15
Nabi Musaa bɛtina
1 Nayi, Musa nun Isirayila kaane yi bɛtini ito ba Alatala xa. E naxa:
N bɛtin bama Alatala xa,
amasɔtɔ a gbo mumɛ!
A bata soone nun soo ragine radin baani.
2 Alatala nan n fangan na,
n bɛtin bama naxan xa,
a mɔn bata findi n nakisimaan na.
N ma Ala nan a ra,
n na a tantunma nɛn,
n fafe a Ala nan a ra,
n na a matɔxɔma nɛn.
3 Yɛngɛ soon nan Alatala ra,
a xili nɛn “Alatala.”
4 A bata Firawona wontorone nun a ganla woli baani,
Firawona sofa yɛbaxine bata e mamin Gbala Baani.
5 E bata godo tilinna ma alo gɛmɛne.
Fufaan yi sa e xun ma.
6 Alatala! I bata i sɛnbɛn yita!
Alatala! I yiifanna bata yaxune faxa.
7 I bata yaxune rabira i ya gboon nun nɔrɔni.
I bata i ya xɔlɔ gbeen nagodo alo tɛɛna
a yi e gan alo sɛxɛ xarena.
8 I ɲɔɛ foyen bata igene malan,
walanne yi raxara alo banxi kankena.
Igene yi raxara baan tilinna xɔnna ma.
9 Yaxune yi a falama, e naxa,
“N sagatanna tima nɛn,
n yi e suxu.
N se tongoxine yitaxun,
han n wasa e ra,
han a dangu ayi.
N silanfanna botinma nɛn ayi,
n yiin yi e halagi.”
10 Koni, i bata i dɛ foyen nafa
baa igen bata sa e xun ma.
E bata godo ige gbeen bun ma
alo wure binyena.
11 Alane yɛ, nde luxi alo i tan, Alatala?
Nde luxi alo i tan?
I gbee nɔrɔn sariɲan!
I magaxu!
Tantunna i tan nan xa!
I kabanakone ligama!
12 I bata i yiini bandun,
bɔxɔn yi nxu yaxune gerun.
13 I bata ti i ya yama xunbaxin yɛɛ ra i ya hinanni.
I e rasigama nɛn
i dɔxɔde sariɲanxini i sɛnbɛni.
14 Siyane a mɛma nɛn,
e xuruxurun.
Kuisanna Filisitine suxuma nɛn.
15 Edɔn kuntigine gaxuma nɛn.
Gaxun Moyaba muxu gbeene suxuma nɛn.
Kanan kaane birin sɛnbɛn bata ɲan.
16 Gaxun nun kuisanna e suxuma nɛn,
e e raxara alo gɛmɛna i sɛnbɛn bun,
han i ya yamaan yi dangu, Alatala!
Han i ya muxune yi dangu.
17 I e xalima nɛn,
i yi e dɔxɔ geyaan fari
i naxan findima e kɛɛn na,
i tan Alatala luma dɛnaxan yi,
i tan Marigin dɛnaxan nafalaxi yire sariɲanxin na.
18 Alatala luma nɛn mangayani habadan han habadan!
Mariyama bɛtina
19 Firawona soone nun a wontorone nun a soo ragine to godo baani, Alatala baa igen naxɛtɛ nɛn e xun ma, koni Isirayila kaane yi sigan ti, e baani gidi a yixarena. 20 Nayi, Haruna xunyɛn Mariyama, nabi ɲaxalanmana, na yi tanbanna suxu a yii. Ɲaxanle birin yi bira a fɔxɔ ra, tanbanne e yii, e bodonma.
21 Mariyama yi bɛtini ito bama Isirayila ɲaxanle xa,
Ɛ bɛtin ba Alatala xa,
amasɔtɔ a gbo han!
A bata soone nun soo ragine woli baani!
Isirayila kaane tonbonni
22 Musa yi ti Isirayila kaane yɛɛ ra keli Gbala Baani siga Suru tonbonni. Xii saxanna bun ma, e sigan tima tonbonni, e mi ige to.
23 E yi so Mara yi, koni e mi nɔ Mara igen minɲɛ, amasɔtɔ a yi xɔlɔ. Nanara, na yiren yi xili sa “Mara.”* Mara bunna nɛɛn fa fala “Xɔlɛna.” 24 Yamaan yi lu Musa mafalɛ, e naxa, “Nxu xa nanse min?” 25 Musa yi Alatala maxandi, Alatala yi wudina nde yita a ra, a naxan woli igeni. Igen yi ɲaxunɲɛ ayi. Alatala tɔnna nun sariyan soxi yamaan yii mɛnna nin, a e kɛɲaan fɛsɛfɛsɛ.
26 A yi a fala, a naxa, “Xa ɛ Alatala xuiin namɛ ki faɲi, ɛ Ala, ɛ yi tinxinna liga a yɛɛ ra yi, xa ɛ a yamarine nun tɔnne birin suxu, n mi fitina fe yo rafɛ ɛ ma, n Misiran kaane ɲaxankataxi naxanye ra, amasɔtɔ Alatala nan n tan na, naxan ɛ rakɛndɛyama.” 27 E yi so Elimi yi, tigi fu nun firin yi dɛnaxan yi e nun tugu bili tonge solofere. E yi daaxadeni tɔn mɛnni, igen dɛxɔn.