakim e havaraia; Eliakim ese Asoro e havaraia; 14 Asoro ese Sadok e havaraia; Sadok ese Akim e havaraia; Akim ese Eliud e havaraia; 15 Eliud ese Eleasara e havaraia; Eleasara ese Matan e havaraia; Matan ese Iakob e havaraia; 16 Iakob ese Iosef, Maria adavana, e havaraia; Maria ena amo Iesu, e gwauraia Keriso, e vara.

17 Taunabunai uru iboudiai Abraham ena amo ema bona David be uru gwauta-hani; bona David ena amo ema bona Babulono e laohaidia negana be uru gwauta-hani; bona Babulono e laohaidia negana amo ema bona Keriso be uru gwauta-hani.

18 Iesu Keriso na ini e vara toma: ia sinana Maria na Iosef maohenina, to raruosi do asie geda bou, Lauma Helaga ese mero e henia. 19 Adavana Iosef na kara maoromaoro tauna, bona hahine ihahemaraina se ura, taunabunai baine hahekohoa hehuni-hehuni eto. 20 Lalona unu e hadaia tomava ai, Lohiabada ena aneru ta ese nihi ai e hahedinarai henia, eto, Iosef David e, adavamu Maria iabidaena garina basio gari, badina be Lauma Helaḡa ese mero vada e henia. 21 Ia ese mero do baine abia; ladana ba hatoa IESU; badina be ia ese cna bese taudia edia kara dikadia amo baine hamauridia.

22 Ini ḡau iboudiai e vara, Lohiabada ese peroveta tauna uduna amo e gwauraia herevana ihamomokanuna; eto,

24 Iosef na mahuta amo e noga, bena Lohiabada ena aneru ese e haduaia heḡereḡerena e karaia. Adavana e abia dae: 25 to ia ida asie geda bou, ela bona natuna e abia. Bena mero ladana e hatoa IESU.