2
Moyabaa yulubin saranna
1 Alatala ito nan falaxi, a naxa,
“Moyabaa hakɛ saxanna,
hanma naanin ma fe ra,
n mi xɛtɛma n ma fe ragidixin fɔxɔ ra.
E bata Edɔn mangan xɔnne gan
han e findi a fuɲin na.
2 Nanara, n Moyaba ganma nɛn.
Tɛɛn nan fama Kɛriyoti yire makantanxin kaladeni.
Moyaba ɲanma yɛngɛ sɔnxɔn nin,
yɛngɛ so xɔtaan na fe waxatin naxan yi.
3 N na e mangan halagima nɛn,
e nun e kuntigine.”
Alatala naxa na kiini.
Yudayaa yulubin saranna
4 Alatala ito nan falaxi, a naxa,
“Yuda kaane hakɛ saxanna,
hanma naanin ma fe ra,
n mi xɛtɛma n ma fe ragidixin fɔxɔ ra.
E bata e mɛ Alatalaa sariyan na,
e mi a tɔnne suxi.
Bayo e bata la wule alane ra,
e fafane yi naxanye fɔxɔ ra.
Na nan e ralɔxi ayi.
5 Nanara, n Yuda yamanan ganma nɛn.
Tɛɛn nan fama Yerusalɛn yire makantanxin kaladeni.”
Isirayilaa yulubin saranna
6 Alatala ito nan falaxi, a naxa,
“Isirayila a hakɛ saxanna,
hanma naanin ma fe ra,
n mi xɛtɛma n ma fe ragidixin fɔxɔ ra.
E tinxin muxune masara gbetin na,
e tɔrɔ muxune masara sankidi saren na.
7 Yiigelitɔne tɔrɔn nafan e ma han
e e dunuɲa yi gidin bama e yii.
Diine nun e baba kafuma sungutun kedenna ma.
Nayi, e bata n xili sariɲanxin xɔsi.
8 E e sa saraxa ganden dɛxɔn dugine ma
e naxanye sɔtɔ tolimaan na.
E dɔlɔn min e suxurene banxin kui
e naxan sɔtɔ tinxintareyani.”
9 “Anu, n tan nan Amorine halagi e xa,
naxanye sɛnbɛn yi gbo
alo suman wudina alo warine.
N na Amorine fangan birin ɲan fefe,
alogo e nama fa keli sɔnɔn.
10 N mɔn yi ɛ ramini Misiran bɔxɔn ma,
n yi ɛ rasiga ti ɲɛɛ tonge naanin tonbonni
alogo ɛ xa Amori bɔxɔn sɔtɔ.
11 N yi nabine ramini ɛ diine tagi,
e nun Dɛ Ti Nasiri muxune.
Isirayila kaane, a mi na kiini ba?”
Alatalaa falan nan na ra.
12 “Koni ɛ tan bata dɔlɔn so Dɛ Ti Nasiri muxune yii.* Nasirine fe mɔn sɛbɛxi Yatɛne 6.3 kui.
Ɛ bata tɔnna dɔxɔ nabine ma
a e nama nabiya falane ti.”
13 “Nanara, n na ɛ yibutuxunma nɛn,
alo wontorona, goron binyen naxan fari.
14 Muxu xulunxin mi nɔɛ a giyɛ.
Sɛnbɛmaan sɛnbɛn ɲanma nɛn.
Sofaan faxama nɛn yɛngɛni.
15 Xalimakuli wonla mi tiyɛ.
Naxan san mafura,
na mi a giyɛ.
Soo ragiin mi a niin nakisɛ.
16 Sofa wɛkilɛxin nagenla a gima nɛn na lɔxɔni.”
Alatalaa falan nan na ra.